MARK 6

Najareth Asor Jisu Aphan Kechakche Alam

(Mat 13.53-58; Luk 4.16-30)

1Jisu hadak pen nangbarsi amethang arong chevang-lo, lapen asangho atum alangli long dunlo. 2Sabbath Arni alangli sinagog along lam kethanji pangcheng-lo. Hadak monit do-olo, lapen alangli kethan alam arjulongsi halatum manghuphrong-lo. Lasi halatum pulo. “Labangso abang lahei hei alam konatsi long-loma? Alangliphan kopi agiansi pitang-loma? Alangli kopusi la kemanghumeme akam hei hei klemloma? 3Labangso abang ke hala kapat akimbang-lo, kalima? Alangli ke Meri asopo lapen Jems, Joseph, Judas lapen Simon akortelo, kalima? Lapen alangli ingjir atum ke ladak etum alongsi dolo, kalima?” Lasi halatum alangliphan chakchedet-lo.

4Jisu halatum aphan pulo, “Arnam amontri ke kadokave adimta aman do, bonta amethang arong, adon arap, lapen ahem asangho atum angbong ke aman ave.”#Jon 4.44

5Hadak keso manene atum aphu athak alangli ari batsi halatum aphan kepame pen apar ke thangnat kemanghumeme akamta klem un-edet-lo. 6Halatum akekroi kave apot alangli manghuhak-lo.

Jisu Sangho Bang Krehini Atum Aphan Ketoi

(Mat 10.5-15; Luk 9.1-6)

Ansi alangli hadak tebok terei arong damsi lam thandamlo. 7Alangli amethang asangho atum aphan amethang adung chehang-lo, lapen halatum aphan bang hini ni pajalangsi toilo, lapen kangthirthe ahi-i aphan kephlungji ajakong pilo. 8Alangli halatum aphan hukum pisi pulo, “Nangtum chin pen apar ke thangta ponri: him tame, jamborong tame, kalite tangka athia arlo poisa settame, nangtum ponri.#Luk 10.4-11 9Bonta keng-op chethonnon, lapen choi asele cheponri.” 10Lapen alangli halatum aphan pulo, “Nangtum nohok adimle dam settame, halabangso adim pen barbe tik ke nangtum kelutdam ahemle donon. 11Jongsi nangtum elong adim vangsi monit atum nangtum aphan chakchelo, lapen nangtum alam arjujelo tangte, hadak pen barra, halatum angno nangtum akengpak aduk cheho tekangnon.#Akam 13.51 Lake halatum aphan kepacheretoi aphanlo.”

12Ansi halatum barsi monit atum pap pen aning kecherui nangji alam than pachethang-lo. 13Halatum penang ahi-i phlung-lo, lapen keso amonit penang atum aphan jangthu patipsi keso pamelo.#Jem 5.14

Jon Baptist Kethi Alam

(Mat 14.1-12; Luk 9.7-9)

14Herod recho la kadokave alam arjulong-lo; pima Jisu anong bithe bithata chethangphlup-lo. Manene atum pulo, “Jon Baptistsi rengthulo, lasi alangli la kemanghumeme akam hei hei keklemji ajakong long-lo”.#Mat 16.14; Mar 8.28; Luk 9.19

15Bonta akaprek atum pulo, “Alangli ke Elijahlo.” Lapen akaprek atum pulo, “Alangli ke Arnam amontri inut-lo, hakoko ahut Arnam amontri atum asonthak thak inut Arnam amontrilo.”

16Herod labangso alam arjulongsi pulo, “Alangli ke Jon Baptist-lo. Ne labangso abang angphun pangthantang-lo. Bonta non alangli rengthutang-lo.” 17Pima amethang amat toisi Jon aphan panep-lo, lapen ingchin ani pen pakoksi phatek pabeng-lo. Akorte akebi, Philip apiso Herodias pen apotsi Herod alangliphan lapuson klemlo. Pima Herod labangpi aphan enlo. 18Atheke Jon Baptist Herod aphan pulo, “Nangli nangli korte apiso aphan en kertang.”#Luk 3.19-20

19Lasi Herodias Jon aphan aning solo, lapen alangliphan kepathiji aning hang-lo, bonta un-edet-lo. 20Pima Herod Jon aphan pherebomlang, atheke Jon ke dhoromi lapen ingthir-et amonit-lo pu alangli chinilo. Lasi Herod alangliphan raibomlang. Alangli Jon alam arju long-lote aning siksakpik titilo setta alangli lam karjuji aning dok-lo.

21Aphisi Herodias asoi keme long-lo. Atheke Herod amahang kethek arni chojun amei bisi detpangri amonit thedung atum aphan, chedanbang ahemphu atum aphan lapen Galili adet thedung amonit atum aphan phalo. 22Halabangso ahut Herodias asopi hem arlo damsi kanlo, lapen Herod lapen alohi atum aning dok-hurlo. Lasi alangli halabangso a-osopi aphan pulo, “Nang ning kehang alingle hangnon, ne la nangpipo.” 23Alangli seme tangsi pulo, “Ne seme tangsi pulo, nang nerat achitimle hang setta, ne la nangphan nangpidetpo.”

24Labangpi ingtan damsi apei aphan charjudamlo, “Ne kopisi hang nangjima?”

Herodias thakdunsi pulo, “Jon Baptist aphu.”

25Hala mamat halabangso a-osopi recho along damseraksi pulo, “Jon Baptist aphu non mamat kasu pen vanra nepinon; ne ning kehang lahelo.”

26La arjulongsi recho aning aduk doparlo, setta alangli seme tang-lo apotsi lapen alohi atum pen apotsi kroikre haihedet-lo. 27Lasi alangli hala mamat keton aron-aso inut aphan toisi Jon aphu kevanji ahukum pilo. 28Chedanbang abang ingtan damsi phatek arlo Jon angphun ingthan damlo, lapen kasu pen aphu vansi halabangso a-osopi aphan pilo, lapen osopike apei aphan la pidamlo. 29Jon asangho atum labangso alam arjulongsi hadak vang-lo, lapen abang arpum ponsi atipit along bidamlo.

Ketoitang Atum Nangkechevoithu

30Ansi ketoitang atum nangchevoisi Jisu along chingrumpet-lo, lapen halatum keklemtang akam an lapen kethantang alam an alangliphan thanlo. 31Alangli halatum aphan pulo, “Etum konatne kangsamri, monit kavedet adim damlonang; hadak nangtumta malomso sanglongpo.” Pima hadak kehelatpit atum do-o apotsi halatum an kechoji apor anta longledet-lo. 32Lasi halatum telong pen kangsamri adim kedamjisi barlo. 33Ake-ongpi amonit atum halatum nangkebar thekdunlong-lo, lapen halatum aphan chinilo; lasi kadokave arongsopi pen vangsi kekat pen halatum hadak dam patenolo, lapen Jisu lapen asangho atum aphan apar alanglitum hadak le paphrang-lo. 34Jisu telong pen che-osi armu ake-ongpi atum aphan thek-long-lo, lapen halatum aphan ingjinsosi aning munduk-lo, pima halatum kevi abang kavedet abiresak atum asonthak thak-lo, lapen alangli halatum aphan penang alam kethanji pangcheng-lo.#Kela 27.17; 1 Rec 22.17; 2 Phur 18.16; Eze 34.5; Mat 9.36

Jisu Bang Suri Pho Amonit Aphan An Kepacho

(Mat 14.13-21; Luk 9.10-17; Jon 6.1-14)

35Anke apor do-olo apotsi Jisu asangho atum alangli long vangsi pulo, “Ladak ke monit kavedet adimlo, lapen aporta do-olo. 36Lasi latum aphan padamnon. Hala adung arei arong hei hei along lapen arit along padamra halatum amethang methang kechoji aphan kopinene amar pachonamdam lonang.”

37Bonta alangli halatum aphan thakdunsi pulo, “Latum kechoji aphan nangtumle kopine pinon,” Jisu thak-lo. Halatum alangliphan pulo, “Netum denari pharo hini ador an ahim namdamsi latum aphan pacho nangjima?”#denari: denari isi ke rong aso atum arni isi kangdat anamlo

38Bonta alangli halatum aphan pulo, “Nangtum along him plang ko-an do? Damra langdamtha!”

Halatum langdamsi pulo, “Him plang pho lapen ok jonni do.”

39Ansi kadokave amonit atum bap kereng ajo kangni chom chomji aphan alangli hukum pilo. 40Halatum bang pharo, lapen bang phokep, lason jalangsi ingnichom chomlo. 41Alangli him plang pho lapen ok jonni enlo, lapen sining anat langdingsi ahirjume hang-lo. Lapen him beng-lo, lapen la asangho atum aphan pisi monit atum aphan parontoilo. Ok jonnita alangli kadokave amonit atum aphan paronlo. 42Halatum la chosi ingkrangpet-lo. 43Lapen halatum ke-ik un-e ahim lapen a-ok ahin pangrumsi ton krehini papleng-lo. 44Hala him kecho atum aphai pinso amonit bang suri pho dolo.

Jisu Lang Athak Kedam

(Mat 14.22-33; Jon 6.15-21)

45Jisu hala mamat amethang asangho atum aphan telong pachethapsi hapu parai, Bethsaida arongsopi anat padam patenobomlo. Lapen alangli methang ke armu atum aphan ahem pachedamtoilo. 46Alangli halatum pen chekaksi Arnam kardomdamji aphan inglong arludamlo. 47Arni kangsam ahut Telong ke talo angbongsi dolo, lapen alangli methang ke talo akungsi inutpet dolo. 48Jisu asangho atum telong vekbom vekbomsi dukpik-lo, lake Jisu thek-long-lo. Pima halatum aphan tomon khang-lo. Lasi alangli voku anbak apor ahut talo athak kengkam chejorsi halatum anat vang-lo. Alangli halatum aphan kelitphlotjisi mathalo. 49Bonta halatum Jisu aphan talo athak kengkam kechejor thek-longsi, alangliphan chamburukso tinkok-lo, lapen hangjolo. 50Pima kadokave atumta alangliphan thek-longsi pherelo. Bonta hala mamat alangli ningjesi halatum aphan pulo, “Ning thirklong non; ne lema, phereri!” 51Ansi Jisu halatum along telong chethapdunlo, lapen tomon hamdet-lo. La thek-longsi Jisu asangho atum manghuphrong-lo, 52pima bang suri pho amonit atum aphan him kepacho alam athe halatum chininelang; halatum aning buikluihak-huk-lo.

Gennesaret Alongri Jisu Keso Atum Aphan Kepame

(Mat 14.34-36)

53Halatum talo kapsi Gennesaret alongri nanglelo. Hadak latum telong kokdong-lo. 54Halatum telong pen keche-o ahut pen mamat monit atum Jisu aphan chinilo. 55Lasi halatum halabangso alongri bithe bitha adim damserak-lo; lapen Jisu hadaksi do pu karjulong alingsi alangli long keso atum aphan amethang atar pen rungponlo. 56Lapen alangli kedam aling, rong tame, rongsopi tame, rit-lo tame, halatum keso atum aphan hithi adim bisi, halatum alangli pe abu anchot setta kepa-ot longji aphan choningrilo. Lapen la ke-ot atum an medet-lo.

Currently Selected:

MARK 6: KARBIBSI

Highlight

Copy

Compare