Ioane 6
6
Kua Fafaga e Iehu he Kaifenua Tokalahi
(Mat 14.13-21; Mlk 6.30-44; Luk 9.10-17)
1Kua uma atu te mea tēnei, oi na fano ai ia Iehu ki tētahi itū o te Vaitūloto ko Kalilaia (pe, Vaitūloto o Tipelia, tētahi ona igoa). 2E tokalahi te kaifenua kua mulimuli atu kia te ia, ona na kitea e kilātou nā fakailoga na ia faia na fakamālōlō ai nā tauale. 3Oi na fano ai ia Iehu ki luga o he mauga, kua nofo ki lalo i kinā fakatahi ma ona hoko. 4I te taimi tēnā, kua tāli pa ki te Kaiga Fakamanatu o te Pāheka a nā tino Iutaia. 5I te kitea atuga e Iehu te tokalahi o nā tino kua ōmamai kia te ia, oi na fehili atu ai kia Filipo, kua vē atu, “Ko fea he mea e mafai ke fakatau mai ai ni falaoa e lava, ke fafaga ai nā tino uma iēnei?” 6(Na lea vēnā kia Filipo, ke kikila pe ka vēhea ake hana tali; kae ko te meamoni, kua uma te ia iloa o tana mea ka fai, ka ko hēki fehili ai.)
7Na tali mai ia Filipo, “E hē tāitai ke lava nā falaoa e mafai ke fakatau mai i te 200 tupe hiliva#6.7 tupe hiliva Ko te tupe hiliva e fokotahi, ko te totogi ia o te tino faigāluega fātoaga i te aho (kikila ki te Mat 20.2) ke maua ai he tamā mea ma nā tino tau toka tahi uma lele iēnei.”
8Kua lea atu foki kia Iehu tētahi o te kau hoko, ko Anitelea te uho o Himona Petelu, kua vē atu, 9“E iei he taumalo i kinei, e lima ana falaoa kālite#6.9 kālite he lākau e maua ai he itūkāiga haito e fakaaogā e nā tino mātitiva e fai ai a lātou falaoa ma he luagamata ika, kae e hē tāitai lele ke lava mo te tokalahi o nā tino iēnei.”
10Nae lahi te mutia nae ola i te mea tēnā, oi na vāgana atu ai ia Iehu ki ona hoko, “Fakanonofo nā tino ki lalo.” Oi na nonofo uma ai ki lalo nā tino; e tuha e lima afe ia tamāloa nae iei. 11Ma na tago ai ia Iehu ki nā falaoa, kua fakafetai ki te Atua, oi na fakahoa ai ki nā tino uma nae nonofo i kinā. Na fai vēnā foki e ia ki nā ika e luagamata, ma na lava lele ai ma totoe mo kilātou uma tau toka tahi. 12Kua mākokona uma kilātou, oi na vāgana atu ai ia Iehu ki ona hoko, “Fakaputu uma mai nā toegā meakai; nahe fakamāumaua lele he mea.” 13Oi na fakaputu uma ai e kilātou, ma e hefulu lua ia polapola lalahi na tūtumu i nā tōega mai nā falaoa kālite e lima na fafaga ai nā tino.
14Kua kitea e nā tino te fakailoga na fai e Iehu, oi na lea vē ai kilātou, “E hako lava ko te Pelofeta#6.14 te pelofeta kikila ki te 1.21 tēnei na tuku e hau ki te lalolagi!” 15Na hāfia e Iehu ko nā tino ka ōmamai oi kave fakamālohi ia ke fai ma o lātou tupu; oi na toe fano kehe ai, kua fano tautahi ki luga o he mauga.
Kua Havali ia Iehu i Luga o te Kilitai
(Mat 14.22-33; Mlk 6.45-52)
16Kua pa ki te fakaafiafi, oi na olo ai nā hoko o Iehu ki te vaitūloto, 17kua hohopo ki luga o he vaka, ma na olo ai ki tētahi itū o te vai āgai atu ki Kapenaumi. Kua pō ifo lava kae ko hēki hau lava ia Iehu kia te kilātou. 18I te taimi tēnā, ko te matagi kua kāmata oi agi mālohi, ma kua hou te vai. 19Pe kua kātoa he tolu pe he fa maila ki gātai te mamao o te mea kua aloalo ki ei to lātou vaka, oi na kitea ai e kilātou ia Iehu e havali i luga o te kilitai ma kua pili mai ki te vaka, ma na mātataku lele ai kilātou. 20“Koutou nahe mātataku, ko au tēnei,” na vāgana mai ai ia Iehu ki ona hoko. 21Oi na fakahopo ake ai e kilātou ia Iehu ki luga o te vaka ma o lātou loto kua tumu i te fiafia, ma na hēki mataloa kae taunuku loa te vaka ki te mea na olo kilātou ki ei.
Kua Hakili ia Iehu e Tagata
22I te aho na hohoko ai, na manatua ai e te kaifenua nae nonofo i te itū i hahae o te vai, e fokotahi oioti te vaka nae i kinā. Na iloa e kilātou ko Iehu e hēki olo fakatahi i te vaka ma ona hoko, kae nā ko ona hoko oioti te na olo. 23Ka ko iētahi vaka mai Tipelia, na tau ake ki he koga nae tafapili ki te mea na kakai ai te kaifenua i nā falaoa, i te kua uma ai oi fai te fakafetai e te Aliki. 24Kae i te kitea atuga e nā tino ko Iehu kua hē i kinā vēnā foki ma ona hoko, oi na toe hohopo ai ki luga o nā vaka, ma na olo ai ki Kapenaumi oi hakili ia Iehu.
Ko Iehu te Falaoa o te Ola
25I te maua atuga e kilātou o Iehu i tētahi itū o te vaitūloto, oi na lea vē atu ai kilātou kia te ia, “Te Faiākoga, ko koe na hau anafea ki kinei?”
26Na tali mai ia Iehu, “E takutino atu e au kia te koutou te meamoni; ko au e koutou hakilia ona ko koutou na kakai mākokona i nā falaoa, kae hē ona ko koutou kua mālamalama i nā fakailoga na fai e au. 27Koutou nahe gālulue mo nā meakai e pala; kae gālulue mo nā meakai e tūmau pea lava te lelei, ma e maua ai te ola e hēgata. Ko nā meakai iēnei ka fōki atu kia te koutou e te Ataliki o te Tagata, auā kua ia te ia te fakatagaga mai te Atua te Tamana.”
28Oi na lea atu ai kilātou kia Iehu, “Heā nei te tatau ke kimātou faia, ke fakatāunuku ai nā mea e fofou ki ei te Atua?”
29Na tali mai ia Iehu, “Ko te mea e fofou ki ei te Atua, ko koutou ke talitonu ki tē na ia uga maia.”
30Kua lea atu kilātou, “Heā he fakailoga e kē mafaia oi fai ke kikila kimātou ki ei, kae ke talitonu atu ai kimātou kia te koe? Heā te kē mafaia oi fai? 31Na kakai o mātou tupuna i te mānai i te vao, e vē ona tākua i te tuhituhiga paia, ‘Na fōki e ia kia te kilātou nā falaoa mai te lagi ke kakai ai.’ ” #Eho 16.4, 15; Hal 78.24
32Oi na vāgana atu ai ia Iehu kia te kilātou, “E takutino atu e au kia te koutou te meamoni, ko te mea na fōki atu e Mohe kia te koutou e hē ko te falaoa mai te lagi; ko toku Tamana te ia fōki atua kia te koutou, te falaoa moni mai te lagi. 33Auā ko te falaoa e fōki atu e te Atua ko ia tēnā e fanaifo mai te lagi ma fōki atu te ola ki te lalolagi.”
34“Te aliki,” na lea atu ai kilātou kia te ia, “fōki mai kō te falaoa tēnā kia te kimātou i taimi uma!”
35Na tali mai ia Iehu, “Ko au ko te falaoa o te ola. Ko nā tino e ōmamai kia te au, e hē toe fia kakaia lele; ko nā tino e talitonu mai kia te au, e hē toe fia inua lele. 36E vē ona lea atu au, kua koutou kitea au, ka ko koutou e hē fia talitonu. 37Ko nā tino uma lele e fōki mai e toku Tamana kia te au, e ōmamai lava kia te au. E hē kō tetekea lele he tino e hau kia te au, 38auā ko au e hēki fanaifo mai te lagi ke fai te mea e loto au ki ei, kae ke fakatāunuku te finagalo o tē na ia uga maia au. 39Ma ko te finagalo o tē na ia uga maia au, ke nahe kō faia he mea ke māumau ai he ola o he tino o kilātou uma kua ia fōki maia kia te au, kae ke kō fakatutūa uma kilātou ki te ola, i te aho mulimuli.#6.39 aho mulimuli Kāfai e fakamahino e te Atua ia tagata uma 40Auā ko te mea e fofou ki ei toku Tamana, ko nā tino uma e kilātou talia te Ataliki ma talitonu kia te ia, ke maua e kilātou te ola e fakavavau. Ma ka kō fakatutūa kilātou ki te ola, i te aho mulimuli.”
41Oi na kāmata ai kua mūimui ia e tagata Iutaia, ona na lea vē, “Ko au ko te falaoa na fanaifo mai te lagi.” 42Kua lea vē kilātou, “E hē ko Iehu nei tēnei te ataliki o Iohefa, ko ona mātua e iloa uma e kitātou? Kae e vēhea la ona lea ko ia na fanaifo mai te lagi?”
43Na tali atu ia Iehu kia te kilātou, “Koutou nahe mūimui. 44E hē mafai nā tino ke ōmamai kia te au, vaganā e takitaki mai kia te au e te Tamana, tē na ia uga maia au; ma e kō fakatutūa kilātou ki te ola, i te aho mulimuli. 45Na tūhia e nā pelofeta, ‘Ko tagata uma ka akoako e te Atua.’ Ko nā tino uma e fakalogo ki te Tamana ma maua ho lātou akoakoga mai ia te ia, e ōmamai kia te au. #Iha 54.13 46E hē vē la e iei he tino na kua ia kiteagia te Tamana; ko tē e hau mai i te Atua, ko ia oioti lava te kua ia kiteagia te Tamana. 47E takutino atu e au kia te koutou te meamoni; ko ai lava he tino e talitonu, ka maua e ia te ola e fakavavau. 48Ko au ko te falaoa o te ola. 49Na kakai nā tupuna o koutou ki te mānai i te vao, kae na feoti. 50Ka ko te falaoa e fanaifo mai te lagi, e kehe, ma ko ai lava e kai ki ei, ka hē oti lele. 51Ko au ko te falaoa o te ola na fanaifo mai te lagi. Kāfai koutou e kakai ki ei, e maua e koutou te ola e fakavavau. Ko te falaoa ka fōki atu e au, ko toku kakano, e fōki atu kae ke fakaola ai te lalolagi.”
52Oi na kāmata ai kua tauaikupu nā tino Iutaia, ma lea vē, “E vēhea ona fōki mai e te tagata nei tona kakano ke kai e kitātou?”
53Oi na vāgana atu ai ia Iehu kia te kilātou, “E takutino atu e au kia te koutou, kāfai e hē kakai koutou ki te kakano o te Ataliki o te Tagata, ma inu ki tona toto, ka hē ia te koutou te ola. 54Ko nā tino e kakai ki toku kakano ma inu ki toku toto, e maua e kilātou te ola e fakavavau, ma e kō fakatutūa kilātou ki te ola, i te aho mulimuli. 55Auā ko toku kakano ko te meakai moni ia, ma toku toto ko te vai inu moni ia. 56Ko nā tino e kakai ki toku kakano ma inu ki toku toto, e tūmau kilātou ia te au, ma au ia te kilātou. 57Ko te Tamana te puna o te ola, tē na ia uga maia au, ma ko au e ola ona ko ia. E vēnā foki la ona ola ho he tino e kai ki toku kakano, ona ko au. 58Tēnei la te falaoa na fanaifo mai te lagi; e hē vē ko te falaoa na kai e nā tupuna o koutou, kae mulimuli ake na feoti. Ko nā tino e kakai ki te falaoa tēnei, ka ola pea lava.”
59Na lea ia Iehu i nā mea iēnei, i tana akoakoga nae fai i loto o te hūnako i Kapenaumi.
Ko nā Kupu e Maua ai te Ola e Fakavavau
60Ko te tokalahi o tagata nae mulimuli kia Iehu, na kilātou lagona atu te mea tēnei, oi lea vē ai, “Kai te faigatā ātili o tēnei akoakoga; ko ai nei te mafai e ia oi talia?”
61Kae kua uma te iloa e Iehu o te mea nae mūimui ai kilātou. Oi na vāgana atu ai kia te kilātou, “Ko koutou nei la ka fakavāivai ona ko te mea tēnei? 62E vēhea nei la kāfai kua koutou kitea atu te Ataliki o te Tagata, kua toe fanake ki luga ki te mea nae iei ai muamua? 63Ko te Agaga o te Atua te maua ai te ola; ko te mālohi o te tagata e matuā hēai lava he aogā. Ko nā kupu kua tautala atu ai au kia te koutou, e maua ai e koutou te ola mai te Agaga o te Atua. 64Kae ko iētahi o koutou e hē talitonu.” (Na iloa e Iehu mai te kāmataga nā tino ka hē talitonu ake kia te ia, ma te tino ka ia fakalatagia ia.) 65Ma na toe lea vē atu foki, “Ko te māfuaga tonu lava tēnei na lea atu ai au, e hēai ni tino e mafai ke ōmamai kia te au, vaganā e uga mai e te Tamana.”
66Ona ko te mea tēnei, na holomuli ai te tokalahi o kilātou nae mulimuli kia Iehu, kua hē toe mulimuli ki ei. 67Oi na fehili ai atu ia Iehu ki te kau hoko e toka hefulu lua, “Ka ko koutou—e fia olo kehe foki koutou?”
68Na tali mai ia Himona Petelu, “Te Aliki, ko kimātou e olo kia te ai? E ia te koe nā kupu e maua ai te ola e fakavavau.#Mat 16.16; Mlk 8.29; Luk 9.20 69Ma i te taimi nei, e talitonu kimātou ma e iloa e kimātou ko koe ko te Tokatahi Paia kua hau mai te Atua.”
70Na tali atu ia Iehu, “E hēki kō filifilia nei te toka hefulu lua o koutou? Kae ko tētahi o koutou ko he tiāpolo.” 71Ko Iehu nae tautala e uiga kia Iuta, te ataliki o Himona Ihikaliota. E ui lava ko Iuta ko hētahi o te toka hefulu lua, kae ka fakalata e ia ia Iehu.
Právě zvoleno:
Ioane 6: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust
