Ioane 5
5
Ko te Fakamālōlōga i te Vaitākele
1Kua uma atu te mea tēnei, oi na fano ai ia Iehu ki Ieluhalema, ki hētahi o kaiga fakamanatu a tagata Iutaia.#5.1 kaiga fakamanatu a tagata Iutaia ko te Kaiga Fakamanatu o te Pāheka pe ko te Kaiga Fakamanatu o nā Fakamalumalu 2I tafa o te Alapupuni o Māmoe i Ieluhalema, nae iei ai he vaitākele e lima ona poletito, ko Petehata#5.2 Petehata Ko iētahi tuhituhiga tuai e leamai Peteha ma iētahi Petehaita te igoa i te gagana Epelu. 3-4E tokalahi lele nā tauale nae tākokoto i nā poletito—ko nā tāuaho, nā pipili, ma nā tino nae mate ni vāega o nā tino o kilātou.#5.3-4 Ko iētahi tuhituhiga e fakaopōpo ki ei te fakakupuga: Nae fakatalitali ki te taimi e hakeu ake ai te vai, auā nae iei nā taimi nae fanaifo ai he āgelu a te Aliki oi hakeu ake te vai. Ko te tauale lava e mua ki loto o te vai kāfai e hakeu ake, e mālōlō i ho he tauale e maua ai 5Nae iei i kinā he tamāloa kua kātoa te tolu hefulu valu tauhaga talu te tauale. 6Na kitea atu e Iehu e takoto mai, ma na ia iloa foki kua mataloa lele tona tauale; oi na fehili atu ai ki ei, “E fofou koe ko koe ke mālōlō?”
7Na tali mai te tauale, “Te aliki, e hēai he tino i kinei ke ia tuku ifoa au ki loto o te vaitākele kāfai te vai e hakeu ake; kāfai au e taumafai ifo ki loto, e hau lava hētahi tino oi mua ifo ia ki loto.”
8Oi na vāgana atu ai ia Iehu ki ei, “Tū ki luga, hiki tō moega ma havali.” 9Ko te taimi lava tēnā na mālōlō ai te tamāloa; na hiki ake ai loa tona moega ma kāmata oi havali.
Ko te aho na tupu ai te mea tēnei ko he Hāpati, 10oi na lea atu ai nā takitaki Iutaia ki te tamāloa na fakamālōlō i tona tauale, “Ko he Hāpati te aho tēnei, ma e fakahā i te tātou Tūlāfono ke hiki te moega o koe.” #Nem 13.19; Iel 17.21
11Kae na tali mai te tamāloa, “Ko te tino na ia fakamālōlōa au, na lea mai ke hiki ki luga toku moega ma havali.”
12Kua fehili atu kilātou kia te ia, “Ko ai te tino na lea atu ke fai e koe he mea vēnā?”
13Kae ko te tamāloa tēia na fakamālōlō nae hē ia iloa ia Iehu, ona kua tumu lele atu ia tagata ki kinā, ma ko Iehu kua fano kehe.
14Mulimuli ake, na maua e Iehu te tamāloa i te Mālumalu ma na vāgana atu ai ki ei, “Fakalogo lelei mai, ko koe kua mālōlō, nahe kē toe faia la te agahala, auā e i nā tupu hētahi mea kia te koe e hili atu te kino.”
15Oi na fano ai te tamāloa kua lea ki nā takitaki Iutaia, ko Iehu te tino na ia fakamālōlōa ia. 16Oi na kāmata ai loa ia fakahāuāga a nā takitaki o Iutaia kia Iehu, ona na ia fakamālōlōa he tino i te Hāpati. 17Kae na tali atu ia Iehu kia te kilātou, “Ko toku Tamana e galue pea lava, ma ko au foki la e tatau lava ke galue.”
18Ko nā kupu iēnei a Iehu na ātili ai lava te fia tāmate ki ei o nā takitaki Iutaia. Ona kua hē gata i te ia holia o te tūlāfono o te Hāpati, kae na lea foki ko tona Tamana ko te Atua, ma kua fakatutuha ai ia ma te Atua.
Ko te Pule a te Ataliki
19Oi na vāgana atu ai ia Iehu kia te kilātou, “E takutino atu e au kia te koutou te meamoni; e hē mafai e te Ataliki ona fai he mea nā ko ia; kae e ia faia oioti nā mea e ia kitea e fai e tona Tamana. Ko te mea lava e fai e te Tamana, e fai foki e te Ataliki. 20Auā ko te Tamana e alofa ki te Ataliki, ma e fakailoa e ia ki ei nā mea uma a ia e fai. Ka fakailoa e ia ki ei nā mea e hili atu te ofōfogia i lo nā mea iēnei, ma ka taufai ofo uma ai koutou. 21E vē ona fakatutū e te Tamana nā tino kua oti ma fōki ki ei te ola, e vēnā foki ona fōki atu e te Ataliki te ola, ki nā tino e loto ia ke kilātou maua. 22E hē fakamahinoa foki e toku Tamana he tino. Kua fōki e ia ki tona Ataliki te pule kātoa ke fakamahino ai, 23kae ke vīkia ai e tagata uma te Ataliki e vē oi vīkia e kilātou te Tamana. Ko te tino e hē ia vīkia te Ataliki, e hē ia vīkia foki te Tamana na ia uga maia te Ataliki.
24“E takutino atu e au kia te koutou te meamoni; ko nā tino e fakalogo ki taku kupu ma talitonu ki tē na ia uga maia au, ka maua e kilātou te ola e fakavavau. E hē fakamahinoa kilātou, kae kua teka atu kilātou mai te oti ki te ola. 25E takutino atu e au kia te koutou te meamoni; e hau te taimi—kua i kinei te taimi tēnā—ka lagona ai e tagata kua feoti te leo o te Ataliki o te Atua, ma ko nā tino e fakalogo ki ei, ka ola kilātou. 26Auā ko te Tamana lava ia te puna o te ola, ma kua vēnā foki oi kavea e ia tona Ataliki ke fai ma puna o te ola. 27Kua tuku atu foki e te Tamana ki te Ataliki, te pule ke ia fakamahinoa ai ia tagata uma, auā ko ia ko te Ataliki o te Tagata. 28Koutou nahe tēteki i te mea tēnei! E hau te taimi ka lagona ai e tagata uma kua i te tugamau, te leo o te Ataliki o te Tagata, 29ma ōake ai ki luga mai o lātou tugamau. Ko kilātou nae faia nā mea lelei, ka fakatutū ma fakaolagia, ka ko kilātou nae faia nā mea kino, ka fakatutū ma fakahalagia. #Tan 12.2
Ko nā Tino na Molimau e Uiga kia Iehu
30“E hēai he mea e kō mafaia i haku pule tautahi; e kō fakamahinoa e vēia ona fakatonu mai ai au e te Atua. Ko taku fakamahinoga la e tonu, auā ko au e hē taumafai ke fai te mea e fofou au ki ei, kae nā ko te mea e fofou ki ei tē na ia uga maia au.
31“Kāfai au e molimau kia te au lava, ko nā kupu e tautala ai au e hē mafai ke fakamāonia. 32Kae e iei te tino e molimau e uiga kia te au, ma e iloa e au ko tana molimau e hako. 33Ko Ioane te tino na uga e koutou ki ei nā kavefekau, ma na molimau ia ki te meamoni. #Ioa 1.19-27; 3.27-30 34E hē vē la e manakomia e au te molimau a he tino; kae ko au kua lea atu vēnei, kae ke fakaola ai koutou. 35Ko Ioane nae vē ko he mōlī e mumū ma huhulu atu, ma nae fiafia koutou i he vāitaimi, ki tona mālama. 36Kae e iei te molimau e uiga kia te au e hili atu i lo te molimau na fai e Ioane: ko nā mea e fai e au, pe ko nā gāluega na tuku mai e toku Tamana kia te au ke fai, e molimau kia te au ma fakailoa ai ko te Tamana te na ia uga maia au. 37Ma ko te Tamana na ia uga mai au, e molimau foki kia te au. E hēki lagona lele e koutou tona leo, pe kitea e koutou ona fōliga, #Mat 3.17; Mlk 1.11; Luk 3.22 38ma e hē teua i outou loto tana kupu, auā ko koutou e hē talitonu ki tē na uga maia ia. 39E hukehuke koutou ki nā Tuhituhiga Paia ona e vēake koutou, ko te mea ia ka maua ai e koutou te ola e hēgata. Ko nā Tuhituhiga Paia foki lava iēnei te molimau e uiga kia te au, 40kae e hē fia ōmamai lava koutou kia te au, kae ke maua ai e koutou te ola.
41“Ko au e hē fofou ki ni vīkiga mai tagata. 42Kae e iloa e au te itūkāiga tagata e iei koutou, ma e iloa e au e hē i outou loto he alofa ki te Atua. 43Kua hau au ma te pule a toku Tamana, kae hē koutou talia au; kae kāfai hētahi tino e hau i tana lava pule, e talia e koutou. 44E fofou koutou ke maua ni vīkiga o tētahi mai tētahi, kae e hē taumafai lele koutou ke koutou maua te vīkiga, e nā ko te Atua lava oioti te maua mai ai. E mafai vēhea la ke talitonu mai koutou kia te au? 45Koutou foki nā vēakē, ko au te mōliagia koutou ki toku Tamana. Ko Mohe, tēia kua tuku kātoatoa ki ei te koutou fakamoemoe, ko ia lava te ka ia mōliagia koutou. 46Kana he mea na talitonu koutou kia Mohe, na talitonu mai foki koutou kia te au, auā na tūhia e Mohe e uiga kia te au. 47Kae kāfai koutou e hē talitonu ki ana tuhituhiga, e vēhea la ona talitonu mai koutou ki nā kupu e tautala atu ai au?”
Právě zvoleno:
Ioane 5: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust
