KAINGKUALAN 5
5
Timinuum i Musa am i Arun ra raja' ru Misir
1Ongoi boo tuum i Musa am i Arun ra raja' ru Misir am indagu, “Koson ragitio ragu ru Tuhan i Aki Kapuuno' ru ulun ru Israil, ‘Paugaro' noyo ulun Kuno maa' raginio makasambayang ilo Raki' giu' ra tana' kaagisan.’ ”
2“Osoi kia Tuhan no?” nangkuot raja' no. “Kua kia ru musiti' rongogon ku Io am mapaugar ra ulun ru Israil? Kalo nakaulig aku ra Tuhan no, am kalo paugaron ku ulun ru Israil.”
3Indagu i Musa am i Arun, “Minintalang noyo i Aki Kapuuno' ru ulun ru Ibrani no ramon. Iowo' akai noyo mongoi ra tana' kaagisan, ra galur talu ngoorou pangkiralanan mapataak ra taak simbalui ra Tuhan i Aki Kapuuno' mai ngai'. Amon ru kalo mambaal ragitio, mamatoi Io ramon ngaangai' ra maruol kapoam pangayawan.”
4Indagu raja' no ri Musa am i Arun, “Kua kinibiti' min ngaangai' ulun no mampalilian ra kandoi nilo? Susubo' ulipon raginilo mangandoi! 5Bansa' min masuang noyo intor ra ulun ru Misir. Raino masaga' kau lumonggo' ilo mangandoi!”
6Paat ra orou raginio niayuk nanusub raja' ru Misir ra tingganai ru ulipon ra bansa' ru Misir am mandur ra bansa' ru Israil. Kon ru raja' no, 7“Pai' anii' bansa' raginilo ra rami mambaal ra batu bata. Polosoon ilo galama' maguyum. 8Kaa' susubo' ilo mambaal ra batu bata koson ragili suang nali; pai' irurui' suang no kabalu' pana rondo'. Kalo nosonong ilo ra kandoi, ginio sabap ra makitaak ilo mugar mapataak ra taak simbalui ri Aki Kapuuno' nilo. 9Jajalin ulun raginilo mangandoi ra maagat poyo, maa' raginio kumantisuk ilo ra kandoi am kolondo' boo kaluagan mangining ra tunung abawon ayuk.”
10Tingganai ru ulipon ra bansa' ru Misir am mandur ra bansa' ru Israil miningkual am indagu ra ulun ru Israil, “Nanusub raja' ra kalo boo aniin kau ra rami. 11Musiti' akau galama' mongoi paguyum ra rami ra ati ayuk kaawatan min. Kaa' musiti' kau mambaal ra batu bata koson ra kinasuang ragili.” 12Ginio ra ongoi ulun ru Israil ra titikop pagun ru Misir maguyum ra rami. 13Tingganai-tingganai ru ulipon no narayus nangulisok maa' raginio moonong orou mambaal ulun ru Israil ra batu bata koson ra kinasuang ondo' binaal paat ilo inanian ra rami ragili. 14Tingganai ru ulipon no napalamba' ra mandur ra bansa' ru Israil ondo' sinusub magalung ra kandoi no. Pangkuot ilo, “Kua kalo binaal min batu bata koson ra kinasuang ragili?”
15Ongoi boo tuum mandur no ra raja' am pambala', “Kua baalo' mu raja' baal ragitio ramon? 16Kalo inanian akai ra rami, kaa' jinajalan akai mambaal ra batu bata. Raino lambaan akai, ali ka ulun muno ondo' makasala.”
17Taam raja', “Andang ru akau matiar am marara' mangandoi. Ginio nai ra akau makitaak mongoi papataak ra taak simbalui ra Tuhan. 18Raino ongoi kau poyo pangandoi. Kalo aniin kau ra rami, kaa' musiti' mambaal kau ra batu bata koson ra kinasuang ragili.” 19Nakaliman mandur no ra makakapaganan ilo paat binalaan ra moonong orou inaru' toojo ra pambaalon ilo ra batu bata koson ra kinasuang ragili.
20Pakaingkual mandur no intor ra istana, ongoi ilo tuum ri Musa am i Arun ondo' tatanga' maginaa risilo. 21Konilo ri Musa am i Arun, “Nakakito Tuhan ra atan binaal min. Mangukum Io ramuyun! Akau noyo nangkinibit ra raja' am ulun nano masisang ramon. Nangani' kau risilo ra sasaban koson mamatoi ramon.”
Nambutok i Musa ra Tuhan
22Tuum boo i Musa ra Tuhan am indagu, “Iou Tuhan, kua imboloo' Mu ulun Muno? Kua susubo' Mu aku mongoi ragiti? 23Intor ra aku timinuum ra raja' am minindagu ralalom inggalan Muno, nangimbolo' noyo raja' no ra ulun Muno. Okou pana kalo nambaal ra rondo' pana koson mangindangan risilo!”
Currently Selected:
KAINGKUALAN 5: TMT
Highlight
Copy
Compare
Share
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
