If you would like a copy of this version please contact info@davaraudiobibles.org

Wagri New Testament

“सकोर रो, तमो मनका देकाड़वा ने हारू आपड़े दरम ने काम नकी करो, नीते तमो आपड़े हरग बाप हू कई बी फल नीं पाहो।
“तणी जेरे तु कणा जरूरत वालअ ने दान करे ते आपड़े पोता ने बड़ाई नकी कर, जेम कपटी मनका परातना घेरो नी गलजअ मा बिजअ मनका हू बड़ाई पावा ने हारू करे हे। मुँ तमय हू हासु कऊँ हूँ के, वा इनु फल पेले हूस पाई सुका हे। पण जेरे तु दान करे हे ते जी तारे जमणो आत करे हे, विने पतो तारे डावा आते बी नीं लागवो जुजे, ताकि तारे दान वगर डिटु रे। नी तमारे परम बाप जी तमो सानू करो हो वणाय जुए हे, वी तमय इने फल आलहीं।


“जेरे तु परातना करे ते, कपटी वजूने नकी कर। केमके वा मनकय देकाड़वा ने हारू परातना घेर मा नी वाट ने मोड़ मा ऊबू रेईनी परातना करवी वणय कईक बड़ीया लागे हे। मुँ तमय हू हासु कऊँ हूँ के, वा आपड़े हारू फल पाई सुका हे। पण जेरे तु परातना करे ते आपड़े कुटडी मा जा नी कमाड़ बन्द करीनी सानो आपड़े बाप हू परातना कर। तेरे पसे तारे बाप जी सानू मा किदू गियू कामे जुहीं, ते तय इनु फल आलहीं।
“जेरे तु परातना करे ते परमेसवर ने नीं जाणवा वाला ने वजूने बक बक नकी कर। केमके वा हमजी हे के, अमारे कईक बुलवा हू अमारे हबलजी जाहीं। तणी वणअ हरका नकी बणो, केमके तमारे परम बाप तमारे मागवा हू पेले जाणे हे के, तमारे जरूरत हूं हे। तणी तमो अणी तरह हू परातना करो,
“ ‘हे अमारे बाप, तु जी हरग मा हे।
तारे नाम पवितर मानजू जाए।
तारे राज आवे,
तारे मरजी जीवी हरग मा पुरी थाए हे, इमुस तरती माते बी पुरी थाए।
पुरा दाड़ा ने रूटा आज अमय आल।
नी जेम अमय अमारे अपराद करवा वाले माप किदा हे,
वणीस तरह हू अमय बी माप कर।
नी अमय एवी तागत आल के, अमय परकवा जावा हू सीटी राक,
नी बुराई हू वसाड़, केमके राज, तागत नी मईमा हर वला तारेस हे।’ आमेन।
“अगर तमो मनका ने पाप माप करहो, ते तमारे हरग बाप बी तमारे पाप माप करहीं। पण अगर तमो मनका ने पाप माप नीं करहो ते, तमारे हरग ने बाप बी तमारे पाप माप नीं करहीं।

“जेरे तमो एकाणू करो, ते मुडू लटकावीनी कपटीयो ने हरका नकी देको। केमके वा आपड़े मुडू बणावी राकी हे, ताकि मनका वणय एकाणा वाला जाणी हे। मुँ तमय हू हासु कऊँ हूँ के, वणय वणनू फल पेलेहुस मली सुकू हे। पण जेरे तु एकाणू करे ते आपड़े मुडू तुई दे नी मुड़ माते तेल लगाड़ीनी पोता ने अभिसेक कर। ताकि मनका नीं जाणे पण तारे बाप जी वगर डिटो हे, तय एकाणा वालो जाणे। पण तारे परम बाप जणाय तु जुई नीं हके हे, जुए के, तु एकाणू करी रेजो हे। तेरे तारे परम बाप जी हापीनी किदू गियू कामे जुए हे, तय इनु फल आलहीं।


“आपड़े हारू तरती माते धन वगलू नकी करो, जिय किड़ा नी किट वगाड़े हे नी सोर डाको दड़ीनी सुरी करी हके हे। पण आपड़े हारू हरग मा हासु धन वगलू करो, जिय नीते किड़ा, नीते किट वगाड़े नी नीते सोर डाको दड़ीनी सुरी करी हके हे। हुते राको, जिय तमारे धन हे विय तमारे मन बी लागेलू रेहीं।


“सरीर ने दिवो आक हे। अगर तारे आक हाऊ हे ते तारे पुरू सरीर उजाळा मा रेहीं। पण अगर तारे आक खराप थाई जाए ते, तारे पुरू सरीर अदारा मा थाई जाहीं। तणी जी उजाळू तय मा हे अगर यू अदारा मा थाई जाए ते वु अदारू कतरू गेहरू थाई जाए हे।


“कणु बी एक हाते बे मालिक ने सेवा नीं करी हके, केमके वी एक हू वेर नी बिजाहू परेम करहीं, या वी एक हू मलीनी रेहे नी बिजाय बेकार जाणहीं। तमो धन नी परमेसवर ने सेवा एक हाते नीं करी हको हो।
“मुँ तमय हू कऊँ हूँ, आपड़े जीव ने हारू ये सिनता नकी करो के, अमअ हूं खाहअ, नी हूं पीहअ, नी नीते आपड़े सरीर ने हारू हूं पेरहअ। हूं जीवन खावा हू नी सरीर लबरअ हू बड़ीनी नीं हे? जुओ, आकास मा उड़वा वालअ जनावर नीते पेरे हे, नी नीते कापे हे, नी नीते व कुटी मा दाणा परे हे, पण तमारे हरग ने बाप वणने पेट परे हे। हूं तमो वणहू वदारे खास नीं हो? तमय मा हू एवू कुण हे, जी सिनता करीनी आपड़े पुरा जीवन मा एक वला बी बढ़ावी हके हे?
“तमो लबरअ ने हारू हय सिनता करो हो? वगड़ा ने फुलअ माते तयान लगाड़ो के, व केम मुटअ थय हे, व नीते मेणत करी हे नी नीते आपड़े हारू लबरअ बणावी हे। मुँ तमय हू कऊँ के, राजा सुलेमान बी आपड़े हेता राज ने वेभव मा वणअ फुला ने रूपाळअ ने हरकअ लबरअ नीं पेरी हकजो। तणी जेरे परमेसवर मेदान ने सारेटू जी आज हे, नी काले बाली दिदू जाहीं, एवअ हबावे हे, ते हे थुड़ो विसवास करवा वाले मनको वी तमय हाऊ लबरअ केम नीं पेरावहीं?
“तणी सिनता करीनी यू नकी केवान के, ‘अमअ हूं खाहअ, हूं पीहअ नी हूं पेरहअ।’ केमके परमेसवर ने नीं जाणवा वाला अणी हेती सीज ने खोज मा रय हे, पण तमारे हरग ने बाप जाणे हे के, तमय अणी हेती सीजो ने जरूरत हे। तणी तमो पेले परमेसवर ने राज नी दरम ने खोज मा रो ते ई हेती सीजी तमय मली जाहीं। तणी काल ने सिनता नकी करो, केमके काल ने दाड़ो आपड़े सिनता पोते करी लीहीं। आज ने हारू आज ने दक कईक हे।

بشنويد मती 6