Ioane 7
7
Ko Iehu ma Ona Taina
1Kua uma atu te mea tēnei, oi na faimalaga ai lava ia Iehu i loto o Kalilaia; na hēki fofou ke fano ki Iutea, ona ko ia nae hakili e nā takitaki Iutaia i kinā, ke tāmate. 2Kua tāli pa ki te Kaiga Fakamanatu o nā Fakamalumalu a nā tino Iutaia,#Lev 23.34; Teu 16.13 3oi na lea atu ai nā uho o Iehu kia te ia, “Fano kehe ma kinei. Fano ki Iutea kae ke kitea e nā tino e mulimuli atu kia te koe, nā gāluega a koe e fai. 4Auā e hēai he tino e ia mumunia ana gāluega e fai, pe kāfai e fofou ke iloa lelei ia e tagata. Kāfai ko nā mea iēnei e fai e koe, fakailoa la ki te lalolagi kātoa, kae ke iloa ai koe e tagata!” 5(E pa foki lava ki ona uho, na hēki talitonu kia te ia.)
6Na vāgana atu ia Iehu kia te kilātou, “Ko te taimi o oku ko hēki pa mai. Kae mo koutou, ho he taimi lava e lelei. 7Ko te lalolagi e hē inoino atu kia te koutou, kae e inoino mai kia te au, auā ko au e molimau ki te kino o ana gāluega e fai. 8Olo koutou ki te Kaiga Fakamanatu. Ko au e hē fano#7.8 Ko au e hē fano ko iētahi tuhituhiga e lea mai Ko hēki pa ki te taimi e fano ai au auā ko hēki pa ki toku taimi.” 9Na lea vēnā atu ia Iehu, oi na nofo ai lava i Kalilaia.
Kua Fano ia Iehu ki te Kaiga Fakamanatu o nā Fakamalumalu
10Kua olo nā uho o Iehu ki te Kaiga Fakamanatu, oi na fano ai foki ia Iehu ki ei, kae na hēki fakailoa lele ki he tino. 11Ko nā takitaki Iutaia nae kilātou hakilia ia Iehu i te Kaiga Fakamanatu, kua lea vē, “E i fea te tagata nei?”
12Nae tautalatala muhumuhu te tokalahi o nā tino, e uiga kia Iehu. Na lea vē iētahi, “Ko Iehu he tino lelei,” kae lea iētahi, “Hēai, e fakahehē e ia ia tagata.” 13Kae na hēki iei he tino na fia tautala leo lahi, ona nae mātataku i nā takitaki Iutaia.
14Pe kua teka te āfa o nā aho o te Kaiga Fakamanatu, oi na fano ai ia Iehu ki te Mālumalu, kua akoako atu ki tagata. 15Na ofo lele nā takitaki Iutaia ma na lea vē ai, “E vēhea ona iloa e te tagata nei te lahi o nā mea iēnei, kae ko he tino e hēki pa lele ki ni akoakoga?”
16Na tali atu ia Iehu kia te kilātou, “Ko nā mea e akoako atu e au, e hē āku, kae e hau mai te Atua, tē na ia uga maia au. 17Ko ai lava e fiafia oi fai te mea e fofou ki ei te Atua, ka ia iloa pe ko taku akoakoga e hau mai te Atua, pe hau lava i taku pule. 18Ko te tino e tautala i tana lava pule, e ia hakilia ni ona lava vīkiga. Ka ko te tino e ia hakilia he vīkiga mo tē na ia uga maia ia, e hako lava ia, ma e hēai he mea e fokotahi e hehē ai. 19E hē ko Mohe nei te na ia tuku atua te Tūlāfono kia te koutou? Kae e hēai lele he tino o koutou e uhitaki ki te Tūlāfono. Heā la te taumafai ai koutou ke tāmate au?”
20“Ko koe e ulufia e he tēmoni,” na lea vēnā mai te kaifenua. “Ko ai te taumafai ke ia tāmatea koe?”
21Na tali atu ia Iehu, “Na fai e au te mea ofōfogia e fokotahi, ma na ofo uma ai koutou. 22Na fakatonu koutou e Mohe ke pelitome nā ataliki o koutou (e ui lava e hē ko Mohe, kae ko nā tupuna o koutou te na kilātou kāmatagia), oi na pelitome ai e koutou he taumalo i te Hāpati. #Ken 17.10; Lev 12.3 23Kāfai he taumalo e pelitome i te Hāpati kae ke nahe holia ai te Tūlāfono a Mohe, aiheā la te ita tauānoa mai ai koutou ona na kō fakamālōlōa te tino kātoa o he tamāloa i te Hāpati? #Ioa 5.9 24Nahe faia te fakamahinoga a koutou fua ki nā mea e kitea i nā mata, kae fua ki te mea e tonu.”
Kua Fehilihili ia Tagata pe ko Iehu nei ko te Mehia?
25Ko iētahi tino i Ieluhalema kua lea vē, “E hē ko te tamāloa nei tēnei te taumafai nā takitaki o Iutaia ke tāmate? 26Kae kikila atu, e tautala i mua tagata, ma e hēai lele he lātou tala e fai kia te ia! Pe ona nei e kilātou iloa lelei lava ko ia ko te Mehia? 27Kāfai te Mehia e hau, e hēai lele he tino e ia iloa pe hau mai fea. Ka ko te tagata tēnei, e iloa uma lele e kitātou te mea e hau ai.”
28Ka koi akoako atu ia Iehu i te Mālumalu, na lea leo lahi lele ai ma vē atu, “Oi, e koutou iloa au ma te mea e hau ai au, ni? Ko au e hēki hau i haku pule. Kae ko tē na ia uga maia au, e fakamāoni. E hē koutou iloa ia, 29kae e kō iloa, auā ko au na hau mai ia te ia, ma na ia uga maia au.”
30Oi taumafai ai kilātou ke puke ia Iehu, kae e hēki iei he tino na pa ki ei tona lima, auā ko tona taimi ko hēki pa mai. 31Kae na tokalahi nā tino i te kaifenua na talitonu kia te ia ma lea vē, “Kāfai te Mehia e hau, e i na ka lahi atu nei nā fakailoga e ia faia i lo te tagata tēnei?”
Kua Uga nā Fitafita ke Puke ia Iehu
32Kua lagona e nā Falehaio nā mea nae tautatala muhumuhu ai nā tino e uiga kia Iehu, oi na fakatonu ai e kilātou ma nā ohitāulaga pule ni fitafita, ke puke ia Iehu. 33Oi na vāgana atu ai ia Iehu, “Ko au ka fakatahi ma koutou mo he taimi, oi ka fano ai au ki tē na ia uga maia au. 34Ka koutou hakilia au, kae ka hē koutou maua au, auā e hē koutou mafaia oi olo ki te mea ka iei ai au.”
35Kua fakataufai nā takitaki Iutaia ma na vē atu ai tētahi ki tētahi, “Ko fea nei te mea ka fano ki ei te tagata nei kae ke nahe maua ai ia e kitātou? E i na ka fano nei ki nā kakai i Eleni, nā mea kua takape ki ei o tātou tagata, ma akoako atu ki nā tino e nonofo ai. 36Heā te uiga o tana tala na fai e vē, ‘Ka koutou hakilia au, kae ka hē koutou maua au,’ ma, ‘E hē koutou mafaia oi olo ki te mea ka iei ai au?’ ”
Nā Vaitafe o te Vai e Maua ai te Ola
37I te toe aho, ma ko te aho ia e hili ona tāua i nā aho o te Kaiga Fakamanatu, na tū ai ki luga ia Iehu oi tautala leo lahi vē atu, “Ko ai lava he tino e fia inu, hau kia te au, ma #Lev 23.36 38ko ai lava e talitonu mai kia te au, e tatau ke inu. E vē ona tūhia i te tuhituhiga paia, ‘Ko nā vaitafe o te vai e maua ai te ola, e tafe mai ki fafo i tona fatu.’ ”#7.38 Ko nā kupu a Iehu i nā fuaikupu 37-38 e mafai ke fakaliliu vē: “Ko ai lava he tino e fia inu, hau kia te au oi inu. 38 E vē ona tūhia i te tuhituhiga paia, ‘Ko nā vaitafe o te vai e maua ai te ola, e tafe mai i loto o ho he tino e talitonu mai kia te au.’ ” #Ehk 47.1; Hkl 14.8 39Ko te kupu tēnei a Iehu na fai fakatatau ki te Agaga Paia, tēia na tuku e maua e nā tino kua talitonu. I te taimi tēnā, ko hēki tuku atua e te Atua te Agaga Paia, auā ko Iehu ko hēki fakaeketia ki tona mamalu.
Kua Fekehekeheaki ia Tagata
40Ko iētahi tino i te kaifenua na kilātou lagona nā kupu iēnei a Iehu, kua lea vē, “E hako lava, ko te tagata tēnei ko te Pelofeta!”#7.40 pelofeta Kikila ki te 1.21
41Ko iētahi na lea vē, “Ko te Mehia tēnei!”
Ka ko iētahi kua lea vē, “E mafai te Mehia ke hau mai Kalilaia? 42E lea mai te tuhituhiga paia, ko te Mehia ka tupuga mai i te Tupu ko Tavita, ma ka fānau mai i Peteleema, te kakai nae nofo ai ia Tavita.”#2 Ham 7.12; Mik 5.2 43Ko te mea ia na fekehekeheaki ai te kaifenua, ona ko Iehu. 44Ko iētahi o kilātou, na fofou ke kilātou pukea ia Iehu, kae e hēai he tino na pa tona lima kia te ia.
Ko te hē Talitonu o Takitaki o Iutaia
45I te toe liliuga o nā leoleo, oi na fehiligia ai kilātou e nā ohitāulaga pule ma te kau Falehaio. Kua lea vē atu kilātou, “Heā te hēki koutou kaumaia ai ia Iehu?”
46Na tali mai nā leoleo, “E hēki iei lele he tino na kua tautala e vē ko te tino tēnei!”
47“Kua fakavalea foki koutou e ia, ni?” na lea vēnā atu ki ei te kau Falehaio. 48“E koutou iloa pe na kua iei he takitaki e fokotahi o Iutaia, pe he Falehaio, e talitonu kia te ia? 49Ko te kaifenua tēnei, e hē kilātou iloa he mea e uiga ki te Tūlāfono a Mohe. Kae e hē āfāina meamanū kua fakamālaiagia kilātou.”
50Ko hētahi o te kau Falehaio nae i kinā, ko Nikotemo. Ko ia tēnei te na fano oi kikila ia Iehu, i he taimi i mua atu. Kua lea vē atu ia Nikotemo ki iētahi o ona hoa,#Ioa 3.1-2 51“E tuha ai ma a tātou tūlāfono, e hē kitātou mafaia oi fakahala ni tino ka ko hēki fakalogo kitātou ki ni a lātou fakamatalaga, ma kitātou iloa ai pe heā ta kilātou na fai.”
52Na tali mai kilātou, “Ko koe foki e hau mai Kalilaia ni? Hukehuke ki nā Tuhituhiga Paia, oi kē iloa ai e hēai lele he pelofeta e hau mai Kalilaia.”#7.52 e hēai lele he Pelofeta e hau mai Kalilaia E fokotahi te tuhituhiga e lea mai: ko te Pelofeta ka hē hau mai Kalilaia
Ko te Fafine na Maua e Mulilua
[ 53Ma na fano ai lava te tino ki tona fale,
Právě zvoleno:
Ioane 7: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust
