IMAMAT 26
26
Barakat sabap ra gumagaya'
(Sag. 7:12-24; 28:1-14)
1 Indagu Tuhan, “Pai' pambaal ra sinungkalalaing, am pai' patirongo' patung, lugu' batu sinungkalalaing kapoam batu inukir ra sambaan. Aku noyo i Tuhan i Aki Kapuuno' min. 2Iantakon orou Sabat am urumato' intok sambaan Raki' no. Aku noyo Tuhan.
3 “Amon ru maayag kau sumugut ra ukum Kuno am gumagaya' ra susuban Kuno, 4mapatuun Aku ra rasam ra matuma' paat no maa' raginio makapanangampos tana' mino am mangkawa' puun-puun no. 5Ampos ru tatanom mino masuang kaga' saboi lakat poyo mangkumos kau ra gandum paat pangupuan ra kawa' ru anggur, am lakat poyo mangupu' kau ra kawa' ru anggur paat pantanaman ra gandum. Mokoowot kau ra akanon ondo' maukop, am maayag mamio-mio giu' ra pagun mino.
6“Maparatong Aku ra kaansayan giu' ra pagun mino saboi mokokolong kau ra kalo malaa' ra osoi pana. Liomon Ku bibiag mangasigo giu' ra pagun no, am pangayawan pana kolondo' boo. 7Maala min pantula' mino; 8ra limo ngaulun, makala min maatus ngaulun pantula', am ra maatus ngaulun makala min mopor ngaribu ngaulun pantula'. 9Mambarakat Aku ramuyun am manaak ramuyun ra masuang anak. Suguton Ku nabantuan ondo' binaal Kuno ramuyun. 10Ampos ru tinanom mino masuang kaga' saboi maukop ra sambilor. Mulu' poyo ingkualon min kalalaat suwo ru kinumos ra lair maa' raginio makapambulian ra ondo' kumoson bagu. 11Mayan Aku ramuyun ralalom ru Kim Kuno, am kalo toojo mangimpai ramuyun. 12 Sumbayaan Ku akau; masauk Aku ri Aki Kapuuno' min am akau masauk ra ulun Kuno. 13Aku Tuhan i Aki Kapuuno' min, nagibit ramuyun miningkual intor ra Misir maa' raginio kalo boo masauk kau ra inulipon. Pinandak Ku noyo kuasa' ondo' nangulipon ramuyun, am napasauk ramuyun ra ulun labus.”
Ukuman sabap ra kalo gumagaya'
(Sag. 28:15-68)
14 Indagu Tuhan, “Amon ru marara' kau gumagaya' ra susuban Kuno, ukumin kau. 15Amon ru marara' kau maya' ra ukum am susuban Kuno, am niayuk kalo manugut ra nabantuan ondo' binaal Kuli ramuyun, 16ukumin Ku akau. Porotongon Ku ramuyun baal makalalaa' – maruol ondo' kalo maalap kababas am salom, saboi moolou kau am maimbolo'. Magitanom kau kaa' papalo ayuk, sabap ra kalaan kau ru pantula' mino am mangakan ra ampos ru tinanom mino. 17Manggal Aku ramuyun saboi kalaan kau ru pantula'. Kuasaan kau ru ulun ondo' masisang ramuyun, am malaa' kau kaga' saboi magiru' kau kabalu' pana kolondo' ulun mangilou ramuyun.
18Amon ru malupus makaili' ra ngaangai' ukuman no lakat kau poyo kalo gumagaya' Raki', ruangin Ku ukuman no intulu' poyo ruli' no. 19Pandakon Ku kuasa' ondo' lilimbawan mino. Kalo rumatu' rasam saboi tana' mino mapua' am mokotog koson ra basi'. 20Ngaangai' pirot mino kolondo' onong, sabap ra tana' kalo manangampos am puun-puun kinawa' kalo mangkawa'.
21Amon ru lakat kau niayuk manggal Raki' am kalo gumagaya' Raki', ruangin Ku ukuman no intulu' ruli' poyo. 22Mangator Aku ra bibiag masigo ra tatanga' mino. Mamatoi bibiag-bibiag no ra anak-anak mino am mamuso ra bibiag tinambiag mino, saboi kukula' ngaulun kau ayuk soroi, am ralan-ralan mino mangasiluk.
23Amon ru nasauk noyo ngaangai' ukuman no, kaa' lakat poyo marara' kau mangining Raki' kaa' marayus niayuk manggal Raki', 24manggal Aku ramuyun am mangukum ramuyun intulu' ra makalalaa' poyo intor ra nakasail. 25Porotongon Ku pangayawan giu' ra pagun mino koson mangukum ramuyun, sabap ra lumungkang ra nabantuan Kuli ramuyun. Paat ra mantimung kau ralalom ru bandar koson makiampin, porotongon Ku maruol ondo' magibit ra patayan saboi makirakop kau kalalaat ra pantula' min. 26Kalo manaak Aku ramuyun ra akanon saboi mopor ngaulun ruandu' makapakuan ra rondo' ayuk intok pangansakan ra ruti' koson mangansak ra ngaangai' ruti' ondo' soroi. Tukuon ruti' no, makaakan kau pana raginio, lakat kau poyo maitilan.
27“Amon ru masauk noyo ngaangai' no, am lakat poyo manggal kau Raki' am marara' gumagaya' Raki', 28am mabaya' ra sangit manggal Aku ramuyun am mangukum ramuyun intulu' makalalaa' poyo intor ra nakasail. 29Maitilan kau kaga' saboi mangakan kau ra anak mino galama'. 30Mamuso Aku ra intok pampakanan mino giu' ra bulur-bulur no, mampalunsai ra altar-altar intok min monolob ra kaminyan, am mamatir ra baangkai mino ra rasawat ru sinungkalalaing ondo' natungkob no. Sabap ra majamalan, 31Mapalunsai Aku ra bandar mino am niayuk intok pampakanan mino. Kalo mangapu Aku ra taak intor ramuyun. 32Mapalunsai Aku lingon ra pagun mino, saboi pantula' ondo' minayan ra pagun min maliangan magilong ra mapara' makalalaa' kalunsayan raginio. 33Porotongon Ku pangayawan giu' ra pagun mino, am mantutuliar kau giu' ra pagun ru ulun bokon. Makai' kalunsai bandar mino am mokoloso pagun mino. 34-35Paat raginio, liliwa' kau soroi ralalom pamatiran giu' ra pagun ru pantula' mino, tana' ra kalo polosoon min makatangus no paat min inayanan, mokoloso boo am makatangus.
36“Mangkinibit Aku ramuyun ondo' pinatiran giu' pagun ru bokon malaa' kaga', saboi bolos ru raun ondo' siniob ru angin pana mangkinibit ramuyun magiru'. Magiru' kau saboi ilain ayuk ilowon ru pantula' ralalom pangayawan, am maratu' kau kabalu' pana kolondo' pantula' mamaar ramuyun. 37Makapansaru kau ra rondo' am bokon kabalu' pana kolondo' osoi pana mangilou ramuyun. Kalo makaanggal kau ra pantula'. 38Matoi kau ralalom pamatiran, am lobongon giu' ra pagun ru pantula'. 39Santayaran boborok intor ramuyun ondo' lakat poyo maayag giu' ra pagun ru pantula' no maimbolo' sabap ra tula min galama' am tula ru kinamatuaan min.
40“Kaa' papag mino mangiou ra tula nilono am tula ru kinamatuaan nilono ondo' minanggal Raki' am giminuor Raki', 41saboi mangkinibit Raki' minanggal risilo am namatir risilo giu' ra pagun ru pantula'. Pupus no, paat ra papag mino minggana' guang, am naukuman noyo sabap ra tula am guor nilo, 42 mangkara' Aku ra nabantuan Kuli ri Jakub, i Isak am i Abragam. Manalimbagu Aku ra bantu' Kuno koson manaak ra pagun no ra ulun Kuno. 43Kaa' makapagulu, musiti' pagun no kolondo' soroi ra mamagun no maa' raginio totopot makatangus. Musiti' ulun Kuno maukuman ra ngaangai' ukum, sabap ra marara' gumagaya' ra ukum am susuban Kuno. 44Kabalu' pana kon raginio, paat ra ilo soroi ra pagun ru pantula', kalo mangiruan Aku kapoam mapalunsai risilo ra malingon. Amon ru baalon Ku ginio, timbalos ru ginio mamutat ra nabantuan Kuno risilo, am Aku ti tupo Tuhan i Aki Kapuuno' nilo. 45Manalimbagu Aku ra nabantuan ondo' binaal Kuli ra kinamatuaan nilai paat ra Aku nagibit risilo miningkual intor ra Misir koson manulu' ra kuasa' Kuno ra ngaangai' bansa', am maa' raginio Aku, Tuhan makasauk ri Aki Kapuuno' nilo.”
46Ginio noyo ngaangai' ukum am susuban ondo' pinataak ru Tuhan ri Musa giu' ra rasawat ru Gunung Sinai ra ulun ru Israil.
Currently Selected:
IMAMAT 26: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.