JUANIS 15
15
I Jisus puun ru anggur ondo' motopot
1“Aku noyo puun ru anggur ondo' motopot; i Ama' Ku noyo magagalung ra umo. 2Moonong pango Kuno ra kalo manangkawa' iruon No, am moonong pango ra manangkawa' intawangin No, maa' raginio makapangkawa' ra maawas poyo. 3Kinapasau kano ru pangilaan ondo' pinasaboi Kuno ramuyun. 4Rondon kano Raki' am Aku pana rumondon ramuyun. Pango kalo noyo makapangkawa' amon ru kalo soroi ra puun no. Mogondo' niayuk ramuyun, kalo makapangkawa' kau amon ru kalo rumondon Raki'.
5Aku noyo puun ru anggur am akau noyo pango. Osoi ayuk rumondon Raki', am Aku rumondon riso, makapangkawa' io ra maawas; kaa' amon ru kalo mangindangan Aku ramuyun, kalo makapambaal kau ra atan ayuk pana. 6Osoi ayuk kalo rumondon Raki', patirin koson ra pango am mapua' io boo. Pango koson raginio luluron am suruin ayuk. 7Amon ru rumondon kau Raki' am ragu Ku rumondon ra guang min, pakitaak kau ri Ama' ra atan ak kasagaan min am aniin kau. 8I Ama' katulayon ra akau manangkawa' ra maawas; gitio noyo ra akau mauligan ra maamaya' Kuno. 9Motogom Aku ramuyun nogondo' ri Ama' motogom Raki'. Rondon kano ra togom Kuno. 10Amon ru gumagaya' kau ra panusuban Kuno, rumondon kau ra togom Kuno. Ginio mogondo' ra Aku gumagaya' ra panusuban ri Ama', am rumondon Aku ra togom Nano.
11Ngaangai' ti pinabala' Ku ramuyun, maa' raginio masalok Aku mampakaansuk ramuyun am topot-topot kau maansukan. 12 Gitio noyo panusuban Kutu; kotogom kano ra rondo' am bokon, nogondo' ra Aku pana motogom ramuyun. 13Kolondo' togom maayo poyo intor ra togom ru sangulun ondo' mampataak ra painawo nano ra rangan nano. 14Amon ru gumagaya' kau ra panusuban Kuno, akau no rangan Kuno. 15Kalo boo sabiton takamin ra ulipon, sabap ra ulipon kalo makapandai ra ngaangai' ondo' baalon ru tuan nano. Kaa' sabiton takamin ra rangan Kuno, sabap ra ngaangai' ondo' norongog Kuno intor ri Ama', pinabala' Ku noyo ramuyun. 16Pai' ru akau nampili' Raki', kaa' Aku noyo nampili' ramuyun am inaru' takamin mongoi ra ati-ati ayuk am manangkawa' ra maawas, am kawa' mino tumilayun. Atan ayuk kitaakon min ralalom ru inggalan Kuno, aniin kau ri Ama'. 17Gitio noyo panusuban Kutu ramuyun; kotogom kano ra rondo' am bokon.”
Kasisangin kau ru ulun ru tana' ti
18“Amon ru kasisangin kau ru ulun ru tana' ti, karaa' min ra Aku galing nasisangan nilo. 19Amon ru magibaya' kau ra ulun ru tana' ti, maaru' tagamin kau koson ra ulun nilo galama'. Kaa' pinili' takamin noyo intor ra ulun ru tana' ti, am raino ti kalo boo mogondo' kau risilo. Ginio sabap ra akau kasisangin nilo. 20 Karaa' min rinagu Kuli; ‘Sangulun ulipon kalo maatang intor ra tuan nano.’ Amon ru nangimbolo' ilo Raki', mangimbolo' ilo niayuk ramuyun. Amon ru ragu Kuli sinugut nilo, ragu mino pana gagayaan nilo. 21Kaa' ngaangai' no baalon nilo ramuyun sabap ra akau maamaya' Kuno, am sabap ra kalo nakaulig ilo Riso ondo' nanusub Raki' i. 22Amon ru kalio Aku minatong am nambala' ra ngaangai' ti risilo, kolondo' tula nilo. Kaa' raino mailo ilo boo mindagu ra, ‘Kalo nakapandai akai ra natulaan akai.’ 23Osoi ayuk masisang Raki', Ama' Kuno pana kasisangin no. 24Amon ru kalo binaal Kuno ra saang nilo ondo' kalo igondo' baalo' ru ulun, kolondo' noyo tula nilo. Kaa' kabalu' pana nakakito ilo ra binaal Kuno, masisang ilo niayuk Raki' am Ama' Kuno. 25 Maa' raginio masugut ondo' tinulisan ra Ukum nilo, ‘Masisang ilo Raki' kabalu' pana kolondo' sasaban.’
26Porotongon Ku ramuyun Mangingindangan intor ri Ama'. Io no Ambiluo ondo' mambala' ra katapatan ri Aki Kapuuno' am Io niayuk mampaintutun Raki' ramuyun. 27Akau pana mampaintutun Raki', sabap ra nababaya' takano intor ra talimpuun i ayuk poyo.
Currently Selected:
JUANIS 15: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.