ABAKUK 2
2
Taam ru Tuhan ri Abakuk
1Magaloi aku ra manara ru ulun magalung, am maginaa ra atan ondo' paraguon ru Tuhan raki' am atan taam Nano ra nambutakan kuno.
2Taam Tuhan raki', “Tulisi' ra makito toojo atan ondo' pabalaan Kuno rirun, maa' raginio matasu' basaan. Tulisi' ngaangai' no ra batu panulisan intor ra tana' labu'. 3 Tulisi' tanou no sabap ra kalo poyo nasaboi orou koson masauk. Kaa' orou raginio mataki' matong am atan ondo' pabalaan Kuno rirun maaru' masauk. Kabalu' pana ilain ra orou raginio mabuoi matong, kaa' kulimano' ayuk; baal raginio maaru' masauk am kalo painjulon. 4 Gitio noyo tanou no: ‘Ulun ondo' nambaal ra kalaatan pusoon, kaa' ulun ondo' nambaal ra kasagaan ri Aki Kapuuno' maayag sabap ra gumagaya' ilo ri Aki Kapuuno'.’ ”
Kapusaan ru ulun malaat
5Kalangkayaan mamparuung ra ulun. Ulun ondo' mangingkaut no minsawat guang am magalabo. Koson ra kapatayan, ilo niayuk kalo igondo' kajala'. Ginio sabap ra ilo manguasa' ra bansa' am ra bansa' ra bokon. 6Ulun nanguasa' iison am asabin ru ulun ondo' kinuasa'. Konilo, “Aibui boo ramuyun sabap ra nangalap ra kuliamos ondo' sala' ka longgom min! Kula' poyo buoi min mapalangkaya' ra inan ra mampajajal ra ulun ondo' nagutang ramuyun koson mambayar ra utang?”
7Kaa' kalo nalimanan min, akau ondo' nanguasa' ra ulun bokon magutang niayuk am jajalin koson mambayar ra bunga'. Pantula' matong am mangkinibit ramuyun monontol ra malaa'. Gaawon nilo rapu' min! 8Nampagaau kau ra rapu' ru masuang bansa'. Kaa' raino bansa'-bansa' ondo' naayag mampagaau ra rapu' min sabap ra namatayan ondo' binaal min am sabap ra kalaatan min ra mamagun ru tana' ti am niayuk bandar-bandar ra tana' ti.
9Aibui boo ramuyun! Napalangkaya' kau ra sasambaloi min ra atan ondo' noowot min ra kalaatan. Nanambaloi kau ra mapiot koson manindung ra sasambaloi min intor ra karaat. 10Kaa' inatangan mino mampakauyu' ra sasambaloi min; am mamuso ra masuang bansa', maparatong kau ra katutukan ru inan galama'. 11Mulu' poyo ra batu-batu ru timbok pana gumolok mononsol ramuyun am lugu'-lugu' ru baloi miis am mamintanou golok no.
12Aibui boo ramuyun sabap ra nambaal kau ra bandar ondo' mimpuun ra kalaatan am nambaal raginio ra namatayan. 13Bansa'-bansa' ondo' kinuasa' min makai' ikang ra kolondo' onong; ngaangai' ondo' baalon nilo makai' kosolob ru apui. Tuhan Ondo' Maayo Kaga' Kuasa' nambaal ra baal ragitio. 14 Kaa' koson ra raat ondo' nototop ra timug, koson raginio noyo ra tana' ti pana mososok ra ulun ondo' makaulig ra Tuhan am kuasa' Nano.
15Aibui boo ramuyun sabap ra nabaya' ra sangit akau nagasab am nanauyu' ra sambalayan-sambalayan min; mangkinibit kau risilo kakasiling koson ra ulun magauk. 16Raino nasaboi paat min koson tauyuon am sala' ka urumaton. Pangurumatan ramuyun makulau masauk ra pagasaban. Jajalin kau ru Tuhan manginum intor ra sangkir ondo' suang no ukuman; manginum kau am mangkasiling. 17Nantagar kau ra puun-puun tataun giu' ra kataunan Libanon, kaa' raino akau galama' tagaron. Namatoi kau ra bibiag ra giu' no, kaa' raino ilaanon kau ru bibiag. Ngaangai' ti masauk sabap ra namatayan am kalaatan ondo' binaal min ra mamagun ru tana' ti am niayuk bandar-bandar ra tana' ti.
18Atan onong ru sinungkalalaing? Sinungkalalaing binaal ayuk ru ulun am ondo' noowot min intor raginio abau ayuk toojo. Atan kia kalabaan ondo' moowot ru ulun nambaal ra sinungkalalaing intor ra sinungkalalaing no? Sinungkalalaing kalo mindagu! 19Aibui boo ramuyun sabap mindagu kau ra saputul luton, “Tirong no!” kapoam mindagu ra rondo' batu maayo, “Ingkakat no!” Makaindagu kia sinungkalalaing rirun? Maaru' lair sinungkalalaing inangkupan ra pirok am mas, kaa' sinungkalalaing no kalo mamainawo.
20 Tuhan soroi giu' ra ralalom ru Baloi Nano ondo' matulai; ngaangai' ulun ru tana' ti musiti' mongkoror giu' ra saang Nano.
Currently Selected:
ABAKUK 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.