IJRA 10
10
Inatangan koson mompolonggo' ra paguatan maratok
1Liliwa' nantangi' igulatur i Ijra koson makiasi' am mangiou ra saang ru Baloi ru Tuhan. Liliwa' raginio masuang ulun ru Israil – ungkuyon, ruandu' am lalaing – minatong timinimung limpu riso; ilo niayuk sasisikok nantangi'. 2I Sikania anak ri Jiwil, sangulun intor ra bansa' ri Ilam pana mindagu boo ri Ijra, “Makatula akai noyo ra Tuhan sabap ra nanangandu' ra ruandu' ru bansa' ra bokon. Kabalu' pana koon raginio, lakat poyo mokoondo' ra kalansanan ra Israil. 3Ibok no pagibot takau ri Aki Kapuuno' ra pagiruon takau ngaangai' ruandu' no am anak-anak nilo. Bayaan mai pinson muno am pinson ru ulun ondo' siminugut ra susuban ri Aki Kapuuno'. Gagayaan mai Ukum ri Aki Kapuuno'. 4Guguang muno mambaal sabap ra ginio noyo pinalansan rirun. Maya' akai rirun ra sotopot no. Guguang muno mambaal ra malasang saboi baal raginio masalasai.”
5Ginio ra tumalimpuun i Ijra mingkuor ra manusub ra tingganai-tingganai ru imam, ulun-ulun ru Liwi am ulun ru Israil ra bokon magibot ra baalon nilo inatangan ri Sikania. 6Kopongo ilo nagibot, minongoi i Ijra intor ra tampilon ra saang ru Baloi ru Tuhan minongoi ra intok inayanan ri Joganan anak ri Ilyasib. Nombolong i Ijra ra giu' no ra rondom am mangiluk guang sabap ra mangkara' ra kolondo' gagaya' ru ulun intor ra pamatiran no. Kalo nangakan kapoam nanginum io ra atan pana.
7Pinatanou boo giu' ra titikop ru Jirusalim am Jiuda ra ngaangai' ulun ondo' minuli' intor ra pamatiran, musiti' sumaang ra rondo' pantuuman giu' ra Jirusalim. 8Ginio noyo susuban ra tingganai-tingganai ru mamagun. Osoi ayuk ondo' kalo makasaang ralalom ru talu ngoorou, ngaangai' rapu' longgom nano talingaawon, am io kalo boo karaan koson ra ulun ru bansa' ru Israil. 9Ralalom ru buoi talu ngoorou, iono paat ra orou karuo ngoopor ra sila' kasiam, ngaangai' ungkuyon ondo' minayan giu' ra tampilon ru Jiuda am Binjamin minatong ra Jirusalim am natimung giu' ra liliut Baloi ru Tuhan. Paat ra orou raginio, riminasam ra maawas. Ngaangai' ulun nonontol sabap ra nasimuan am niayuk sabap ra maatang pantuuman raginio.
10Imam Ijra pana minigor boo am indagu ra ulun raginio, “Makatula kau noyo am rinuangan kasalaan ru Israil sabap ra nanangandu' ra ruandu' ru bansa' ra bokon. 11Ginio boo sabap ra iowo' noyo tula mino ra saang ru Tuhan, i Aki Kapuuno' ru kinamatuaan min am baalo' noyo atan ondo' makabansuk ra guang Nano. Inggalur kau intor ra ulun ru bansa' ra bokon ondo' minayan ra pagun takau, am pagiruo' ngaangai' andu' min ondo' bansa' ra bokon no.”
12Ngaangai' ulun no timinaam ra matangil, “Baalon mai atan ayuk raguon muno tuan.” 13Kaa' konilo poyo, “Pantimungan ti maayo kaga', rasam ti pana maawas. Kalo boo tumaan akai migor ra intok ondo' malimparang ti. Inambai poyo ra baal ragitio sala' ka baal ondo' maalap kasalasai ralalom ru songorou kapoam ruo ngoorou, sabap no ra masuang kaga' ra gino ngai' mai ondo' nakalabit ra tula ti. 14Iowo' noyo tingganai-tingganai maino mayan giu' ra Jirusalim koson manalingapu ra baal ragitio. Kopongo raginio moonong ulun ondo' makaandu' ra bansa' ra bokon musiti' matong ra giu' no ra paat inaru' noyo, am mongoi mababaya' ra tingganai am akim ru bandar ru sigagama'. Koon ra ralan raginio i Aki Kapuuno' kalo boo sumangit ritakau sabap ra baal raginio.” 15Kolondo' sangulun pana minansang ra inatangan raginio ondo' ak am i Jonatan anak ri Asail am i Jagjiya anak ri Tikwa. Sinaung ilo ri Misulam am i Sabitai, sangulun Liwi.
16Ilo ondo' minuli' intor ra pamatiran no masaga' noyo mangapu ra inatangan no. Ginio ra, Imam Ijra nampalantik ra kukula' ngaulun tingganai ru bansa' ru Israil am nanulis ra inggalan nilo. Paat ra orou kasaa' ra sila' koopor, tinalimpuunan nilo nangimumui ra baal raginio. 17Ralalom ru buoi talu ngansila', nopongo ilo nangimumui ra ngaangai' ungkuyon ondo' makaandu' ra bansa' ra bokon.
Ungkuyon ondo' makaandu' ra bansa' ra bokon
18Gitio noyo suang ru ungkuyon ondo' makaandu' ra bansa' ra bokon:
Imam-imam, nakatulis sumugut ra bansa' nano;
Bansa' ri Jisua am pabukat-pabukat nano, iono anak-anak ri Jojadak: I Maasiya, Iliijir, Jarib am Gidalia. 19Nambantu' ilo mangali ra andu'-andu' nilo, am ilo pana nampataak ra sanginan domba gawayan koson ra taak simbalui koson mangampun ra tula.
20Bansa' ru Imir: I Ganani am Jibaja.
21Bansa' ru Garim: I Maasiya, Ilia, Simaya, Jiwil am Ujia.
22Bansa' ru Pasyur: I Ilyoinai, Maasiya, Ismail, Nitaniil, Jojabad am Ilasa.
23 Ulun ru Liwi:
I Jojabad, Simii, Kilaya (sabiton niayuk ri Kilita), Pitaya, Juda am Iliijir.
24 Ulun-ulun maririmbai:
I Ilyasib.
Ulun-ulun magalung ra kulobon garabang ru Baloi ru T UHAN:
I Salum, Talim am Uri.
25 Ulun ru Israil ra bokon:
Bansa' ru Paros: I Ramia, Jijia, Malkia, Miyamin, Iliajar, Malkia am Binaya.
26Bansa' ru Ilam: I Matanya, Jakaria, Jiwil, Abdi, Jirimot am Ilia.
27Bansa' ru Jatu: I Ilyoinai, Ilyasib, Matanya, Jirimot, Jabad am Ajija.
28Bansa' ru Bibai: I Joganan, Gananya, Jabai am Atlai.
29Bansa' ru Bani: I Misulam, Maluk, Adaya, Jasub, Sial, Jiramot.
30Bansa' ru Pagat Moab: I Adna, Kilal, Binaya, Maasiya, Matanya, Bijalil, Binui am Manasi.
31-32Bansa' ru Garim: I Iliijir, Jisia, Malkia, Simaya, Simion, Binjamin, Maluk am Simarya.
33Bansa' ru Gasum: I Matnai, Matata, Jabad, Ilipilit, Jirimai, Manasi am Simii.
34-37Bansa' ru Bani: I Maadai, Amram, Uil, Binaya, Bidiya, Kilugu, Wanya, Mirimot, Ilyasib, Matanya, Matnai am Jaasai.
38-42Bansa' ru Binui: Simii, Silimia, Natan, Adaya, Maknadbai, Sasai, Sarai, Ajariil, Silimia, Simarya, Salum, Amarya am Jusup.
43Bansa' ru Nibo: Jiyil, Matisa, Jabad, Jibina, Jadai, Joil am Binaya.
44Ngaangai' ulun no nanangandu' ra ruandu' bansa' ra bokon. Andu'-andu' nilo pana inali am pinagiru' nababaya' ra anak-anak nilo.
Currently Selected:
IJRA 10: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.