Matiu 19
19
Na Yesus A Fepitaa Pana Vilaana Ina Tamaian
Mk 10:1-12
1Layaan na Yesus a fataxapin a maana ferawaian aanabe' a ta'ulan a bina Galili e falet xe pe Judia la xasa paxasing ina Raarum Jordan. 2E a malila molava ri usie e nane vil faroxoi nari pave.
3Saxano Ferasi ri maa savat sina xena tafange pana fiaian siri. Ri fine, “A tuuna a vuputkai sitaara a turoxoian a mataa xena fataxapin a tamaian sina xuvul pa naasana xena usi a so ta buk vubuxanan sina, bo?”
4E na Yesus a sui nari, “Mi pife kat lunaian a xakalayan sina Piran aava kuus o ti la tangpat a Piran ina Vavesai a vesan a mu rabuna xapiak, nari mu tomexaan e nari lutefin, bo? 5E a Piran a kuus laa, ‘Sena fufuna aanabe' a mataa taa ta'ulan na tamana e na ninana e i taa fexuvulai xuvul pa naasana, e re taa savat vipin saxa mon.’ 6E voxo re pife rovaat taragua fulaa, piau, nare, re saxa mon. Piau ta mataa i taa fepatoxan a rofelavaan senaso Piran fo faxuvul nare.”
7E ri kuus xe sina, “Senasou e na Moses a turoxoian a mataa xena tavai na naasana pana lagasai ina fataxapinaana tamaian sire e feng tapine?”
8E na Yesus a sui nari, “Na Moses a turoxoian nami xena fataxapinaana tamaian xuvul pa naasami senaso mi fatavanat a lamonan simi e mi bai langai. Taasaxa ti la tangpat a pife malaanabe'. 9Ne xuus nami o layaan a naasana mataa a waan fatak la tana e pife mati xuvul pana saxa mataa patak, tamo na lavana a fataxapin a tamaian sire e tamai xuvul pana saxa tefin patak, i taxa milung pana vilaana ina tamaian.”
10A mu fefeng sina ri kuus xe sina, “Tamo a malaanabe' la palou ina rofelavaan naak a mo roxo re taa pife tamai.”
11Taasaxa na Yesus a suie, “Pi ta rabuna xapiak ri fexaxaas sena turoxo pana fepitaian aanabe' taasaxa nari aava Piran a kas a lamonan siri, ri taa tawe. 12Ne taa kuus famatavas; a toxan a fufuna xaves sena mataa aava pife tamai: saxanofuna ri pife fexaxaas sena tamai ti lana luluuxan siri; saxanofuna ri pife fexaxaas sena tamai senaso a rabuna ri patal tapin nari e saxanofuna ri lamon faati o ri taa pife tamai senaso ri buk sisiak faroxo xe sina Piran. Tamo mi fexaxaas sena turoxo pana fepitaian aanabe' lavaxa, langaie.”
Na Yesus A Fenung Xe Sina Piran Pana Mu Rafulak Modak
Mk 10:13-16; Lk 18:15-17
13Saxano rabuna ri lisan a rafulak modak xe si Yesus talo i taa tao nari e fenung xe sina Piran pari. Taasaxa mu fefeng sina ri baras nari.
14E na Yesus a kuus, “Turoxoian a mu rafulak xena filimaan xe siak, muta ti votan nari. Senaso a fatataganan sina Piran ve a nobina sina rabuna malaan sena mu rafulak aanabe'.” 15E nane yot nari e fenung pari e mui a ta'ulan a bina aave.
A Maana Fafanaian Xaves Ri Taa Fakalaxoi Nami
Mk 10:17-30; Lk 18:18-30
16Saxa yaan a mataa fa'ui a filimaan xe si Yesus e fine, “Mataa ina Fepitaa, a so ta mo roxo ne taa vile xena siak a toyan vulai?”
17E na Yesus a suie, “Senasou e no finau pana so ta mo a roxo? A Piran sang mon a roxo. No taa usi fatak a mu vuputkai tamo no buk laak lana toyan vulai.”
18E a mataa aave a fine, “A so ta vuputkai?”
E na Yesus a suie, “Muta punuk mataa; muta femilungai pana vilaana ina tamaian; muta fenau; muta bit tifi ta mataa; 19suai se tamaam e ninaam e vubuxan xasingit a xasano rabuna malaan se' no vubuxan xasingit nano xa.”
20A mataa fa'ui aave a kuus, “Ne fuuna usi fatak a maana vuputkai aave. A so ta mo fulaa ne taa vile?”
21E na Yesus a xuuse, “Tamo no vubuk usi fatak a vubuxanan sina Piran no taa fe faasot pana maana mo siim e a faat ina, tatavai xe sina mu valagof pana e no taa toxan a maana fafanaian roxo pe la xunavata; e mui, maa usiau.”
22Layaan a mataa fa'ui aave a langaie, nane kanamsaat paaliu e falet patak senaso a toxan a maana fafanaian xaves.
23Na Yesus a kuus xe sina mu fefeng sina, “Ne xuus tuunei nami, a mo lagaf paaliu sena mataa piran xena laak la fatataganan sina Piran. 24A tuuna, a ‘kaamel’ aava tiir molava sena hos, a fexaxaas sena laak xe lana valof ina niil paamuina mataa piran i taa laak xe lana fatataganan sina Piran Tuuna.”
25Layaan a mu fefeng ri langaie, ri ipul faagut e ri fine, “Nase' taa fakaxupan xena to vulai?”
26Na Yesus a kaalum fatak xe siri e sui nari, “A mataa pife fexaxaas sena vil a mo aanabe' taasaxa Piran a fexaxaas sena vil a maana mo xapiak.”
27E na Pita a suie, “Kaalum, maam fo ta'ulan a maana mo xapiak xena usi nano. Maam taa toxan a so ta mo?”
28E na Yesus a xuuse, “A tuuna, lana yaan mui layaan a maana mo xapiak i taa fa'ui, a Natuna Mataa i taa nai lana malang la vepen ina nai piranan sina. E nami aava mi fuuna usiau, mi taa nai la mu vena naian roxo simi xena paamuian a mu pabung sangafilu saxa pana taragua ti Israel. 29E nase' ta mataa aava ta'ulan a mu tina o vasaana, tamana, ninana o rafulak, lifu o xavala xena usiau, i taa siak a maana mo xaves paaliu sena maana mo aave e vaxa a Piran i taa tavaie pana toyan vulai. 30Taasaxa nari aava ri waan paamua naboxo, ri taa waan la fataxapiak e nari aava ri waan la fataxapiak naboxo, ri taa waan paamua.”
اکنون انتخاب شده:
Matiu 19: leu
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2014, Wycliffe Bible Translators, Inc. All rights reserved.
