JOHAN 14
14
Limro, Thiyuro tüsho Rhangdung
1“Nüsa mulong düthsümünim, nüsanü Thrünpuh kheak kinang, tüsho I kheak she kinang. 2I Buh yam ching khiungshak ahihdo lah; jude yungkhülaa, inü nüsa ki thaa labah, I nüsa thsungkheak lapung thsakhampü yüchoh. 3Tüsho nüsa thsungkheak lapung thsakhampü I yüsho, I alode arübah tüsho I kilim nüsa bea lubah; junangde I küching labanü, nüsa she ju ching labah. 4Tüsho nüsanü I yükhi limro mükheahlah.” 5Thomanü api ki tha, “Atungpuh, nü külim yüchonü isanü mümükheah, dale küde thsah isanü limro mükheahpü?” 6Jisunü api ki tha, “I limro, thiyuro tüsho rhangdung. I hode yungsho shenü she I Buh kilim marüchoh. 7Nüsanü I mükheahkhülaa, I Buh she mükheah-a labah; tüsho kheakünü rünbah nüsanü api mükheahlah tüsho api ngüdo.”
8Philipnü api ki tha, “Atungpuh, isa ki Abuh huhang, tüsho ju isa thsungkheak asuhdah ah.” 9Jisunü api ki tha, “Philip, I nüsa lung khide ruhde lado, tüsho kheaküshe nünü I mümükheah de? Shepünü I ngüdünü I Buh ngüdo; jumonü küde thsah nünü, ‘Isa ki Abuh huhang,’ de thacho? 10I Abuh kheak lah tüsho Abuh I kheak lah de nünü mükincho de? Inü nüsa ki thakhi yubo ju I yo thiyukhüm-sühmühnü masuk tüshe I kheak lakhi I Buh rhimo rhimochoh. 11I Abuh kheak lah tüsho I kheak Abuh lah de kinang, yungsho rhimobo thsülimnü I kheak kinang. 12Atsütsü inü nüsa ki thachoh, shepünü I kheak kinchonü, inü arhimokhi rhimobo apinü she arhimobah; tüsho harü kheaknü atobe rhimobo apinü arhimobah, tümütüsho I Buh kilim I yüchoh. 13Tüsho nüsanü tümüpürü I mung chingnü akheangbanü inü arhimobah, junangde atsührü kheaknü Abuh müretahbah. 14Nüsanü tümükhüh I mung chingnü kheangsho, inü ju rhimobah.
Amüsüh Me Alokhikhi
15“Nüsanü I muzhosho, I yuzüngbo zoang. 16Inü I Buh ki tamkhüntamnübah, tüsho apinü nüsa kilim arungrü püpü jihbah, junangde apinü nüsa lung lünnü alabah– 17ju thiyuro Me. Alominü api müleangkhikhuk, müngü yungsho api mümükheah; tüshe nüsanü api mükheahlah, tümüde api nüsa lung lah tüsho nüsa kheak labah.
18“Inü nüsa mürerübo nangde mübahjih; I nüsa kilim arübah. 19Anükhüh labah alominü I müngüde akambah, tüshe nüsanü I ngübah, Tümütüsho I lale, nüsa she alabah. 20Ju nimung I Abuh kheak lah, nüsa I kheak lah, tüsho I nüsa kheak lah de nüsanü amükheahbah. 21Shepü I yuzüngbo la tüsho jurübo zochonü apinü I muzhochoh. Shepünü I muzhochonü I Buhnü amuzhobah, tüsho inü api muzhobah tüsho api ki I akhiuka huhbah.” 22Judanü (Iskariot yung) api ki tha, “Atungpuh, nünü küde thsah alomi ki yungde isa ki akhiuka huhba?” 23Jisunü api ki alo, “Khürünü I muzhosho, apinü I yu zobah; I Buhnü api muzhobah, tüsho ike api kilim arübah tüsho api lung ike yam thsübah. 24Shepünü I mümuzhonü I yubo muzochoh; tüsho nüsanü asokhi yu ju I yo yung tüshe I thiyikhi I Buh yo ah.
25“Harü I nüsa lung lachoki inü nüsa ki asukdo. 26Tüshe I mung chingnü I Buhnü athiyipü lakhi arungrü, Amüsüh Menü nüsa ki alala thsangyubah, tüsho inü nüsa ki thakhi alala lümkhitshihbah. 27Inü nüsa lung mungtsü zojihchoh, I yo mungtsü inü nüsa kilim jihchoh; alominü ajihkhi yung nangde inü nüsa kilim jihchoh. Nüsa mulong düthsümünim, yungsho dütre. 28Inü nüsa ki, ‘I yüchoh tüsho nüsa kilim alode arübah,’ de athakhi nüsanü sodo. Nüsanü I muzhosho, nüsa asühachihbah, tümütüsho inü tha, ‘I Buh kilim I yüchoh,’ tümüde I Buh ju I kheaknü atobe ah. 29Tüsho kheakü ju müdünjiyide inü nüsa ki thado, junangde küyimki ju dünjibanü nüsanü akinbah. 30Kheaküa inü nüsa lung masukachih, tümüde ha lomi yakzanshuhrü arüchoh, tüsho api ju I ki tümü müla. 31Tüshe inü I Buh muzholah de alominü amükheahpü, tüsho I Buhnü thiyuzüng jihkhi nangde inü rhimochoh. Asürang, isanü ha chingnü yüanü.
اکنون انتخاب شده:
JOHAN 14: YIMCBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
