YUZÜNGTHALO 22
22
1“Nü keoniorü moshipung yungsho namfimihnu nünü kheahde dütsoshih tüsho nü lupü amümürang düthsü; nünü keoniorü kilim belode arüjang. 2Tüsho nü keoniorü ju nü phünide mülasho, yungsho api mümükheahsho nü yam ching bedarang, tüsho nü keoniorünü müyimchoki khiungde nü yam ki labah; tüsho nünü api kilim jihlobah. 3Nünü api yo donki tüsho khimmih she ju ruk thsang; nü keoniorü kukruk tümükhüh dükheakkhi nünü ngüsho, ju ruk thsang; nünü düramkhiramra.
4“Nü keoniorü donki yungsho moshipung limro ching angaka yapkhi ngüsho, amümürang düthsü; nünü yihmusuloang.
5“Aliberünü athrürü khimmih düyuk, yungsho athrürünü aliberü khimmih düyuk, tümüde hadürü rhimorü Atungpuh nü Thrünpuh miki athraneanbe lah.
6“Limro ching nü müngüh sang kheak yungsho alo kheak wuhnu sap ching anunu yungsho ake hüpbah abe ngüsho nünü anunu lung abe ju dulu. 7Nünü abe tsoshang tüsho anunu luang, junangde nü tsüde alabah tüsho kutsüpde alabah.
8“Küyimki nünü thüyam aso thsübanü thüyam mün yande khudopü thsang, junangde ju kheaknü khürü ayokhikhi hode nü yam kheak thiyih bukkhi amülim marü.
9“Nünü kurungasolu ching müjih mungji mahne düyang, jude yungsho nünü ayangkhi müjih mukhuhkhi tüsho kurungasolu ching sangaso müneanabahbah.
10“Nünü moshipung tüsho donki ane nungde thulu düwochakshih.
11“Nünü alamlam khim tüsho khimthünak thsürua düphuyu.
12“Nünü nü khim münkheam phüyi ching amüngam müchea zoang.
Müzammüram Mülapü Dünkheak Yakzan
13“Athrürü khülangnü niuberü lubah anihbe lung nungde alashu mulunede bahsho, 14tüsho anihbe kheak achih kipde thade tüsho mung amütsü hande arüde, Inü ha liberü lukheah tüshe anihbe atsangkhitkhi liberü yung de müdamsho, 15alibe tsangkhitkhi dünkheak anünübe bebuhrünü kiuto chipimurung ki azothsürübo ki thiyumütsan hande arübah. 16Tüsho anünübe abuhnü azothsürübo ki thabah, ‘Inü I tsührü ha buh niube thsüpü jihkheah, tüsho apinü anihbe mulune; 17kheakü apinü anihbe achih kipde thachoh, “Nü tsührü ha atsangkhitkhi liberü yung de inü ngüdo,” tüsho kheahang, I tsührü alibe tsangkhitkhi dünkheak thiyumütsan harü lah.’ Tüsho anihbe bebuhrünü kiuto azothsürübo miki khim dütrüna huhbah. 18Judüki kiuto azothsürübonü mihtsürü ju bedarübah alakbah; 19arünü api kheak shotoyinchi 100nü zhea anihbe bebuhrü kilim jihbah, tümüde ju buh, mihtsürünü Israel liberü kheak achih hande arüdo. Tüsho anihbe ju api niube thsübah; apinü anihbe rhangdung amuyung mübah. 20Tüshe dükde thsüa lasho tüsho anünübe thsungkheaknü atsangkhitkhi thiyumütsan mülasho, 21arünü alibe ju abuh yam khimdopü ki bede akhiukbah, tüsho kiuto ching lakhi athrürübonü anihbe ju lungnü arusahbah, tümütüsho alibenü abuh yam chingnü müzammüramde achihbe rhimo Israel ching rhimodo; jumonü nüsanü amütsü mihtsürü nüsa bolungnü yihkhita bahang.
22“Athrürü khülangnü püpürü niuberü kheak müzammüramsho ane chido sheshihbah; hanangde nüsanü amütsü mihtsürü Israel chingnü yihkhita bahang. 23Keoazokhi atsangkhit liberü khülang kiuto ching athrürü khülangnü shorubah anihbe kheak müzammüramsho, 24nüsanü ane chido kiuto chipimurung ching bede akhiukbah, tüsho ane lungnü rusahang, anünübenü arungkhishihpü kiuto ching müzhi, tüsho athrüpünü püpürü niuberü thsümünimdo; hanangde nüsanü amütsü mihtsürü nüsa bolungnü yihkhita bahang.
25“Tüshe athrürü khülangnü thiyu-zokhi liberü mükeak ching ngübahle arochihde bebah yapsho, athrüpü lang asheshihbah. 26Tüshe nüsanü anünübe kheak tümü dürhimo; anünübe kheak ashepü thülünde neak tümü müla, tümüde ha mihtsürü khülangnü nihbuh yamhingrü azhihde alaksahkhi ruk ah; 27tümüde apinü anihbe mükeak ching ngü, tüsho thiyu-zoa lakhi alibenü zhido, tüshe ju ching anihbe khümkhitpü she mülade alakheah.
28“Athrürü khülangnü thiyu-muzokhi atsangkhit anünürü ngübahle anihbe kheak müzammüramsho, tüsho ane ju ngükhitsho, 29alibe thsümünimbuh athrüpünü alibe abuh kilim shotoyinchi 50 jihbah, tüsho alibe ju api niube thsübah tümütüsho apinü anihbe thsümünimdo; api rhangdung amuyung apinü anihbe mübah.
30“Tüsho athrürü khülangnü abuh niube mulu, yungsho abuh niube kheak müzammüram müthsü.
اکنون انتخاب شده:
YUZÜNGTHALO 22: YIMCBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.