آیات محبوب کتاب مقدس از BiRomaŋ beŋ 12

به اشتراک گذاشتن

Baŋ niyɔ nɔŋ na biya bi ka dunia baŋ beŋ na. Kɛrɛ mɛkinaŋ Masaala na ba thikipa thathukuma thakendeŋ thaŋ, ka niya na masiyi mɛnɛ thathukuma thakendeŋ thaŋ thikipe wubunthu, ba kɔthɔ mathimo ma ka Masaala maŋ, bayɔhɔy, iŋ ba niŋ yeheŋ thukuma, iŋ bathankinuwɛ.

Huna mbɛndaŋ beŋ, ba saathɛ ba ka nkinikiniŋ ki ka Masaala kiŋ kɛntuŋ, yaŋ theteke bena: dunkunaŋ yɛthɛ bakendeŋ saraka bapethɔy ka Masaala, saraka ba dunkunɔkɔy ka wali nama baŋ, saraka ba niŋ yeheŋ thukuma, baa wuŋ, wuna gboŋa banɔndy ba beŋ niŋ ba niye kubatho baŋ.

Nɔŋ matute yima ndeŋ maŋ ma kɔsina bena ka mayehitɔkɔ, niyaŋ muyuŋ ka nambarɛŋ bakendeŋ baŋ e beŋ niya kuraminɛ timo tima.

Ba mɛyi ba banɛnɔy yina punka, kɛrɛ sɛkitha bayɔhɔy ba dekiye banɛnɔy baŋ.

Thimiyandeŋ mathimiyande matɔɔkɛ nɔŋ biya bi huwɛndiya ka Kraist e beŋ niyɔ iŋ kufiyo ku ka niyande yiki.

Thimiyandeŋ ka thathukuma. Thamboŋ ba thambo Masaala, e beŋ tɔpa bayɔhɔy.

Ka kufɛŋ kukɛnda, niya bɛy yo bɛy ba punke yi ba niya ba dɔŋitande ka mathɛbɛ iŋ biya fooma.

Nyathiki, ba tɛnkiniyɛ wɔ banɛnɔy. Pɛyɛna Masaala na ba yina tɛnkiniyɛ, baa magbali nama maŋ tepe, na “Yaŋ kɔŋ tɛnkɛŋ; yaŋ kɔŋ thunkuŋ; nanaŋ nɛna tepe Mariki woŋ.”

Niyaŋ wali wukahɛ-kahɛ, awa baŋ niyɔ bendo mayɛini; niyaŋ wali ba ka Mariki woŋ baŋ iŋ thathukuma thakendeŋ thaŋ fooma.

Awa ba saathɛ ba ka munkii mu ka makutiyɛ ma ka Masaala maŋ kiyaŋ muŋ, yaŋ tepe bena fooma: Baŋ siyiyɔkɔ wuyamɛ ba si beŋ ba siyiyeke. Kɛrɛ niyɔŋ bendo thathinɔkɔy ka masiyi. Wɔ yo wɔ konsiŋinekeŋ si lanɛya ba dunkune na Masaala.

Mɛnɛ wɔ ni yina banɛnɔy, ba niŋ tɛnkiniyɛ banɛnɔy. Dekiya ba niya ba simeke biya fooma ba bɛŋ niyɔ bayɔhɔy.

Niyaŋ wɔ yo wɔ bayɔhɔy wu ka iŋ mahakinande. Baŋ niyɔkɔ kaba, kɛrɛ yɛrɔkɔŋ ba niya waliŋ fooma thiyiyaŋ bayethitiyo baŋ fooma. Ba simɔkɔ ba yi niyɔ yindo kele wuŋ daŋande ba biya.

Saanuŋ beŋ ba thunkuna banɛnɔy ka banɛnɔy, niyaŋ nɔŋ na tepe magbali maŋ, na “Mɛnɛ hadeŋ wokɛnda kaho kɔnthɔ, thɛriyɛ niŋ; mɛnɛ wundɛ kaho kumbɛ, nkaa niŋ mandi; baa ka niya wuŋ, yi tute hɛrɛ hubuu ka yaha hukɛnama haŋ.”

Thiyiyɛ thaduba bi bena ni thɔrɔ beŋ. Thiyiyɛ bindɛ thaduba; baŋ bindɛ thiyiyɛ thadanka. Yehitɔkɔŋ iŋ bi yehitɔkɔ beŋ, e beŋ berina iŋ bi bereŋ beŋ.

Nkaa wu iŋ yi ntɔ nda woKristɛŋ wu panke wundɛ. Pɛtha yikiya bakɛnda ba thahinɛŋ biKristɛŋ.

Miŋ kiŋ iŋ ŋafɛŋ ŋabɔyɛ ka kɔtɔ koŋ, awa ŋafɛŋ ŋaŋ ŋaŋ fooma ŋa kiŋ iŋ waliŋ bahakuwande. Nɛna hɛlɛŋ miŋ; hali na miŋ mindo bɔyɛ na, miŋ kiŋ kɔtɔ kunthe ka tha banthe ka Kraist. Miŋ fooma mindo tɔyuwande nɔŋ ŋafɛŋ ŋahakuwande ka kɔtɔ kunthe koŋ.