UNTABAN 1
1
Napaugar ulun ru Israil ra untob ondo' kasaa'
1 Paat ra orou kasaa' ra sila' karuo, ralalom bilor karuo malupus ulun ru Israil nangiruan ra Misir, indagu Tuhan ri Musa giu' ralalom Kim ru Tuhan giu' ra Intok masiluk Sinai. Indagu Io, 2“Okou am i Arun musiti' manguntob ra ulun ru Israil maya' ra bansa' am sasambaloi. Pambaal ra senarai ru inggalan ru ngaangai' ungkuyon 3ondo' umur no nasailan ruo ngoopor ngambilor, ondo' maaya' masauk ra saujor. 4Kitaako' noyo sangulun tingganai ru bansa' no intor ra moonong bansa' mangindangan rirun.” 5-16Gitilo noyo ngaangai' ungkuyon, iono tingganai-tingganai ralalom ru bansa' nilo, ondo' pinili' intor ra ulun koson mambaal ra kandoi raginio:
| Bansa' | Tingganai |
|---|---|
| Rubin | Ilijur anak ri Sidiur |
| Simion | Silumiil anak ri Jurisyadai |
| Jiuda | Nagason anak ri Aminadab |
| Isakar | Nitaniil anak ri Juar |
| Jibulon | Iliab anak ri Gilon |
| Ipraim | Ilisama anak ri Amigud |
| Manasi | Gamaliil anak ri Pidajur |
| Binjamin | Abidan anak ri Gidioni |
| Dan | Agiijir anak ri Amisyadai |
| Asyir | Pagiil anak ri Okran |
| Gad | Ilyasap anak ri Diwil |
| Naptali | Agira anak ri Inan |
17Ra indangan ru mopor am ruo ngaulun no, i Musa am i Arun 18nanimung ra ngaangai' ulun paat ra orou kasaa' ra sila' karuo. Ngaangai' ulun pinarijisto sumugut ra bansa' am sasambaloi ru sigagama'. Inggalan ru moonong ungkuyon ondo' umur ruo ngoopor ngambilor am nakasail pinarijisto am inuntob, 19koson ra nanusuban ru Tuhan. Pinarijisto ilo ri Musa giu' ra Tana' kaagisan Sinai. 20-46Inggalan ru ungkuyon ondo' umur ruo ngoopor ngambilor am nakasail, ondo' maaya' masauk ra saujor, pinarijisto sumugut ra bansa' am sasambaloi, timinalimpuun ra bansa' ri Rubin, anak ungkuyon katuaan ri Jakub. Suang nilo koson ragitio:
| Bansa' | Suang ru Ulun |
|---|---|
| Rubin | 46,500 |
| Simion | 59,300 |
| Gad | 45,650 |
| Jiuda | 74,600 |
| Isakar | 54,400 |
| Jibulon | 57,400 |
| Ipraim | 40,500 |
| Manasi | 32,200 |
| Binjamin | 35,400 |
| Dan | 62,700 |
| Asyir | 41,500 |
| Naptali | 53,400 |
| Suang: | 603,550 |
47Ulun ru Liwi kalo pinarijisto mababaya' ra bansa'-bansa' ra bokon, 48sabap ra minindagu noyo Tuhan ri Musa, 49“Paat okou manguntob ra ungkuyon ondo' maaya' masauk ra saujor, pai' untobo' bansa' Liwi. 50Kaa' susubo' ulun ru Liwi manalingapu ra Kim Kuno am ngaangai' kuliamos no. Musiti' nilo pikulin Kim am kuliamos no, am niayuk mangandoi ra giu' no. Ilo niayuk musiti' mangkim niayuk ra liput ru Kim Kuno. 51Paat akau mapabanding ra pangkiman, ulun-ulun ru Liwi musiti' maparulun ra Kim Kuno, am mapatirong raginio saguli' giu' ra intok bagu. Suai ra ulun ru Liwi, osoi ayuk minggaar ra Kim Kuno musiti' ukumin ra matoi. 52Ulun ru Israil ra bokon musiti' mangkim ralalom ru pulalai, am moonong ulun ralalom ru gino ngai' ulun nano galama', am ragana' ru bandira' ru sigagama'. 53Kaa' ulun ru Liwi musiti' mangkim ra liput ru Kim Kuno ra magalung raginio maa' raginio kolondo' osoi pana minggaar raginio, am mangkinibit Raki' sumangit am mangukum ra ulun ru Israil.” 54Ulun ru Israil pana nambaal ra ngaangai' nanusuban ru Tuhan ri Musa.
Currently Selected:
UNTABAN 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.