THILSIAM THU 27
27
Isak in Jakob A Maljawlna
1Chun, Isak chu a hung têk ta’n, khua muthei lo khop ah a mit a hung thim phat chun, a chapa upa zaw Esau chu a ko ah, a kiang in, “Ka chapa,” a tia; ama chun, “Zia’ hin ka um hi,” ti’n a dawnhu a.
2Ama’n a kiang in, “Ngaitia, têksia ka hita’n, ka thina ding ni la het a hipua’n;
3tu’hin, la van matchâk, la thal bawm leh la thalchangte chawi in, gamvâk in vachia inla, sakhi ei va puak piak in;
4ka thi masang hin maljawlna ka hun piak theina dingin, ka duthusam gual tak in me ei bawl piak inla, ka nêk dingin ka kiang hin hun chawi in,” a tia.
5Chun, Isak in a chapa Esau a kihopi lai tak chu Rebekah in a la ngaitha zing ah. Esau chu sakhi vakâp ah hun paw dingin gam a vavâk ta’n.
6Rebekah chun a chapa Jakob kiang in, “Ngaitia, la pa’n la u Esau kiang ah:
7‘Sakhi sa ei hun puak inla, ne’ng ka tin, ka thi masang hin Lalpa ma-âng ah maljawlna ka hun piak theina dingin, me tui tak ei siam piak in,’ a ti ka hiai.
8Chutichun, ka chapa, tu’hin ka thupiak gual in ka thu jawm in.
9Ganhon lak ah chia inla, kelno pani pha tak ei valâk piak in; la pa nêk ding in me tui tak, a duthusam gual tak in bawl piak ing ka.
10A thi masang hin a hun maljawl theina dingin, a nêk dingin la pa kiang ah la vachoi ding ahi,” ti’n a hil a.
11Jakob chun a nu Rebekah kiang in, “Ngai tia, ka u Esau chu mi mul hau tak ahi’n, kei la mi nâm tak ka hi’n;
12ka pa chun ei la themvêl kha mai leh ama thêm hi bep ing ka tin, maljawlna piak malak sâng in, hânsia dong hi kha’ng ka,” a tia.
13A nu chun a kiang in, “Ka chapa, la hânsia law chan ding chu ka chung ah um ta hen, ka thu mang ziang inla, ei valâk piak mai in,” a ti’n.
14Tichun, a chia ah, a vala ta’n, a nu kiang in a hun chawi ah; a nu chun a pa me du gual tak, tui tak in a bawl piak tai.
15Chun, Rebekah chun a chapa upa zaw Esau puansil phapen a kiang ah um chu a la’n, a chapa naupang zaw Jakob chu a thuam ta’n:
16Chuleh, kelno vunte chun a khut leh a ngawng mâmnate chu a tuam piak a:
17Chutichun, me tui tak leh vaithum a siam chu a chapa Jakob kiang in a pia tai.
18Chun, ama chu a pa kiang in a chia ta’n, “He pa,” a ti’n. Ama chun, “Zia hin ka um hi, ka chapa kua zawk la hem?” a ti’n.
19Jakob chun, a pa kiang in, “La chapa upa zaw Esau ka hi; lei sawl gual ah khan ka hi zo tai: lungsiat in tho inla, maljawlna lei piak theina dingin chû’n la, ka sakhi sa hi ne ta’n,” a tia.
20Ahi’n, Isak chun a chapa kiang in, “Ka chapa bangtidan a hem, la va mu kin-gang na e?” a ti’n. Ama chun, “Lalpa la Pathian in ei lawtinsak ziakin ahi,” a ti’n.
21Isak chun, Jakob kiang in, “Ka chapa, lungsiat tak in ei hun nai tiam in, hun themvêl tiam ka, ka chapa Esau la hi tak tak na em,” a ti’n.
22Jakob chun a pa Isak chu a vak nai ah; ama chun a la themvêl ah, “A aw chu la Jakob aw ahi ngal in, a khutte la Esau khut ahi ngal in,” a ti’n.
23Chutia, a u Esau khut gual ah a khut a mul ziak ah chun a hethei ta pua: tichun, maljawlna chu a pia tai.
24“Ka chapa Esau ngei la hinai maw?” a ti’n. Ama chun, “Hi e,” a ti’n.
25Ama chun, “Ei hun koi nai piak in, maljawlna ka hun piak theina dingin ka chapa sakhi sa chu ne’ng ka,” a ti’n. Chun, a hun koi nai ah, a ne ta’n, uain le a la, a dawn tai.
26Chun, a pa Isak chun, a kiang in, “Ka chapa, ei hun nai inla, ei chawp in,” a ti’n.
27 #
Heb 11.20
Chun, a vanai ah, a chawp ah: chun, ama chun a puan gim chu a hia’n, maljawlna chu a pia ta’n:
“Entia, ka chapa gim hi,
Lalpa maljawl gam gim gual chu ahi:
28Pathian in van dâichîm leh,
lei phatna leh bu tam tak hun pia ta hen:
29 #
Thl 12.3
Nam chuam chuamte’n la na sêm uh hen la,
chi chuam chuamte’n chibai hun bûk tau hen:
la suapite chung ah leng in um inla;
la nu chate’n chibai hun bûk tau hen:
Hânsia hun law tapo chu,
hânsialaw khum in um uh hen la,
maljawlna hun pe tapo chu,
maljawlna piak in um tau hen,”
a ti tai.
Esau In Maljawlna Mansua
30Chun, Isak in Jakob maljawlna a piak zaw phat ah chun, Jakob chu a pa kiang ah kipat pawtdok man ham ham in, a u Esau chule a gam vakna kipat in a hung tung ngal a.
31Ama chunle me tui tak a bawl in, a pa kiang in, “He pa, tho inla la chapa la maljawlna dingin, a sa huansa hi ne ta’n,” a hun ti’n.
32Chun, a pa Isak chun, “Kua la hem?” a ti’n. Ama chun, “La chapa, la chapa upa zaw Esau ka hi,” a ti’n.
33Isak chu nasa tak in a kithing ta’n, “Sakhi sa ka kiang ah hun chawi ah, la hung tun ma’n ka nêk zaw ah, ka la maljawl tâk kha kua a hita dia aw! ahi’n, ama chu maljawl in um ta tho tho in a,” a ti’n.
34Esau in a pa thugen chu a het phat in, thasia tak in a kap chuai chuai ah; a pa kiang in, “Aw he pa, kei, keima ngei hile ei maljawl ham ham ta’n la” a tia.
35Ama chun, “La nau in ei hung thêm ah, la maljawlna ding chu a la lâkpiak ta ahi,” a ti’n.
36 #
Thl 25.29-34
Ama chun, “A min Jakob a la sak uh hi a la sa dik ten uh hilo a hem? Nivei hial ei lân ta hen: ka cha upa hi’na ei lâkpiak a; tu’hin, ka maljawlna chan ding lai ei lâkpiak kit tâk hi,” a ti tai.
37Isak in Esau kiang in, “Ngaitia, ama chu la lal dingin ka siam tai; a suapite zosia le ama suak dingin ka la pia tai: bu leh uain in ka vâk ta hen, ka chapa nang â dingin bang ka hun bawl piak ta dia aw!” a ti’n.
38 #
Heb 12.17
Esau chun a pa kiang in, “He pa, maljawlna pakhat bep a hem la nei? Aw he pa, keile ei maljawl ham ham ta’n la,” a ti’n.
39 #
Heb 11.20
Tichun, Esau chu ngai tak in a kap ta’n. A pa Isak chun a dawnhu a:
“Ngaitia, la umna ding chu lei phatlona gam,
chung lam van daichîm kiaklona mun hi ding ahi.
40 #
Thl 36.8; 2 Le 8.20 La hinna ding chu la chemjam hi’ntin;
la suapi na sep piak in la tin;
chun, zia gual hi hi’ntin:
la thok zaw lo phat leh,
a ngawngkol chu la ngawng ah kipat in,
khen bong ta’n la,” a ti tai.
Esau Lungnatna’ Kipat Jakob Taimang
41Chutia, a pa’n a maljawl ziak ah chun Esau in Jakob chu a muda ma ma ta’n: ahi’n, Esau in a lungthim in, “Ka pa sûnna ding ni la a nai ta’n, zia phat chuleh ka nau Jakob chu that mai ing ka,” a ti’n.
42A chapa upa zaw Esau thugen chu a nu Rebekah kiang in a la gensawn tau ah; tichun, mi sawl in, a chapa neuzaw Jakob chu a ko ah, a kiang in, “Ngaitia, la u Esau in nangma hun tha gua’n a kithamuan hi.
43Ka chapa, ka thumang inla, kipan inla, Haran khua ka suapipa Laban kiang lam in tai mang in;
44la chung ah la u lungnatna a dai masia, zia tak ah chun ni bang jat a hem vaum phot mai in.
45La u lungnatna hi la chung ah a bei ah, a hetmil phat leh mi hun sawl ing ka tin, hung pui dawsak na’ng ka. Bang ziakin em la paniu ah ni khat thu ah ka hun chân khawm mai ding?” a ti’n.
Jakob Haran Lam Ah Sawlmangna
46Chun, Rebekah chun, Isak kiang in, “Hit numeite ziakin, hin hih ka chim ta luai: Jakob in zia gam nungak, zia tawhbang Hit chanute haw lak ah mi hi ji’n a hun nei kit nâk lai vang chun chu, kei â dingin hin hi bang phachuam ding a hem?” a tia.
اکنون انتخاب شده:
THILSIAM THU 27: VAIPBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.