NIGIMIA 2
2
Minongoi i Nigimia ra Jirusalim
1Paat ra sangarawan, kalupus apat ngansila', iono sila' Nisan, tatanga' Raja' Artasasta mangakan, pampasulung aku ra wain riso. Kalo poyo raginio, kalo igondo' raja' pakakito raki' mangiluk. 2Ginio ra pangkuot raja', “Kua ilain kou mangiluk kaga'? Kalo marualan kou, maaru' mokoondo' baal ondo' mapagon ra guang muno.”
Nakatigog aku, 3 am taam, “Kaayag kono raja' ra sabubuoi no! Ati kulaan aku kalo mangiluk, paat ra bandar intok ru kinamatuaan kuno linobong raino nalunsai, am kulobon-kulobon garabang nano napuso nosolob ru apui.”
4Pangkuot raja', “Amon ru ginio poyo, atan kia gogoton muno?”
Ralalom ru guang kuno makiasi' ri Aki Kapuuno' mangunguasa' giu' ra suruga', 5am indagu aku ra raja', “Amon ru mangiou kou raja', am masaga' kou mangapu ra kitaakon kuno, iowo' aku mongoi ra pagun ru Jiuda, bandar intok ru kinamatuaan kuno linobong, maa' raginio makapambaal aku saguli' ra bandar no.”
6Raja' ondo' nanturung nabaya' ra andu' nano ra sapapa' nano, nangiou ra kitaakon kuno. Nangkuot raja' raki' ra kula' buoi kuno mayan ra giu', am sanggilan aku sumaguli'. Aku pana nambala' riso ra paat ru sagulian kuno.
7Kopongo raginio nakitaak aku maa' raginio raja' mangani' raki' kukula' surat tayar ru gabenor-gabenor giu' ra Wilayah kalasaan ru Iprat, maa' raginio mangiou ilo raki' mongoi ra Jiuda. 8Suai raginio, aku niayuk nakitaak ra surat tayar ri Asap, mantatamung ra kataunan ru raja', maa' raginio mangani' io raki' ra tataun balak tayar ra kulobon garabang ru kubu ondo' masauk ra rinding paninili ra Baloi ru Tuhan, am tayar ra timbok ru bandar, am niayuk baloi ondo' ayanin kuno. Nangiou raja' ra ngaangai' kinitaak kuno sabap i Aki Kapuuno' mabaya' raki'.
9Nanusub raja' ra kukula' ngaulun pagawai ru saujor am sampulalai saujor nangkuda koson mamaya' raki' ralalom pangkiralanan kuno mongoi ra Iprat Kalasaan. Pakasaboi aku ra giu', pataako' ku surat-surat ru raja' ra gabenor-gabenor. 10Kaa' i Sanbalat, ulun intor ra bandar Bit-Oron, am i Tobia, pagawai intor ra wilayah Amon, nokorongog ra mokoondo' ulun ondo' matong koson mangindangan ra ulun ru Israil. Ginio boo ra ilo siminangit kaga'.
11Namparayus aku ra pangkiralanan mongoi ra Jirusalim. Buoi kataluan, 12kalo nambala' aku ra osoi ayuk pana ra inatang ri Aki Kapuuno' ralalom ru guang kuno intor ra atan ondo' baalon kuno ra tayar ru bandar Jirusalim. Kopongo raginio, paat ra tanga' rondom siminukal aku am miningkual nababaya' ra kukula' ngaulun rangan. Rorondo' ra bibiag ondo' inibit ku iono kaladai ondo' kurain ku. 13Orou lakat poyo molondom paat ra aku miningkual intor ra bandar nansail ra Kulobon Garabang Limayak giu' ra tampilon kalasaan, am minongoi aku ra tampilon rabugus, nansail ra Taur ru timug Tambuakal, minongoi ra Kulobon Garabang Ginsamol. Buoi ru pangkiralanan no, inilayan ku toojo timbok ru bandar ondo' nangaaba' am kulobon-kulobon garabang nano napuso nosolob ru apui. 14Kopongo raginio intor ra tampilon sirangon ru bandar no minongoi aku ra ralayo, giu' ra Kulobon Garabang Taur ru timug am giu' ra Kulam ru Raja'. Giu' no kolondo' intok koson ugaran ru kaladai ondo' kurain kuno sabap ra lunsai no masuang kaga'. 15Ginio ra tuun aku ra Limayak Kidron am namparayus ra pangkiralanan, liliwa' nagilong toojo ra timbok ru bandar. Kopongo raginio siminaguli' aku ra bandar minaya' ra ralan raginio niayuk, ondo' nansail ra Kulobon Garabang Limayak.
16Kolondo' sangulun pana ra pagawai ru pagun no nakapandai ra ati inangayan kuno am binaal kuno. Polos raginio kalo poyo nambala' aku ra osoi pana ra gino ngai' ru ulun ru Jaudi, imam-imam, tingganai-tingganai, pagawai kapoam osoi ayuk ondo' maya' mambaal saguli' ra bandar Jirusalim. 17Kaa' indagu aku boo risilo, “Ilai' baal takau ondo' naimbolo' ti! Bandar ru Jirusalim soroi ayuk boo lunsai no am kulobon-kulobon garabang no ondo' napuso nosolob ru apui. Ibok baalo' takau saguli' timbok ru bandar maa' raginio kalo boo asabin takau.” 18Tunungo' ku boo ati kulaan i Aki Kapuuno' mabaya' am mangindangan raki', am atan ondo' rinagu ru raja' raki'.
Taam ilo, “Ibok kano talimpuun takau mambaal!” Kopongo raginio tampos ilo koson manalimpuun ra kandoi no.
19Pakapandai i Sanbalat, i Tobia am sangulun Arab ondo' ininggalanan ri Gisyim ra inatang mai no, nakakurit ilo am indagu, “Atan ondo' baalon mino? Gumuor kau kia ra raja'?”
20Taam aku, “I Aki Kapuuno' mangunguasa' giu' ra suruga' mangani' ramon ra kasugutan. Akai ti ulipon Nano, am talimpuunin mai mambaal. Kaa' akau kolondo' kuasa' kapoam longgom atan pana giu' ra Jirusalim. Mulu' piboo paat ra ulun mindagu intor ra Jirusalim, inggalan min kalo sasabiton.”
Currently Selected:
NIGIMIA 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.