RINALATAN 8

1I Saulus niayuk nangiou ra namatayan ri Stipanus.

Nangimbolo' i Saulus ra pasimpungan ulun Kristian

Orou ragili niayuk pasimpungan ulun Kristian ra Jirusalim inimbolo' ra maaja'. Ngaangai' ulun nangintopot nantutuliar pagiru' ra Judia am niayuk Samaria, kaa' rasul-rasul ayuk kalo. 2Mokoondo' kukula' ngaulun ondo' sumugut toojo ri Aki Kapuuno' nompolobong ra baangkai ri Stipanus, am tangii' nilo boo io.

3 # Rin. 22:4-5; 26:9-11 Kaa' i Saulus mangkinam mamuso risilo. Ginio ra mongoi io ra baloi nilai am ralaaton no ulun-ulun nangintopot am pasubolon no ilo ra lamin pangaputan.

Tanou Moonsoi pinasaboi giu' ra Samaria

4Ulun-ulun nangintopot ondo' nantutuliar minongoi ra ati ayuk intok am nampasaboi ilo ra Tanou Moonsoi ra ati ayuk kasukuan nilo. 5I Pilipus niayuk minongoi ra pekan maatang ra Samaria#pekan maatang giu' ra Samaria; Kukula' naskhah mokoondo': pekan. am pampatanou ra ulun ondo' minayan ra giu' i ra i Jisus no Mamamayag ondo' sinusub ri Aki Kapuuno'. 6Paat ra ulun-ulun no nokorongog ra rinagu ri Pilipus am nakakito ra kaimuagan binaal no, nampaguang ilo toojo raginio. 7Sabap ra masuang riwato ondo' siminubol ra ulun miningkual intor risilo liliwa' gogolok am masuang niayuk ulun kalo makalulu' am kimpo' nababas. 8Ginio ra nakaansuk tojojo ulun ru bandar Samaria i.

9Giu' no mokoondo' niayuk sangulun ungkuyon makainggalan ri Simon. Nabuoi noyo io nambaal ra ulun Samaria mangaliangan koson magilong ra baal kaimuagan nali. Io rokoon sangulun mapandai mangingilong, 10am ngaangai' ondo' minayan ra bandar i pana siminugut riso. Konilo, “Io ti makakuasa' intor ri Aki Kapuuno' ondo' kauligan ra ‘Kuasa' Maayo’ no.” 11Ginio ra rongogon nilo io, sabap ra nabuoi noyo kapandayan nali namunduk ra guang nilai. 12Kaa' nangintopot ilo ra bala' ri Pilipus, ioginio Tanou Moonsoi intor ra Pamarintaan ri Aki Kapuuno' am i Jisus Kristus, am riniu' ilo, ungkuyon am niayuk ruandu'. 13I Simon galama' pana nangintopot ra Tanou raginio. Kariu' io raiti am baya' io ayuk boo ri Pilipus, am nangimuag io nakakito ra tatandu' am kaimuagan ondo' binaal ri Pilipus.

14Kaining boo rasul-rasul ru Jirusalim ra ulun Samaria nangapu ra Tanou Moonsoi, susubo' nilo boo i Pitrus am i Juanis minongoi ra giu' i. 15Pakasaboi ilo ayuk ra giu' i, nakiasi' ilo koson ra ulun nangintopot no makaalap ra Ambiluo ri Aki Kapuuno'. 16Sabap ra kolondo' ra sangulun intor risilo i nokoowot raginio. Ilo ti riniu' ayuk poyo ralalom inggalan ri Jisus. 17Ginio ra pabantaa' boo ri Pitrus am i Juanis kalindu' nilai ra ulun-ulun no, am ilo pana nokoowot ra Ambiluo ri Aki Kapuuno'.

18I Simon nakakito ra Ambiluo ri Aki Kapuuno' pinataakan ra ulun paat ra rasul-rasul napabanta' ra kalindu' nilai ra ulun i. Ginio boo ra pagibit io ra ruit ri Pitrus am i Juanis, 19am indagu, “Pataako' raki' niayuk kuasa' raginii, maa' raginio amon ru pabantaan ku kalindu' kutu ra osoi ayuk pana, ulun no mokoowot ra Ambiluo ri Aki Kapuuno'.”

20Kaa' taam i Pitrus, “Mausung kou mabaya' ra ruit muno, sabap ra indoson muno kia ra maalap mu kabali taak ri Aki Kapuuno'! 21Kolondo' tayar muno ralalom kandoi mai, sabap ra guang muno kalo motopot ra pagilangan ri Aki Kapuuno'. 22Talikur kono ayuk ra paliso malaat muno, am pakiasi' no ra Tuhan maa' raginio pangkaraan muno ra malaat no ampunon No! 23Sabap ra nakapandai aku ra guang muno mapanu' ra solon am lakat kou ayuk poyo kinuasa' ru tula.”

24Indagu i Simon ri Pitrus am i Juanis, “Indangano' min aku makiasi' ri Aki Kapuuno' koson kalo matiu' aku ra atan ayuk ondo' rinagu min ra raitii' ni.”

25Kopongo ilo nangani' ra sasi' am nampatanou ra bala' ru Tuhan, i Pitrus am i Juanis siminaguli' ra Jirusalim. Ralalom pangkiralanan nilai nampasaboi ilo ra Tanou Moonsoi ti ra ati ayuk pekan ru ulun ru Samaria.

I Pilipus am sangulun pagawai intor ra Itiopia

26Mokoondo' rondo' malaikat ru Tuhan minindagu ri Pilipus, “Tampos no am ongoi ra tampilon ra rabugus,#tampilon ra rabugus; kapoam: paat ra tanga' ru orou. giu' ra ralan Jirusalim ondo' mongoi ra Gaja.” (Ralan i kalo boo bayain.)#Ralan i kalo boo bayain; kapoam: masiluk. 27-28Ginio ra tampos boo i Pilipus am ugar io. Giu' ra tanga' ru ralan i mokoondo' sangulun pagawai Itiopia ondo' mangkiralan muli' ra pagun nali. Io ti pagawai ondo' magalung ra ngaangai' rapu' ri Kandaki, raja' ruandu' ru pagun Itiopia. Pagawai i minongoi sambayang giu' ra Jirusalim ra sumamba ri Aki Kapuuno', am raino mangkiralan muli'. Nanturung io ra sinakayan nali liliwa' mambasa' ra kitab Nabi Jisaya. 29Indagu Ambiluo ri Aki Kapuuno' no ri Pilipus, “Inggaari' sinakayan nano.” 30Pasimbul i Pilipus am inggaari' no sinakayan i am korongog no ulun no nambasa' ra kitab Nabi Jisaya. Pangkuot i Pilipus riso, “Mangarati' kou kia ra binasa' muno?”

31Taam ulun no, “Ati kulaan aku mangarati' amon ru kolondo' ulun mapaintutun raki'?” Kimaiti' no boo i Pilipus siminakoi, am pagumbir ilo nanturung. 32#Jis. 53:7-8Gitio noyo ondo' binasa' nali, ioginio:

“Koson Io ra domba ondo' potoyon;

koson ra anak domba mongkoror paat ra lamparin ra bulu;

koson niayuk Riso, kalo minindagu Io.

33Tinauyu' Io am inakim Io ra kalo motopot.

Bayag Nano napuso ra tana' ti,

saboi kolondo' sangulun pana makapantunung ra papag Nano.”

34Indagu pagawai no ri Pilipus, “Balai' aku, osoi kia kon ru nabi i? Io kia galama' kapoam ulun ru bokon?” 35Intor ra tinulisan ru nabi raginio pambala' i Pilipus ra Tanou Moonsoi ri Jisus. 36Paat ra ilo nanunggul ra pangkiralanan nilai, pakasuku' ilo ra intok makatimug. Indagu pagawai no, “Ilai', giti makatimug. Atan poyo manginga' raki' ra aku riwon?” [37Indagu i Pilipus, “Mariu' tokou amon ru mangintopot kou toojo.” Taam io, “Mangintopot aku ra i Jisus Kristus i noyo Anak ri Aki Kapuuno'.”]#Ragu ragitio kolondo' ra kukula' naskhah nakalair.

38Panusub boo pagawai no mampauog ra sinakayan nano. Pakauog ayuk tuun ilo karuo, am tapung ra timug am riwo' io boo ri Pilipus. 39Pakaasak ilo, ibito' i Pilipus ru Ambiluo ru Tuhan intor ra giu' i. Kalo boo nakito io ru pagawai i, am tungguli' nilo boo pangkiralanan nabaya' ra kaansukan. 40I Pilipus pana nakaliman ra giu' io noyo ra Asdod. Ongoi io ra ngaangai' intok ru libung ragitio am mampatanou ra Tanou Moonsoi intor ri Jisus saboi nakasuku' io ra Kaisaria.

Currently Selected:

RINALATAN 8: TMT

Highlight

Copy

Compare