NAGUM 3
3
1Aibui boo ra bandar ondo' nososok ra ulun mampatoi am ulun magabau,
am niayuk nososok ra masuang rapu'
ondo' gaawon am talingaawon.
2Rongog kano ra libos ru pitol lalapos am kuritot ru luda' mugar,
kurutuk ru kuda masimbul am kuriku' ru kurita' kuda mauyog.
3Pulalai mangkuda mamulunsar ra guang maantak,
ilang manguliat am tutura' makapiniat.
Ulun ondo' matoi kalo mauntob,
baangkai nilo satuntur-tuntur,
mangkinibit ra ulun makasaru.
4Niniwi mantalan ra inan no aniin ra ukuman.
Kinantalur nano mamunduk kaga' ra guang.
Masuang bansa' nasinggayawan riso,
am nampasauk risilo ra ulipon nano.
5Mindagu Tuhan Ondo' Maayo Kaga' Kuasa',
“Okou Niniwi, ukumin Tokou!
Pagibaangon Tokou,
am mompoloso ra bansa'-bansa' magilong rirun;
makito nilo baal muno ondo' makauyuyu'.
6Pamakuan Kuno rirun nototop ra sisang;
Binobol Tokou ra jamol.
Tantangin kou ru ulun ra guang malaa'.
7Ngaangai' ulun ondo' magilong rirun lumugut am mindagu,
‘Niniwi nalunsai ayuk boo soroi!
Osoi kia ondo' maya' riso mangiluk guang?
Kolondo' boo ondo' masaga' manimayo riso.’ ”
8Okou Niniwi, moonsoi kou poyo kia intor ra Tibi, pusor bandar ru Misir? Tibi niayuk mokoondo' ra sungoi ondo' mangampin riso koson ra timbok; Sungoi Nil noyo gagampin nano. 9Tibi namarinta ra pagun Itiopia am Misir; kuasa' nano kolondo' balit. Libia nasauk ra paguum ru Tibi. 10Kabalu' pana raginio, mamagun ru Tibi rinakop am pinatiran ra pagun. Giu' ra moonong pisuk ru ralan, anak-anak nilo linamba' saboi minatoi. Tingganai-tingganai nilo rinantai am tinayar-tayar ra gino ngai' ru ulun ondo' namparakop risilo.
11Okou Niniwi, okou pana magauk. Piroton mu niayuk koson mamayag ra inan intor ra pantula'. 12Ngaangai' ru kubu muno masauk koson ra puun ru ara ondo' kawa' nano naansak noyo. Paat ra uyogon puun tataun no, kawa' nano marayus maratu' ra kabang ru ulun ondo' masaga' mangakan no. 13Saujor muno malawo koson ra ruandu' am pagun muno makatalang, kalo maalungan giu' ra saang ru pantula'. Apui sumolob ra lugu' ru kulobon garabang muno. 14Pansagou ra timug koson ulaan buoi ra okou awangin. Kapioto' kubu-kubu muno! Kikinjangi' tana' labu' koson mambaal ra batu bata, am pongoono' intok pangutawan nano! 15Atan pana ondo' baalon muno kolondo' onong, sabap maaru' solobon kou saboi matoi kapoam potoyon ralalom pangayawan. Nampaliot kou koson ra tatanom ondo' kinai' ru gapu'.
Nansayat kou noyo koson ra gapu'! 16Ulun mantalan muno masuang poyo intor ra butitin giu' ra limbowon! Kaa' raino minugar ilo noyo, koson ra gapu' ondo' napabingkal ra kawo am nansiab ra liminiot. 17Pagawai-pagawai muno koson ra sampanon ru gapu' ondo' sumindung giu' ra timbok paat ra orou masimu'. Kaa' pakasirang mato ru orou, gapu' no mataki' mansiab ra lumiot; kolondo' sangulun pana nakapandai ra intok inangayan ru sampanon ra gapu' no!
18Okou raja' ru Asyur! Gabenor-gabenor muno minatoi noyo am tingganai-tingganai muno nokororot ra sabubuoi no. Mamagun muno nantutuliar giu' ra kagunungan, am kolondo' sangulun pana makapagibit risilo muli' saguli'. 19Pilat muno kalo mababas am ruruko-ruruko muno kalo mapali'. Ngaangai' ulun ondo' nokorongog ra tanou katutukan muno magitapap ra longon sabap ra maansukan. Kolondo' sangulun pana makapamayag ra inan intor ra kalaatan muno ondo' kalo lumonggo'-longgo'.
Currently Selected:
NAGUM 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.