JOIL 1
1
1Gitio noyo tanou ru Tuhan posoboyon ri Joil anak ri Pituil.
Mangiluk guang ru ulun ru Israil sabap ra ampos ru umo napuso
2Rongog kano, akau ulun matutuo;
rongog kano, akau ngaangai' ulun giu' ra Jiuda.
Igondo' kia baal koson ragitio nasauk paat min ragili,
kapoam paat ru kinamatuaan min ragili?
3Tunungo' kasaukan ti ra anak-anak muno,
maa' raginio tunungon nilo ra anak-anak nilo,
am anak-anak nilono boo poyo mantunung raginio ra papag ra tauli no.
4Sampanon ru gapu' ondo' kalo mauntob suang no
minorop giu' ra umo-umo am nangai' ra ampos no.
Atan ondo' tinatang ru sampanon ra gapu' no,
sinaliir ru sampanon ra bokon poyo.
5Akau ondo' nagauk, tirong kano!
Akau ondo' manginum ra wain, pantangi' kano!
Wain ondo' baguon
ginaau noyo intor ra kabang min.
6 Rondo' bansa' namulunsar noyo ra pagun takau;
bansa' ondo' maikang am kalo mauntob suang nano;
ripon nilo malarom koson ra ripon ru singa'.
7Puun ru anggur takau pinuso noyo,
am puun ru ara takau pinandak.
Kulapa' ru puun tataun inanit,
saboi raan-raan nasauk ra mapulak.
8Akau ngaangai' ulun, pantangi' kano,
koson ra ralaa ondo' nanulaboi ra pinatayan ru tamung nano.
9Kolondo' boo gandum am wain koson pataakon giu' ra Baloi ru Tuhan;
imam-imam nantangi' sabap ra kolondo' pataakon ra tayar ru Tuhan.
10Umo-umo nasaliir;
tana' mangulir
sabap ra gandum napuso noyo,
kawa' ru anggur napua' noyo boo,
am puun jaitun liminonot.
11Akau ulun magitanom, pangiluk guang kano;
akau ulun manangumo ra anggur, pantangi' kano,
sabap ra gandum, barli,
am ngaangai' tinanom napuso noyo.
12Puun ru kikinawa' giu' ra umo liminonot noyo boo ngaangai';
puun anggur, puun ipol, puun ara, puun kurma am puun dalima',
mamagun pana kalo boo maansukan.
13Akau imam-imam ondo' mangandoi giu' ra altar,
pambayang kano ra konoon karung am pantangi' no.
Umpos kano ra ralalom Baloi ru Tuhan
am panulaboi kano ra mosorondom.
Kolondo' boo gandum am wain
koson pataakon ri Aki Kapuuno' min.
14Pangani' no ra susuban koson mampali;
pambaal no rondo' pantimungan.
Susubo' tingganai-tingganai
am ngaangai' mamagun ru Jiuda
matong ra Baloi ru Tuhan,
i Aki Kapuuno' min
am pampiau makiindangan Riso.
15 Orou ru Tuhan mamaar noyo,
paat ra Ondo' Maayo Kaga' Kuasa', mamparatong ra katutukan.
Mapara' boo makalalaa' orou raginio!
16Tinanom pinuso giu' ra talupak ru mato takau.
Kolondo' boo indii am lalakup giu' ra ralalom Baloi ri Aki Kapuuno' takau.
17Sampug minatoi giu' ra tana' ondo' mapua'.
Kolondo' boo gandum koson buliin;
kulapa' pambulian ra bilor kolondo' suang nasauk ra nalunsai.
18Bibiag tinambiag mampagala' am magalabo,
sabap kolondo' boo padang sakot risilo ngaangai';
sampanon ru domba pana maimbolo'.
19Gumolok aku Rirun, iou Tuhan,
sabap padang sakot am puun tataun mapua' noyo am minatoi,
ilain koson nosolob ru apui.
20Mulu' poyo ra bibiag masigo pana gumolok Rirun,
sabap ra sungoi-sungoi napua' noyo,
am padang sakot giu' ra tana' kaagisan nosolob noyo ru apui.
Currently Selected:
JOIL 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.