KASAUKAN 39
39
I Jusup am andu' ri Potipar
1Raino i Jusup inibit ru ulun ru Ismail ra pagun ru Misir am talano' nilo ri Potipar, iono sangulun intor ra pagawai ru raja' ondo' naningganai ra magagalung ru istana raja'. 2#Rin. 7:9Nagalung Tuhan ri Jusup saboi iawo io ra ngaangai' kondoyon nano. Minayan i Jusup ra tuan nano, ulun ru Misir no. 3Natutunan ru tuan nano ra nangindangan Tuhan no ri Jusup, am ginio boo ra iawo io ra ngaangai' kondoyon nano. 4Maansayan i Potipar riso am alapo' no i Jusup ra mangindangan ayuk riso, am paalungi' no ri Jusup baloi am ngaangai' rapu' nano. 5Intor raginio, mimpuun ri Jusup, nambarakat Tuhan ra ngaangai' ulun ra baloi ru ulun ru Misir no, ngaangai' rapu' nano ondo' soroi ra baloi am ondo' soroi ra umo nano. 6Pataako' ri Potipar ngaangai' kandoi nano ri Jusup, am intor raginio lumingongon io kalo manalingapu ra atan ayuk pana, ondo' ayuk am akanon nano.
I Jusup ti maindon am makainan ra mapanggol. 7Kukula' buoi raginio, andu' ri Potipar lumaai ri Jusup, am angati' no i Jusup makimarulug riso. 8Marara' i Jusup am indagu ra ruandu' no, “Ilai', tuan kuno lumingongon kalo manalingapu ra atan ayuk pana ra baloi ti, sabap ra soroi aku ragiti. Pinataak no raki' ngaangai' kandoi nano. 9Kuasa' kuno ra baloi ti mogondo' ra kuasa' nano, am kolondo' rondo' pana kalo pinasalingapuan raki' ondo' ayuk am okou ti. Ati koson kuno mambaal ra kalaatan raginio am makatula ri Aki Kapuuno'?” 10Kabalu' pana magangat andu' ri Potipar no ri Jusup ra moonong orou, marara' niayuk i Jusup rumulug ra ruandu' no.
11Paat ra rondo' orou napaat ri Jusup minumpos ra baloi koson mangandoi, kolondo' sangulun pana ulipon soroi ra baloi no. 12Bungkayuto' ru ruandu' no sukub ri Jusup am indagu, “Ibok parulug to.” Kaa' pakalabus io am pagiru' ingkual, am katatang sukub nano ra kalindu' ru ruandu' no. 13Kakito ru andu' ri Potipar ra nakapagiru' i Jusup am sukub nano natatang, 14piawo' no ulipon-ulipon nano am indagu, “Ilai' min gitio! Ulun ru Ibrani ondo' inibit ru ralaki kuno ragiti, magasab ritakau. Minumpos io ra lamin kuno am kinam panawo raki', kaa' pompogolok aku. 15Kaining no golok kuni, pagiru' io ingkual am sukub nati natatang.”
16Bulii' no sukub ri Jusup no saboi tingganai ru baloi no nakauli'. 17Tunungo' no ri Potipar nogondo' ra pinabala' no ra ulipon-ulipon nano, kono, “Ulipon ra ulun ru Ibrani ondo' inibit muno ragiti no minumpos ra lamin kuno am pagasab raki'. 18Kaa' pompogolok aku, pagiru' io ingkual am katatang no sukub nati ra sapapa' kuti.” 19Siminangit kaga' i Potipar, 20am parakapi' no i Jusup am aputo' ra nangaputan ra ulun makasala ra raja'. Giu' noyo inayanan ri Jusup. 21#Rin. 7:9Kaa' nagalung am nambarakat Tuhan no ri Jusup saboi tingganai magagalung ra pangaputan no maansayan ri Jusup. 22Ginio ra paningganayo' ru tingganai magagalung ra pangaputan no i Jusup ra ulun-ulun inaput ra bokon no, am pakandayi' no ri Jusup ngaangai' kandoi ra giu' no. 23Kalo pana boo kondoyon ru tingganai magagalung no atan ondo' pinakandayan no ri Jusup, sabap ra magalung Tuhan no ri Jusup saboi iawo io ra atan ayuk kondoyon nano.
Currently Selected:
KASAUKAN 39: TMT
Highlight
Copy
Compare
Share
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
