YUZÜNGTHALO 18
18
Amükeamrü tüsho Levirü Shihcham
1“Levirü amükeamrübo, tüsho Levi trük alala Israel lung yamrüplurüp müla; arünü Atungpuh kilim monü taka kingaünkhi tüsho api shihcham tsühbah. 2Jumonü keoniorü lung arü yamrüplurüp müla; apinü arü ki thakhi nangde Atungpuh ju arü yamrüplurüp thsübah.
3“Tüsho mihtsürübonü moshipung yungsho namfimihnu kingaünchoki amükeamrü kilim ha jihbeah: arünü amükeambuh kilim adubuh, shihnupung tüsho bukning jihbah. 4Nüsanü hi akhuh asokhi yukhu aso, oliv müdangke tüsho namfimihnu nam akhuh rukkhi api kilim jihang. 5Tümüde Atungpuh nüsa Thrünpuhnü api le atsührübo Atungpuh mung ching lünnü atankihshihpü nüsa trük alala bolungnü mokhitdo.
6“Tüsho Levirü khülangnü Israel ching nüsa kiuto khürü ching api lapung chingnü arüsho, apinü amulongkhi kim ching Atungpuhnü amokhitkhi dangpung ching arüpü kuklah, 7tüsho apinü amüyamrü Levirünü Atungpuh miki tankihkhi nangde api Thrünpuh Atungpuh mung ching tankihpü kuklah. 8Arübo shihcham rukhühnü atsühbah, tüshe anihbuh betsührünü yamrüplurüp yinbah amühahkhi apinü azobah.
Athraneanbe Rhimo Dünkheak
9“Küyimki nüsa Atungpuh nüsa Thrünpuhnü ajihkhi lo ching arübanü, harü trükshihnü athraneanbe rhimokhibo kheahkhipü dümükheah. 10Nüsa bolung ching shenü she nihbuh tsührü athrürü yungsho aliberü mo ching mütakbeah, yungsho rük-thümü, müchitrü, khinzungrü, akeangrük huhrü, 11rükyu tharü, mesherü, me asukachihrü yungsho asherü jirü mülabeah. 12Tümüde sherünü harü alala rhimochonü Atungpuh kilim athraneanbe lah, tümütüsho harü athraneanbe dünkheaknü Atungpuh Thrünpuhnü arübo nüsa müngühnü yankhita bahchoh. 13Nüsanü A TUN GPU H nüsa Thrünpuh miki thiyuro laang.”
Wukihrü Aso Khülang
14Tüsho Mosanü tha, “Nüsanü amükühpü lakhi ching larübonü müchitrü tüsho rük-thümürü ki anichoh; tüshe nüsa kilim a Atungpuh nüsa Thrünpuhnü hadürü rhimopü mümülü. 15Atungpuh nüsa Thrünpuhnü nüsa thsungkheak wukihrü I nangde nüsa tüsho keoniorü bolungnü akhiukshihbah. Nüsanü api ki anibah.
16“Nüsa Horeb ching mukhung nimung nüsanü hade tha, ‘Inü Atungpuh I Thrünpuh düsheak musolonü yungsho ha mo ato müngülonü, jude yungsho I ashebah.’ 17Tüsho Atungpuhnü I ki tha, ‘ Arübonü tümü thadünü dükdü ah, 18Inü arü keoniorü bolungnü nü nangde wukihrü khülang akhiukshihbah tüsho api mün ching I yu yukjihbah, tüsho inü api ki thiyukhüm jihkhi alala arü ki thabah. 19Tüsho I mung ching apinü athakhi I yubo sherünü manibanü inü jurü thsümüchibah. 20Tüshe wukihrü shenü mükheahlah de lümbah I mung chingnü inü thiyukhüm müjihkhi yungsho püpürü thrünpuhbo mung ching thabanü ju wukihrü ashebah.’
21“Tüsho nüsanü athabah, ‘Atungpuhnü müthakhi yu isanü küde thsah mükheahpü?’ 22Küyimki wukihrü khülangnü Atungpuh mung ching thabah ju müdünjibanü ju Atungpuhnü müthakhi ah; wukihbuhnü ju lümkangyu thado; nüsanü api dütre.
اکنون انتخاب شده:
YUZÜNGTHALO 18: YIMCBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.