If you would like a copy of this version please contact info@davaraudiobibles.org

Lhomi New Testament

हुनी स्‍यक्‍पु धोबा च्‍यीक् ॱसोङ्‌नी, येशु खोङ् रोरङ् स्‍युस कफर्नहुम्‍ल लोक्‍न युङ बेत्। हुनी खोङ् उन लोक्‍न ॱलीत्‍तुक् सीरे केच्‍च्‍य हुगी मी घयेत् दीगी ॱह घोनी, हुदु खोङ् च्‍येल्‍ल मी गज्‍येन् जोम्‍न युङ बेत्। मी छेत्‍मीत् जोम्‍न युङ्‌नी, गोक्‍केक्‍की ॱये धङ् ॱयेल्‍ल आक् ॱमीत् ॱस्‍योङ् मेन्‍नक् झ्‍युङ बेत्। ॱनी हुगी मी घयेत् दील खोङ्‌गी ॱसुङ्‌रप्‍की केच्‍च्‍य ॱस्‍येप्‍प बेत्। ॱनी हुदु खोङ् झ्‍यीस्‍सल मी घोङ्‌रीय च्‍यीक् मीरङ् स्‍यीगी खुर्न युङ बेत्। युङ्‌नी, मी मङ् ढानी, येशुगी ॱस्‍यच्‍चल डो दीरङ् ॱमत् छुब बेत्। हुनी खीम् दीगी खङ्‌दोक्‍ल जेन खोङ्‌गी ॱसोरीनी मल्‍ल मीगोङ् पेक्‍न हुनी मल्‍ल घोङ्‌रीय दी तेन् दीदङ् डक्‍च्‍यक् ज्‍यो़न् ज्‍यो़ल्‍ल तङ बेत्। ॱनी हुबे छ्‌य स्‍यक्‍न हुन्‍दुक् झ्‍यीप्‍प दी येशुगी ॱह घोनी हुगी घोङ्‌रीय दील खोङ्‌गी ॱवे भीज, रङ्‌गी दीक्‍प घयेत् ह धक्‍सोङ् ॱसुङ बेत्। ॱनी उन जोम्‍न यो़प्‍पे छ्‌यो़डीम्‍गी चयेलम यरीबे येशुगी ढीक्‍ल हुगी घन्‍डल हुन्‍दुक् सीक्‍केन् बेक्‍क। हीगी केच्‍च्‍य हीगो को़न्‍ज्‍योक्‍ल ॱमो़म्‍बी़त् तोङ्‌गेङ्‌गी केच्‍च्‍यल डोगेन् बेत्। दीक्‍प धक्‍तु ची़त् छुगेन् को़न्‍ज्‍योक् मेन्‍द, ॱयोङ् ॱसु दी यो़प्‍प बेक्‍क? ॱनो़बे ॱसम्‍ल खुर बेत्। ॱनी हुबे ॱसीम्‍ल ॱनो़बे केच्‍च्‍य हुगो येशुगी थुल ॱस्‍यर्च्‍यक् ॱह घोनी खोङ्‌गी हुबल खीक्‍की घन्‍डल नुक्‍मे ॱसम्‍ल खुको़र्प्‍प। रङ्‌गी दीक्‍प धक्‍सोङ् सीर धङ् घोङ्‌रीयल लोङ्‌ल रङ्‌गी तेन् दी इक् खुर्ल छ्‌यम् सीर हीगो घङ्‌गो ले ॱल्‍हा बेक्‍क? कोलीमीगी ॱरेबुल जम्‍बुलीङ्‌दु दीक्‍प धक्‍तु ची़च्‍च्‍येमे ॱवङ् खुङ् यो़प्‍प खीत्‍रङ्‌गी ॱह घोज्‍ये यो़प्‍पल ङे तो़ङ्‌गी सीन्‍न घोङ्‌रीय दील रङ्‌ल ङ हीगो सीक्‍केन्। रङ् लोङ्‌ल रङ्‌गी तेन् दी इक् खुर्ल खीम्‍ल लोक्‍ल ज्‍युक् सीन्‍न ॱसुङ बेत्। हुनी घोङ्‌रीय दी कुरीक्‍की थोङल ॱहोक् लोङ्‌न रोरङ्‌गी तेन् दी खुर्न टप्‍नर बेत्। हुनी हुगी मी घयेत् दी गन्‍दीक्‍म ॱह लेन हीगो डस्‍सी झ्‍युङ एल्‍ला नम्‍ल अक् थोङ् ॱमत् ॱनोङ् सीन्‍न को़न्‍ज्‍योक्‍ल तो़प्‍प पुब बेत्।

हुनी यङ् येशु छो़ छीगनल फीन्‍नी, हुदु खोङ् च्‍येल्‍ल मी छेत्‍मीत् जोम्‍न युङ बेत्। ॱनी खोङ्‌गी हुब घयेत्‍ल ॱलोप्‍स ज्‍यप्‍न टेप्‍प बेत्। हुनी यङ् खोङ् फल्‍ल फीन्‍नी, अल्‍फयस्‍की भु लेवी सीक्‍केन् गोलदर् च्‍यीक् गोलदु दो़प्‍प ठेप्‍प बेत्। ॱनी हुल येशुगी ङे ॱलोप्‍टुक्‍ल ॱस्‍योक् सीन्‍न भो़ब बेत्। हुनी हुगो लोङ्‌न खोङ्‌दङ् दल टप्‍नर बेत्।
हुनी तीङ्‌ला हुगी लेवी दीगी रोरङ्‌गी खीम्‍दु येशु धङ् खोङ्‌गी ॱलोप्‍टुक् दीब स्‍यालक्‍ल भो़ब बेत्। ॱनी हुदु गोलदर् धङ् दीक्‍च्‍येन् ॱयोङ्‌म आक् गज्‍येन् भो़न सगीन् यो़प्‍प बेत्। घन्‍ड हीन् सीन्‍न उन येशुदङ् दल डोगेङ्‌गी मी गज्‍येन् यो़प्‍प बेत्। ॱनी फरीसी छ्‌योगी छ्‌यो़डीम्‍गी चयेलम यरीबे येशु उन गोलदर् धङ् दीक्‍च्‍येन् ॱयोङ्‌म घयेक्‍की मुल देत्‍न सम सय थोङ्‌नी, हुबे खोङ्‌गी ॱलोप्‍टुक् दीबल खोङ् घन्‍डल गोलदर् धङ् दीक्‍च्‍येन् ॱयोङ्‌म घयेत्‍तङ् कङ्‌ज्‍यीक्‍ल सम सगेन् बेक्‍क? सीन्‍न झ्‍यीब बेत्। ॱनी हीगो येशुगी ॱह घोनी खोङ्‌गी हुबल नेप्‍प घयेत्‍ल मेन्‍द, मी ज्‍याबोक्‍मल ॱमेम्‍बा मीत् गो़गेन् बेत्। ङ ॱनी छ्‌यो़डीम्‍ल चीगेन् मी ढङ्‌बु घयेत् भो़त्‍तु युङ मेम्‍ब, दीक्‍च्‍येन् घयेत् भो़त्‍तु युङ हीन् झ्‍यीब बेत्।

ॱनी युहन्‍ना बप्‍तीस्‍की ॱलोप्‍टुक् दीब धङ् फरीसी घयेक्‍की ॱलोप्‍टुक् घयेत् दीब ॱनुक्‍नेल स्‍युन दो़प्‍पे यङ्‌ल मी यरी येशु च्‍याल युङ्‌न हुबे खोङ्‌ल युहन्‍नागी ॱलोप्‍टुक् धङ् फरीसीगी ॱलोप्‍टुक् घयेत् ॱनुक्‍नेल स्‍युक्‍कुक्। ॱनी नीज्‍यरङ्‌गी ॱलोप्‍टुक् घयेत् हीब घन्‍डल ॱनुक्‍नेल मीत् स्‍युक्‍केन् बेक्‍क? सीन्‍न ढीब बेत्। ॱनी हीगी लेल्‍ल येशुगी भालीङ्‌गी यङ्‌ल मक्‍पे छ्‌यीट्‌टो घयेत् ॱनुक्‍नेल स्‍युक्‍को़प्‍प बेक्‍कक् ॱनी? मक्‍प हुबदङ् दल यो़स्‍स्‍यीङ् भोर्ल हुब घन्‍दुक् झ्‍यीन ॱनुक्‍नेल स्‍युक्‍केन्? नेम्‍बेत् ॱनाङ् मक्‍प हुबदङ् ढेबे धी़ दी ॱलीत्‍नी क, हुबल नङेन् फोक्‍न हुगी ङीङ्‌गी यङ्‌ल ॱनुक्‍नेल स्‍युक्‍केन् बेत्। मी ॱसी़ इक् घो़ घोक्‍पुल खोङ् डोगेङ्‌गी ॱल्‍हेम्‍ब मीत् ज्‍यक्‍केन् बेत्। खोङ् डोगेङ्‌गी ॱल्‍हेम्‍ब दीगी घो़ घोक्‍पु दी हरुङ् मङ्‌दु च्‍येत् तोङ्‌गेन् बेत्। मी ॱसी़ इक् पाबोक्‍की भेक्‍क घोक्‍पुल गोङ्‌ज्‍यङ् ॱसम्‍ब ॱमीत् ॱलुक्‍केन् बेत्। ॱलुक्‍न ॱनी, हुगो खो़न भेक्‍क दी भोङ् डोगेन् बेत्। हुनी गोङ्‌ज्‍यङ् दी इक् भो़त् डोगेन् बेत्। भेक्‍क दी इक् मीत्‍तल डोगेन् बेत्। गोङ्‌ज्‍यङ् ॱसम्‍ब भेक्‍क ॱसम्‍बलरङ् ॱलुक् गोगेन् बेत् सीन्‍न ॱसुङ बेत्।

हुनी ङीत्‍तुवे ङीन् च्‍यीक् येशुसो ढे घुङ्‌नी फक्‍की लम् च्‍यीक्‍ल फीम्‍ब बेत्। ॱनी डोये यङ्‌ल ॱलोप्‍टुक् दीबे ढे ॱही़ तोब बेत्। ॱनी फरीसी घयेक्‍की येशुल व तो़दे त। ङीत्‍तुवे यङ्‌ल हुन्‍दुक् झ्‍यीच्‍च्‍ये मीत् युङ्‌गेन् बेत् सीरे कल हुबे घन्‍डल ॱमीत् चीय हुन्‍दुक् झ्‍यीक्‍केन् बेक्‍क? सीन्‍न झ्‍यीब बेत्। ॱनी हुगी लेल्‍ल खोङ्‌गी धङ्‌बु दाऊद् धङ् दाऊद्‌गी दल यो़प्‍पे मी दीब ढोप्‍प तोन सम गो़सीगी यङ्‌ल हुबे घन्‍ड झ्‍यीब बेक्‍क खीक्‍की हुगो डोन ॱमत् तेब ॱनी? अबीयाथर् छ्‌यो़प्‍पो़न् चो छ्‌यीस्‍स्‍यो यो़प्‍पे यङ्‌ल खोङ् को़न्‍ज्‍योक्‍की सीङ्‌गङ्‌ल स्‍युन को़न्‍ज्‍योक्‍ल पुबे ढोप्‍ची घयेत् खोङ्‌जो़ डुन से तङ बेत्। हुनी रोरङ्‌गी दगु दीबल अक् बीन्‍न, हुबे एक् सेब बेत्। हुगो स्‍येन् छ्‌यो़प्‍पो़न् घयेक्‍की मेन्‍द, ॱयोङ्‌मागी सज्‍ये मीत् युङ्‌गेन् बेत् सीन्‍न ॱस्‍येप्‍प बेत्। हुनी खोङ्‌गी हरुङ्‌द हुबल हीन्‍दुक् ॱसुङ बेत्। ङीत्‍तुवे ङीङ्‌गी ढीक्‍ल कोलीमी सो़ब मेम्‍ब, कोलीमीगी ढीक्‍ल क ङीत्‍तुव दी सो़न स्‍यक्‍प बेत्। हुगो झ्‍यीनी, कोलीमीगी ॱरेबु ङीत्‍तुवे दक्‍पु उक् बेत् सीन्‍न ॱस्‍येप्‍प बेत्।

بشنويد मर्कुस् 2