Ex ni Pedro junil ni Ananías:
—¿Valiꞌiycha xtꞌaqnincha lakatin ni Satanás katanul la mijatapastakꞌati? Uxintꞌi ixmakꞌanupꞌutꞌun ni Espíritu Santo porke chꞌapamatꞌi lati xatapal mintꞌun. Tejkan jantukaꞌ istꞌay ni mintꞌun va minavin ixjunita. Mas tejkan stꞌatꞌicha vananaj minavin ixjunita xatumin. ¿Ex valiꞌiycha pꞌastꞌaktꞌi chuncha kamakꞌatꞌi? Uxintꞌi jantu ixjamakꞌanupꞌutꞌun yu valiꞌiy lapanakni, va Dios yu ixmakꞌanupꞌutꞌun.
Tejkan chuncha qasmaklhi ni Ananías ex nimancha tꞌuluj taqtalcha, va nilcha. Tachun ni lapanakni yu takꞌatsal va ayaj tatalhanal.