IPISUS 3
3
Kandoi ri Paulus ra ulun sala' ka Jaudi
1Ginio nai boo puun ra aku, i Paulus, inaput, sabap ra aku sangulun mangangandoi ri Jisus Kristus koson ra kaatangan ramuyun ondo' sala' ka ulun ru Jaudi. 2Maaru' nakapandai kano ra maya' ra kataawan ri Aki Kapuuno' aku inanian ra kandoi ti koson ra kaatangan min. 3Ioginio ati kulaan i Aki Kapuuno' nampaintalang raki' ra inatang No ra kalo igondo' pinabala' i, koson tinulisan ku noyo gini kariwaa'. 4 Am amon ru basaan min tinulisan kuni, makarati' kau ra ati kulaan kaintutunan kuno ra sauk ondo' kalo igondo' pinabala', ioginio ondo' binaal ri Kristus. 5Gili gitio kalo igondo' pinabala' ra ulun, kaa' raino pinaintalang noyo ri Aki Kapuuno' mansail ra Ambiluo Nano ra rasul-rasul am nabi-nabi ondo' matulai. 6Gitio io ti: Sabap ra Tanou Moonsoi no, ulun sala' ka Jaudi pana mokoowot ra barakat ri Aki Kapuuno' mabaya' ra ulun ru Jaudi. Ilo karuo ti masauk koson ra rondo' inan, koson ulun sala' ka Jaudi pana mokoowot ondo' binantu' ri Aki Kapuuno' mansail ra pasimpungan nilo ri Jisus Kristus.
7Aku sinauk ra sangulun mampasaboi ra Tanou Moonsoi no sabap ra kataawan ri Aki Kapuuno' raki' mansail ra ikang ru kuasa' Nano. 8Sotopot no, kabalu' pana ra aku ti nakatauli intor ra ngaangai' ulun ri Aki Kapuuno', kaa' inanian aku niayuk ri Aki Kapuuno' ra kandoi mampasaboi ra ulun sala ka Jaudi ra Tanou Moonsoi intor ra kalangkayaan ri Kristus ondo' kalo noyo mauntob. 9Mampakito aku ra ngaangai' ulun ra inatang ri Aki Kapuuno' ondo' kalo igondo' pinabala' ti. Nga Io ondo' nampasauk ra ngaangai' limbowon am tana' ti, kalo nambala' Io ra inatang Nano intor ragili. 10Maa' raginio koson ra raino ti, mansail ra pasimpungan ulun Kristian, mampakito i Aki Kapuuno' ra kapintaran Nano ra mangunguasa' am kaikangan ru limbowon ti. 11Am gitio binaal ri Aki Kapuuno' sumugut ra atan ondo' inatang No kalalair i ralalom ri Jisus Kristus, Tuhan takau. 12Sabap ra pasimpungan am pangintapatan takau ri Kristus makakau' takau minggaar ri Aki Kapuuno' am intopoton noyo ra itakau rongogon No. 13Ginio ra pai' kano kaimamang kabalu' pana ra aku imboloon koson ra kaatangan min. Sabap ra sotopot no, ngaangai' ru gitio mangindangan ramuyun.
Togom ri Kristus
14Ginio ra aku migulatur, koson makiasi' ri Ama'. 15Io no ondo' mangani' ra painawo ra ngaangai' maayag giu' ra suruga' am niayuk giti ra tana' ti. 16Makiasi' aku Riso, ra intor ra kalangkayaan ru barakat Nano, mangani' Io ramuyun ra Ambiluo Nano, koson mampaikang ra guang mino, 17am koson ra i Kristus rumondon ra guang min mansail ra pangintapatan. Am makiasi' aku poyo koson togom Nano masauk ra puun ru paliso mino, 18koson akau am ngaangai' ulun ri Aki Kapuuno' makaintutun ra kinapila', kinaawar, kinasawat am kinalandom ru togom ri Kristus no. 19Ginio maalur poyo intor ra pangkaraan ru ulun. Bagu no makapaliso kau ra moonsoi toojo, mogondo' ra ngaangai' ru kinatanda' ri Aki Kapuuno'.
20Koompor noyo i Aki Kapuuno', ondo' mansail ra kuasa' Nano ondo' mangandoi ra guang takau maalap kabaal mulu' poyo intor ra atan ayuk kitaakon kapoam guangon takau. 21Koompor noyo Io ra pasimpungan ulun Kristian ralalom inggalan ri Kristus Jisus, suku' ra ati ayuk papag ra sabuoi-buoi no. Amin!
Currently Selected:
IPISUS 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.