LUKAS 21
21
Taak ru sangulun napuor
(Mrk. 12:41-44)
1Pampulolou i Jisus am kakito No ulun-ulun langkaya' mampasuang ra taak nilai ra kaban panimungan ra ruit giu' ra Baloi Tuhan. 2Kakito No niayuk sangulun napuor ondo' musikin mampasuang ruo ngampila' ruit tambaga', ondo' kalo kula' logo no. 3Kaa' indagu i Jisus, “Sotopot no, ondo' pinataak ru napuor musikin ti mauli' poyo intor ra taak ru ulun ra bokon. 4Ulun ra bokon nampataak intor ra kalangkayaan nilo, kaa' ruandu' ti, kabalu' pana musikin io, kinai' no pataako' ruit nano.”
Ragu ri Jisus intor ra kalunsayan ru Baloi Tuhan
(Mat. 24:1-2; Mrk. 13:1-2)
5Mokoondo' kukula' ngaulun mansusunur ra kinoonsoi ru Baloi Tuhan no. Indagu ilo ra mumpara' piboo bonsoi ru batu ru Baloi Tuhan no am kuliamos mongoonsoi no ondo' pinataak ru ulun ri Aki Kapuuno'. Indagu i Jisus, 6“Masuku' paat no, ngaangai' makito min ti lunsayon, kolondo' rondo' batu pana soroi ra intok nano.”
Kapaganan am kaimbalaan
(Mat. 24:3-14; Mrk. 13:3-13)
7Kuati' nilo i Jisus, “Mangingila', sanggilan kasaukan ru ginio? Atan kia tatandu' nano ra io masauk?”
8Indagu i Jisus, “Ilalain koson kalo ruungon kau! Sabap ra masuang ulun matong am manabit ra inggalan Kutu, konilo, ‘Aku no Io!’ am, ‘Maar noyo masuku' paat nano!’ Kaa' pai' kau baya' risilo. 9Pai' kau pakatigog amon ru maining min tanou ru pangayawan am ulun manggal ra parinta. Baal koson ragitio maaru' masauk galing, kaa' gitio sala' ka arati' no ra nasuku' noyo pupus ru tana' ti.”
10Tungguli' poyo ri Jisus, “Mokoondo' bansa' mampapatoi ra rondo' am bokon, am niayuk pagun mangayou ra rondo' am bokon. 11Masauk gonggon ru tana' ra makalalaa', bitilan am niayuk maruol ra ati ayuk. Giu' ra limbowon makito baal malaat am tatandu' ondo' makalalaa'. 12Kaa' io kalo poyo masauk ngaangai' no, rokopon am imboloon kau. Pataakin am uwin kau giu' ra baloi sambayangan, am aputon poyo ra lamin pangaputan. Ibiton kau ra saang ru raja' am niayuk tingganai sabap ra mangintopot kau Raki'. 13Paat raginio boo kaluagan min mampabala' risilo ra Tanou Moonsoi no. 14 Ginio poyo ikango' min guang ra kalo pana magalabo ati kulaan kau tumaam, 15sabap ra Aku galama' mangani' ramuyun ra kapintaran tumaam, saboi kolondo' sangulun pana pantula' mino makaanggal kapoam makaansang ramuyun. 16Kasisangin am pataakin kau ra pantula' min ru matuo, pinongkotob, pabukat am niayuk rangan mino. Mokoondo' niayuk intor ramuyun no potoyon. 17Ngaangai' ulun masisang ramuyun sabap ra mangintopot kau Raki'. 18Kaa' alungin kau ri Aki Kapuuno' saboi kolondo' rondo' pana ra abuk mino maubul. 19Musiti' kau mokoorot am mokoowot kau boo ra kaayagan motopot.”
Sauk Malaat giu' ra bandar Jirusalim
(Mat. 24:15-21; Mrk. 13:14-19)
20“Amon ru makito min bandar Jirusalim limpuin ru saujor, matutunan min boo ra lunsayon io ra maagu no. 21Paat raginio, ulun ru Judia musiti' magiru' giu' ra kabuluran; ondo' soroi ra bandar musiti' mangiruan ra bandar no, am ondo' giu' ra lisar ru bandar pana, pai' no subol saguli'. 22 Sabap ra ginio noyo ‘Orou Pangukuman’, koson ra masauk ngaangai' ondo' tinulisan ra Buuk Kitab. 23Aibui boo ra ruandu' ra mangaapang am ondo' mantalaanak paat raginio! Makakapaganan maayo pagun ragitio am likokot ri Aki Kapuuno' pasukuon ra bansa' ragitio. 24Mokoondo' ulun potoyon ra ilang, am mokoondo' poyo ibiton am uliponon ra ati ayuk pagun ra bokon; am bandar Jirusalim kikinjangin ru bansa' ondo' kalo makaulig ri Aki Kapuuno' saboi paat ra inaru' no risilo maukop.”
Ratangan ru Anak ru Ulun
(Mat. 24:29-31; Mrk. 13:24-27)
25 “Gitio noyo tatandu' ru pamupusan no; mato ru orou, bulan am butitin kulawon. Ngaangai' ulun ru tana' ti malawo am malaa' ilo ra bobolos am kinulun ru raat. 26Malausan ayuk ulun sabap ra malaa' toojo magilong ra atan masauk giti ra tana' ti, sabap ra ngaangai' kuasa' ru limbowon no ugogon. 27 Bagu no makito Anak ru Ulun matong ra gaun nabaya' ra kuasa' am katulayan maayo Nano. 28Tumalimpuun poyo masauk baal ragitio, ingkakat am pantingaa' sabap ra mamaar kano bayagon.”
Abig ra puun ru ara
(Mat. 24:32-35; Mrk. 13:28-31)
29Pantunung boo i Jisus ra abig ragitio risilo, indagu Io, “Ilai' min puun ru ara am ngaangai' puun ra bokon. 30Amon ru makito min tumalimpuun manalantar, mapandayan min mamaar noyo tampio. 31Koson niayuk ra amon ru makito min tatandu' ragitio masauk, mapandayan min mamaar noyo i Aki Kapuuno' mamarinta.
32Karaa' min! Ngaangai' ragitio masauk ra kalo poyo matoi ngaangai' ulun ondo' maayag ra raino ti. 33Limbowon am tana' ti mapuso, kaa' ragu Kutu mantilayun.”
Ilalai' min!
34“Ilalai' min! Pai' kau bunsag am magiginum ayuk, kapoam magalabo ra kaayagan mino ayuk, saboi Orou ru Tuhan mamulali' matong am kalo makatampos kau. 35Sabap ra ratangan nano mampalandak ra ngaangai' ulun ru tana' ti. 36Ilalai' am kasalok makiasi', maa' raginio makapantataan kau baal ragitio ra io masauk am paat ra akau paumaan ra Anak ru Ulun.”
37 Moonong orou nangila' i Jisus giu' ra Baloi Tuhan, am paat ra mamai' mongoi Io koolong ra Bulur Jaitun. 38Moonong susuab matong ulun masuang ra Baloi Tuhan koson mangkirongog ra pangilaan ri Jisus.
Currently Selected:
LUKAS 21: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.