Maak 5
5
A Mataa Pana Vovau Saat Xaves
Mt 8:28-34; Lk 8:26-39
1E ri savat la saxa paxasing ina laman, la bina sina mu Gerasa.#5:1 Na Luuk a xali a rabuna ti la bina aanabe' pana Gerasin (Lk 8:26,37) e na Matiu a xali nari pana Gadarin (Mt 8:28) 2Na Yesus a du ti lana xaati e fataapus a saxa mataa aava toxan a vovau saat a savat sina. A mataa aanabe' fuuna taagul vulai la matana xawaa. 3Nane fuuna matef la matana xawaa e pi ta mataa a fexaxaas i taa pise. A ‘sein’ sait pife fexaxaas sena pisaana. 4Faaxaxaves ri pis a mana e kana pana ‘sein’ taasaxa fuuna piit a ‘sein’ o saxano mo ri pis fatateaxe pana. A gutan sina a molava faagut e piau ta mataa fexaxaas sena yot fatateaxe. 5Vulai la paanaas e lavung, nane fuuna taagul la matana xawaa e xuluna put e fuuna faati kuup e i taxa putuk vulan a tana pana fisa o pana faat.
6Nane xalum na Yesus i taxa sangasmaan lasuun e falapuk e fe bukaak la no Yesus. 7Nane ferawai faagut malaan, “Yesus, nano, no Natuna Piran Laa'ui! No vubuk vil a so sega? Ne fenung xe siim pana isina Piran, no muta tavaiau pana maasaxan!” 8A ferawai malaan senaso na Yesus a xuuse, “Nano, no vovau saat, no ta'ulan a mataa aanabe'!”
9E na Yesus a fin a vovau saat aava vao a mataa aanabe', “A isaam nase'?”
E a vovau saat a sui a fiaian sina, “Na Aami, senaso nemaam, ma malila.” 10E nane nung faagutan na Yesus o i taa muta feng tapin nari, mu vovau saat, xe la xasano bina patak.
11Faasilak seri a tagaan ina vio xaves ri taxa fangan xuluna fomirak put. 12E a mu vovau saat ri fenung faagut xe si Yesus malaan, “A fexaxaas no taa feng nemaam xe sina mu vio aapave?” 13E na Yesus a turoxo xe siri rao ri taa falet saa. E mu vovau saat ri ta'ulan a mataa aave e ri paan xe sina mu vio. A mu vio aanabe' moxo, ri fefalayai saa xe la talasaafan sina bina. A mu vio ri fexaxaas malaan sena 2,000! Ri lalaas du xe lana raarum e nari xapiak ri xarak e ri maat.
14A mu rabuna ina faxatangaana mu vio ri sinuf e ri fe lisan a lagasai lana bina lava faasilak e lana mu bina xapiak. E maana rabuna ri paan xe pave xena xalumaana mo aanabe'. 15Ri fesavat si Yesus e ri xalum a mataa aava mu vovau saat ri mo vawe e ri taagul xuvul pana. Naboxo i taxa falak a marapi e a lalamonan sina a matavas e i taxa nai faroxo. E a mu rabuna ri xalume e ri mataut. 16A rabuna ina faxatangaana mu vio, ri xuus a xasano rabuna pana mo aava fo savat sena mataa aava mu vovau saat mo waan la tana paamua. E ri kuusan a mu vio siri sait. 17A mu rabuna, ri kuus faagut rao na Yesus i taa ta'ulan a bina siri e i taa paan xe la saxa nobina patak.
18Layaan na Yesus i taxa xawas fulaa xuluna xaati a mataa aava vovau saat mo waan la tana, a fin na Yesus rao i taa falet xuvul pana. 19Taasaxa na Yesus a pife kuus turoxo pana, a xuuse, “No paan saa xe la lifu siim e xe sina mu fesing siim. E no xuus nari pana maana mo a Memai fo vile sema e malaafaa a muluk nano.” 20Lavaxa, a mataa aanabe' a falet e taxa kuusan fasavat a mo na Yesus fo vesane sena la maana mu bina pe Dekaapolis. E mu rabuna, ri ipul faagut pana e ri lamon faaxaves sena.
A Lak Si Jairus E Saxa Tefin Pana Giisan
Mt 9:18-26; Lk 8:41-56
21Na Yesus a ulaa fulaa xe pe la saxa paxasing ina Laman Galili. E a malila ri savat xe sina pe la vangana raarum. 22E saxa matalava ti la lifu ina faxavulan a savat, a isina na Jairus. Nane xalum na Yesus e filimaan e maa bukaak faasilak la ka Yesus. 23E nane fenung faagut xe si Yesus malaan, “A lak tefin siak faasilak rao i maat. Ne vubuk o no taa falet e no taa tao a tana talo i taa roxo fulaa.” 24Na Yesus a falet xuvul pana e a malila ri usie e ri ivung faasilak paaliu lamina.
25A saxa tefin la palou ina malila aanabe', nane a xaxalum a fulun vulai la maana yaan. Nane fo toxan a giisan aanabe' pana mariaas sangafilu saxa pana taragua. 26E mu rabuna i'irin ri famasaxe pana maana buk irin xaves e a tefin a maraan nari pana tangop xapiak sina taasaxa giisan sina pife taxapus famodak, piau paaliu! 27A tefin aanabe' a langai sena faisok si Yesus e nane fe laak la palou ina rabuna aava ri taxa usi na Yesus e nane sangas faasilak lumui la mi Yesus e a tao a marapi sina. 28Senaso a ilisai malaan, “Naak tamo ne taa tao a marapi sina mon ne taa roxo fa'ulaa.” 29Lavaxa, nane vil malaane e fataapus paaliu a ria la tana a pagala e nane nasam a giisan ti la tana fo taxapus paaliu.
30E na Yesus a texaas o saxano gutan fo falet, e voxo nane ti tapuk e fiai, “Nase' tao a marapi siak?”
31E a mu fefeng si Yesus ri sui a fiaian sina malaan, “Ai, no xalum a malila ri taxa pitai xolai la taam e xenaso no fiai malaan: nase' tao a marapi la taam?”
32Na Yesus a kaalum xolai e a vubuk texaas o nase' fo tao a marapi sina. 33Taasaxa, a tefin aave nane texaas o nane fo vil a mo aanabe' e a mataut e radakui faagut. E nane falet e fe bukaak la ka Yesus e kuusan xapin a maana mo nane fo vile. 34E na Yesus a xuuse, “Lak siak, a namkaian siim fo vil faroxoi nano. No taa falet e a xunus ima i taa malui, a giisan siim fo taxapus!”
35Na Yesus i taxa ferawai lunai e saxanu sisiak sina matalava ina lifu ina faxavulan aave ri savat e ri xuus a matalava, “A lak siim fo maat xong, xenaso no taxa lo fasorak a mataa ina fepitaa aanabe'?”
36Taasaxa na Yesus fo texaas sena so ta mo ri kuusane. Nane a xuus a matalava ina lifu ina faxuvulan malaanabe', “No muta mataut naboxo. No taa namkai mon.”
37E na Yesus a ti votan a xasano rabuna ri taa pife paan xuvul pare. Na Saimon Pita, Jems e na Jon a saxa ti Jems, narutul sang mon rutul usi na Yesus. 38E ri fe savat la lifu sina matalava aave e na Yesus a xalum nari pave, ri taxa felingai faagut senaso ri taxa fetaangiis. 39E na Yesus a laak la lifu e fin nari, “Senasou mi felingai faagut pana taangiisan simi? A lak aanabe' pife maat paaliu. Nane taxa matef move.” 40E mu rabuna ri fenangon xuluna. Taasaxa nane feng tapin nari xe lamalei.
E nane xel mon a tamana lak e ninana o re taa laak xuvul pana e a fefeng talatul sina. E ri laak xe la nobina aava lak taxa mati lana. 41E na Yesus a tao a mana lak e xuuse malaan, “Talita Kum!” A malasuf ina paferawaian aanabe' a malaan, “Lak tefin, ne xuus nano, no tamasiak!” 42E fataapus a lak tefin aanabe' a tamasiak e sangas. A mariaas sina lak a sangafilu saxa pana taragua. E na ninana e tamana e fefeng talatul sina ri ipul faagut paaliu sena gutan si Yesus. 43E na Yesus a xuus faagutan nare o re muta xuus ta saxa mataa pana mo aanabe'. E nane xuus nare sait o re taa tavai a lak pana fanganan.
اکنون انتخاب شده:
Maak 5: leu
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2014, Wycliffe Bible Translators, Inc. All rights reserved.
