JUANIS 9
9
Namabas i Jisus ra sangulun bolou
1Paat ri Jisus nangkiralan, nakito No sangulun ondo' noolou intor io inanak. 2Pangkuot maamaya' Nano Riso, “Mangingila', osoi ra tula nangkinibit ra ulun ti noolou intor ra io inanak? Tula nano galama' kia kapoam matuo nano?”
3Taam i Jisus, “Ulun ti noolou sala' ka sabap ra tula nano galama' kapoam tula ru matuo nano, kaa' koson ralalom kaayagan nano paintalangon kuasa' ri Aki Kapuuno'. 4Buoi matawang ayuk poyo, itakau musiti' mangandoi ra atan ondo' pakandayin ru Io ondo' nanusub Raki' i. Matong molondom no am paat raginio kolondo' sangulun pana makapangandoi. 5 Buoi Aku soroi poyo ra giti, Aku no mampakasinda ra ulun ru tana' ti.”
6Pakaindagu i Jisus ra ngaangai' ni, pantiwog Io ra tana' am kutowo' no tana' i. Pakupilo' No boo losok i ra mato ru ulun i. 7Indagu boo i Jisus riso, “Ongoi no panginjagup giu' ra kulam Siloam.” (Arati' ru Siloam no, ‘sinusub’.) Ginio ra ongoi ulun i panginjagup am ra io minuli', makakito io no.
8Pangkuot pasambalayan nano am niayuk ulun ondo' magail nakakito riso makikitaak, “Sala' ka kia ulun ragitio ondo' masalok manturung makikitaak?”
9Mokoondo' bokon minindagu, “Topot, io no.” Kaa' bokon i poyo minindagu ra, “Sala', pansalu no ayuk ulun ti.”
Kaa' ulun i nangiou ra, “Aku noyo io.”
10Pangkuot ilo riso, “Ati kulaan okou makakito boo raino?”
11Taam io, “Ulun ondo' inggalanin ri Jisus nangkutou ra tana', am pakupilo' No boo losok ra mato kuti am poyo minindagu Io, ‘Ongoi no panginjagup giu' ra kulam Siloam.’ Ongoi aku boo am pakapanginjagup, makakito aku boo.”
12Pangkuot ilo, “Ati boo ulun i?”
Taam io, “Tawa.”
Ulun ru Parisi mintutun toojo ra namabasan no
13-14Orou nangutawan ra tana' am namabasan ri Jisus ra ulun bolou i nakapaat ra orou Sabat. Ginio boo ibito' nilo ulun ondo' gili noolou ra ulun-ulun ru Parisi. 15Kuati' ru ulun-ulun ru Parisi ulun i, ati kulaan ra io makakito boo. Indagu io risilo, “Kinupilan mato kutu ru ulun i ra losok. Pakapanginjagup aku am makakito aku boo.”
16Mokoondo' kukula' ngaulun intor risilo i minindagu, konilo, “Ulun ondo' nambaal ragitio maaru' sala' ka intor ri Aki Kapuuno', sabap ra kalo gagayaan No aturan ru orou Sabat.”
Kaa' kon poyo ru bokon i, “Sala', ati kulaan sangulun makatula makapambaal ra kaimuagan koson raginio?” Ginio boo ra nagagansang ilo.
17Pangkuot poyo ulun-ulun ru Parisi ra ulun i, “Kamu, binabas No mato muni. Koson poyo raginio, guang mu, osoi Io?”
“Io ti sangulun nabi,” kon boo ru ulun i.
18Kaa' tingganai ru ulun ru Jaudi kalo nangintopot ragili noolou io am raino makakito boo, saboi piniau nilo poyo matuo nano. 19Ginio ra kuati' nilo, “Motopot kia gitio noyo anak min ondo' noolou intor io inanak? Amon ru io, ati kulaan io makakito raino?”
20Taam matuo nano, “Iou, akai ra anak, am noolou io intor io inanak. 21Kaa' kalo nakapandai akai ati kulaan io makakito raino, kapoam osoi namabas ra mato nano. Moonsoi kuatin min ayuk io, nasukor io no; io galama' makapambala' ramuyun.” 22Matuo nano minindagu koson raginio sabap ra nalaa' ilo ra tingganai ru ulun ru Jaudi no, sabap ra nakapaguguum ilo noyo ra osoi ayuk mangiou ra i Jisus noyo Mamamayag ondo' sinusub ri Aki Kapuuno', inggalarin ulun no mumpos ra baloi sambayangan. 23Ginio sabap ra minindagu boo matuo nano ra, “Moonsoi kuati' min ayuk io, nasukor io no.”
24Piawo' nilo poyo ulun binabas ni am konilo riso, “Pagibot no ralalom inggalan ri Aki Kapuuno' ra mindagu kou ra motopot! Nakapandai akai noyo ra ondo' namabas rirun i ulun makatula.”
25Taam io, “Makatula Io kia kapoam kalo, ginio kalo makapandai aku, ondo' ayuk napandayan kuno; ra gili noolou aku, kaa' raino makakito aku boo.”
26Ginio ra kuati' nilo poyo ulun i, “Atan binaal No rirun? Ati kulaan Io namabas ra mato muno?”
27Kon ru ulun i, “Nakapambala' aku no ramuyun, kaa' kalo nangkirongog kau. Kua poyo pakibala' kau? Masaga' kau lair sumauk ra maamaya' Nano?”
28Kaa' nangiis ilo riso, konilo, “Okou noyo maamaya' Nano, kaa' akai ti maamaya' ri Musa. 29Akai nakapandai ri Aki Kapuuno' minindagu ri Musa, kaa' ulun raginio kalo nakapandai akai ra intor nano.”
30Indagu boo ulun i, “Makaimuag toojo ragu min ti. Kua pai' kau pakapandai ra intor ru ulun i ondo' namabas ra mato kuti? 31Nakapandai takau ra kalo rongogon ri Aki Kapuuno' ulun makatula. Ondo' ayuk iowon ulun ondo' mangurumat Riso am niayuk mambaal ra kasagaan Nano. 32Intor poyo ra tana' ti biningkal, kalo igondo' korongog ra mokoondo' sangulun makapamabas ra mato ru ulun ondo' noolou intor ra io inanak. 33Amon ru ulun no sala' ka intor ri Aki Kapuuno', kolondo' atan-atan mabaal nano.”
34Konilo riso, “Okou ti makatula noyo intor ra okou inanak ayuk poyo; am mangila' kou boo kia ramon?” Ininggalaran nilo boo io mumpos ra baloi sambayangan i.
Bolou ra pagilangan ri Aki Kapuuno'
35Pakaining i Jisus raginio, tuumo' No ulun i am kuati' no, “Mangintopot kou kia ra Anak ru Ulun?”
36Taam ulun i, “Tuan, balai' aku osoi Io am mangintopot aku boo Riso.”
37Indagu boo i Jisus riso, “Nakakito kono Riso am Io noyo makimansunur rirun raino.”
38Kon ru ulun i, “Tuhan, mangintopot aku.” Igulatur io boo ra saang ri Jisus.
39Kon ri Jisus, “Aku minatong ra tana' ti mongoi pangakim, maa' raginio ulun noolou makakito am ulun makakito moolou boo.”
40Kukula' ngaulun ru Parisi ondo' soroi ra giu' i, nakaining ra rinagu Nani. Ginio ra pangkuot ilo Riso, “Atan, akai ti bolou kia rokoon Muno?”
41Taam i Jisus, “Amon ru noolou kau, kolondo' tula min. Kaa' nakaindagu kano ra kalo noolou kau, ginio ra tula mino pana tumilayun ayuk boo.”
Currently Selected:
JUANIS 9: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.