Paailimonɨ 1

1-2Paailimonɨ, neya'mweigɨ,

Kwaamu'nanyabwi gwarana! Gɨmɨnyɨna tewaanya nevu'nadeigɨnyɨ. Nemɨjɨ avaaiwawɨnyaigɨnyɨ. A'mwe Aapɨya', gɨmɨre balaangevɨ wɨdɨma! Neya'mwe'gɨ kwaamu'nanyabwi gwarana! Nabaai “Aakipaazaigɨ kwaamu'nanyabwi gwarana! Gɨmɨjɨ Kɨraazɨtɨyare aawɨlasainera.” Nabaai “Paailimonɨgɨre angevɨ Kɨraazɨtɨyare kusɨlaanyavɨyaihi kwaamu'nanyabwi yɨhwarana!”

Nɨmɨ Polɨnyɨ Kɨraazɨtɨyai Jizaazare yagaalya wɨde'na kalavuzangevɨ mwaalena pɨkarya githawasɨwaabe. Neya'mwei Timoti nɨmɨjɨ mwaalɨkelyɨ. 3Naarɨmɨre yawɨta “Gotɨyai Nenɨmaangelyɨ Naanga Kɨraazɨtɨyai Jizaazai kwalyɨ yange'na pada'galagaimwanna yɨhika! Yɨ nabaai sarɨmɨre sɨmunyavɨ kwaamu'nanyabwi yɨhwarana!”

Paailimonɨmɨ tewaanya wɨvu'nyabulyɨ Kɨraazɨtɨyarɨ lɨmwagasabulyɨ saburaarɨnesɨ.

4-5Nɨmɨ kadɨka dara wɨ'nadɨnyɨ. Paailimonɨ sai Naanga Jizaazarɨ dɨragɨnna lɨmwaga'manɨkei daaka! Paailimonɨmɨ Gotɨyare tewaanyaraavɨna kale naanga wivanɨkei daaka! Sara wɨ'nena saburɨdaasɨ Gotɨyarɨ wɨdadɨnyagaa' dara wɨdɨna “Paailimonɨ tewaanna yɨvanɨke'na yuyagaa' ‘Su! Su!’ gɨthadɨ nɨnnya Gotɨyaigɨ tewaanna wɨgaimwamanɨgɨnyaigɨnyɨ. 6Kɨraazɨtɨyarɨne yuya nawɨ'nya naanga kɨnɨnnakeina nawɨ'nya sa kuna yawɨramaraana! Nabaai Paailimonɨ yuya sa yawɨramaa'da Kɨraazɨtɨyarɨ kuna lɨmwaga'devɨ pwaraavɨ sara wɨdada sahwara nawɨ'nya sa wanganapɨjɨ gamɨjɨ Kɨraazɨtɨyarɨna je'mwannemwaaibɨka!” 7Wɨdadɨnya' dare'nesɨ. Nya'mweigɨ, Gotɨyare tewaanyaraavɨre sɨmunyangɨ munyɨkaavɨ gaala pada'galawɨmwaaihadɨnya'na gɨmɨre wɨvu'nyaburɨna wɨ'nadɨ yɨlaaya naanga yɨwa. Sarevɨ nɨmɨre sɨmunyavɨ nyɨvaimwamwaanyaigɨnyɨ.

Paailimonɨ Wonɨzɨmaazarɨ gahwaalaangerɨbɨ' ayahi maarake'nesɨ.

8Sarevɨ Kɨraazɨtɨyarɨ dɨragɨnnakeinyɨ yɨnɨga wi'na dɨragɨnna gɨthɨwɨja' yɨ nabaai nayaa jɨthe'na kɨrɨ' 9yagaala dɨragɨnya sara majɨwa. Aawa. Tewaanya wɨvu'nya sabwi savɨna nɨmɨ kave yagaala githaangamanɨge gɨmɨnyɨ. Yɨ dareinyɨ, nɨmɨ a'mwe neinyɨ, yɨ nabaai Kɨraazɨtɨyai Jizaazarɨne kalavuza sahwainyɨ. 10Sareinyɨ nɨmɨre kaimɨraayarɨna nayaa kave githaangamanɨge. Kalavuzanga davɨ kuna mwaalena sahwarɨ Kɨraazɨtɨyarɨna kujɨwaake lɨmwagaka nɨmɨre kaimɨraayaibɨ' yɨma'nakelyɨ. Yɨ sahwai Wonɨzɨmaazai. 11Kɨgaa' sahwai gɨmɨnyɨne waryaanyalyɨ. Gɨmɨnyɨ gaimwanga ya'ne wawɨnya tewaanya yaakai mɨ'. Sarevɨ dahaa' sai wawɨnya tewaanya mi'na yannelyɨ gɨmɨnyɨjɨ nɨmɨnyɨjɨ sainaarɨ gaimwange'na. 12Sahwarɨ gɨmɨnyawɨnna ayɨna maragyasɨwaabe. Sahwarɨna tewaanya naanga nyɨvu'nɨvanɨke'na gyasaabena kale naanga nyɨvanɨkeinyɨ. 13Sareinyɨ nɨmɨ sainyɨ “Yagaala tewaanya' wɨjɨwakadaari yɨ kumɨ nɨmɨnyɨ kalavuzangevɨ marakɨna. Sarevɨ Paailimonɨmɨneba Wonɨzɨmaazai nyɨdaaya'nei nɨmɨjɨ ye'mwannamwaalakerɨ dalɨmwaga'na kyɨwɨdɨkeinyɨ.” 14Kɨrɨ' gɨmɨ davɨna “Ya,” nyɨdɨza' kadɨka mu'nyena nabaai dalɨmwaga'manɨgei mɨ'. “Gɨnnya tewaanya dazaburɨna mɨdɨnya'neigɨnyɨ nɨmɨ dɨragɨnna yɨma!” dena kɨrɨ' myɨwa. Aawa. Gɨmɨ sɨmunyavɨ sara yawɨra'gɨzɨ sara jɨthe' nawɨ'nyabulyɨ.

15Sare' dare'ne' dɨngaka? Sahwarɨ Gotɨyai yaka “Paailimonɨ yuyagaa' yuyagaa'na ayɨna maarana!” kada' gɨmɨnyɨ kɨbawegaa' gyahalya'mavake'nanyɨ. 16Yaasɨwa'wawɨnya yadei gɨmɨjɨ kuna mwaaladevaaibɨsai mɨka! Aawa. Sai dazasare sabwi mi'na wavɨla'mwakelyɨ. Dahaa' Kɨraazɨtɨyarɨne neya'mwei gamɨ sarɨna nevu'nɨvanɨkelyɨ. Yɨ nɨmɨ sainyɨ dɨragɨnna sara yawɨ'dɨnyalyɨ. Sareinyɨ kɨrɨ' dazasare saburɨna gɨmɨ naanga nyavɨla'dɨnneigɨnyɨ. Yɨ gɨmɨre kɨlaakejɨkɨna sai nayaa gɨthaayadelyɨ. Kɨlaakejɨkɨna gavevɨne'na mɨ'. Yɨ nabaai Naangerɨna sai ja'mwei gye'mwannamwaaladelyɨ. Dazasarerɨna tewaanya naanga gɨvu'nadeigɨnyɨ. 17Sarevɨdaa'nyɨ “Kɨraazɨtɨyarɨna Polɨ nyɨnyakwalaangelyɨ,” yawɨ'dɨza' gɨmɨ nɨmɨnyɨ nyɨmaa'dɨnnebaaibɨ' Wonɨzɨmaazarɨ nayaa dɨmaaka! 18Nabaai “Sahwai nɨmɨnyɨna yɨwetawakya dahawarɨka! Nabaai nɨmɨnyɨ nyɨrɨvɨkɨradei dɨngaka!” yawɨ'dɨza' yɨ gamɨnne yaya' maravɨla'nya ya'gɨzɨ sarɨne' yɨ nɨmɨnne' yaya' sahɨrɨ' dakɨ! 19Nɨmɨ Polɨnyɨ yɨda'mwesɨ. Yagaala da' nɨmɨre ata dathasɨ dara yɨda'mwesɨ. Nɨmɨ sainyɨ tɨvɨkɨta daza' yɨdesɨ. “ ‘Nabaai gɨmɨ saigɨ dɨnyɨrɨvɨkɨ'de. Yagaala tewaanya' kagɨzɨwaake gaala mwaalyabwi yanga maaragɨnya'nanyɨ,’ nagɨthɨwɨdɨka!” dena tɨvɨkɨta sa' yɨdesɨ. 20Yo, nya'mweigɨ, sareinyɨ Naangerɨna yɨlaaya dara dɨnyɨgala! Wonɨzɨmaazarɨ nayaa dɨmaaka! Kɨraazɨtɨyarɨ nɨmɨre sɨmunyasɨ munyɨsɨ gaala dɨnyɨvada'galamwaaihya!

21Nɨmɨ dɨragɨnna dara yawɨralɨmwagena “Sarevɨ Kɨraazɨtɨyare sabwi mɨdɨnadelyɨ,” pɨkarya githawasɨwaabesɨ. Nabaai tɨvi'na dara yawɨ'manɨge. Gɨthɨwebwi sara jɨtheigɨnyɨ. Sare' gave' mɨ'. Sabwi wavɨlavɨkebwi tewaanaanga jɨtheigɨnyɨ. 22Sasareigɨ nabaai avaalyagaa' ku'dɨka pɨrɨ' nayaa kyovɨrawaka'gɨzɨ gɨmɨjɨ ye'mwannamwaalɨde'nanyɨ. Yɨ sare' dare'nesɨ. Nɨmɨ yawɨ'dɨ dara yemwaaiheinyɨ “Gotɨyai sarɨmɨre yɨdaanganyangɨ yɨhu'naka kalavuzangevɨ nyɨmaaraka nɨmɨnyɨ yanga ayahi yɨhɨzaavadeinyɨ.”

23Epapɨraazai gɨmɨnyɨ gɨthɨvanɨ' “Nya'mweigɨ!” Sai Kɨraazɨtɨyai Jizaazare yagaala wɨjɨwakamaryake'na kalavuzangevɨ nɨmɨjɨ ye'mwannamwaaidasalyɨ. 24Nabaai nɨmɨre avaaiwawɨnyara anga dava nɨmɨjɨ mwaaihasara Maakɨyalyɨ Aarɨzɨtaakazalyɨ Dimaazalyɨ Lukɨyalyɨ sara kwarajɨ avaaina gɨthɨvanɨga' “Neya'mweigɨ!”

25Naanga Jizaazai Kɨraazɨtɨyare yanga wɨgaimwangebwi sarɨmɨre kuryarajɨ yɨhye'mwannamwaalana!

Polɨ

Currently Selected:

Paailimonɨ 1: byr

Highlight

Copy

Compare