RINALATAN 13
13
I Barnabas am i Saulus pinili' am sinusub
1Ralalom pasimpungan ulun Kristian ra Antiokia, mokoondo' kukula' ngaulun nabi am niayuk mangingila'. Ilo ti am i Barnabas, Simon ondo' sabiton ri Maitom, Lukius intor ra Kirini, i Minaim ondo' tinalanak nabaya' ra gabenor Irodis#gabenor Irodis; Irodis Antipas ondo' namarinta ra Galilia. (Ilai' ra Luk. 3:1). am niayuk i Saulus. 2Igondo' ragili, tatanga' ilo sambayang am nampali, indagu Ambiluo ri Aki Kapuuno' no risilo, “Pasuayo' min i Barnabas am i Saulus koson mangangandoi raki' ra kandoi ondo' inaru' Ku noyo risilo.”
3Kopongo ilo nampali am nakiasi', pabantaa' nilo kalindu' nilai ri Barnabas am i Saulus. Susubo' nilo ruo ngaulun i mugar.
Giu' ra pulu' Siprus
4Pakapanusub ayuk Ambiluo ri Aki Kapuuno' risilo, ongoi i Barnabas am i Saulus ra Siliukia. Intor ra giu' i siminundoi ilo ra pulu' Siprus. 5Pakasaboi ra Salamis, nampasaboi ilo ra bala' ri Aki Kapuuno' ra baloi sambayangan. Nangindangan i Juanis Markus risilo.
6Inongoi nilo ngaangai' intok ra pulu' no, saboi nakasuku' ra Papos. Giu' i nakatuum ilo ra sangulun mangingilong, makainggalan i Bar-Jisus, ulun ru Jaudi ondo' migiangku ra io no sangulun nabi. 7Io ti noyo rangan ri Sirgius Paulus, gabenor ru pulu' no, sangulun mapintar. Nampiau gabenor no ri Barnabas am i Paulus sabap ra masaga' io mangkirongog ra bala' ri Aki Kapuuno'. 8Kaa' i Ilimias, (ginio inggalan ri Bar-Jisus ralalom ragu Junani), mangingilong i, nanginga' risilo. Nangkinam io mangkinibit ra gabenor no kalo mangintopot ri Jisus. 9Kaa' i Saulus (ondo' niayuk sabiton ri Paulus), kinuasa' ru Ambiluo ri Aki Kapuuno' am ponontong io ra mangingilong i 10am indagu, “Okou no anak ru Tingganai ru riwato! Okou pantula' ru ngaangai' moonsoi. Mototop kou ra ruung malaat am manumbalik kou ra pangilaan motopot intor ra Tuhan!#pangilaan motopot intor ra Tuhan; Harfiah: Ralan ru Tuhan. 11Ilai' raino, ukumin kou ri Aki Kapuuno'. Moolou kou am kalo makakito kou mato ru orou ra kukula' buoi!”
Paat ragili niayuk nalimanan ri Ilimias ra mokoondo' nanili ra mato nali, saboi kakakama' no ayuk boo mugar am makikitang io ra ulun. 12Paat ra gabenor no nakakito ra nasauk ni, nangintopot io ri Jisus, sabap ra nabunduk toojo guang no ra pangilaan ru Tuhan.
Giu' ra Antiokia ra libung ru Pisidia
13I Paulus am rangan-rangan nano siminakoi ra kapal ra Papos mongoi ra Pirga, giu' ra libung ru Pampilia. Kaa' tatango' ilo boo ri Juanis Markus ra giu' i am saguli' io boo ra Jirusalim. 14Intor ra Pirga, tungguli' nilo poyo pangkiralanan nilai mongoi ra Antiokia ra libung ru Pisidia. Paat ra orou Sabat, minumpos ilo ra baloi sambayangan am nanturung ra giu'. 15Kopongo binasa' Ukum ri Musa am Kitab ru Nabi-nabi, tingganai-tingganai ru baloi sambayangan nanusub ra ulun mangkuot ri Paulus am rangan-rangan nano, konilo, “Pabukat kau, amon ru mokoondo' paraguon min koson mangila' ra ulun ragiti, posoboyo' min ayuk.” 16Bigor boo i Paulus am nangani' risilo ra pulanu am indagu io;
“Pabukat kau ngaangai', ondo' ulun ru Israil am niayuk bansa' ru bokon ondo' sumamba ri Aki Kapuuno', rongogo' min pambalaan kutu ragitio: 17#Kai. 1:7; 12:51Nangaru' i Aki Kapuuno' ra kinamatuaan takali masauk ra bansa' kauligan toojo, paat ra ilo pinaayan giu' ra Misir koson ra ulun bansa' ru bokon. Ra kuasa' maayo Nano, nampalabus i Aki Kapuuno' risilo intor ra Misir i. 18#Un. 14:34; Sag. 1:31Buoi ru apat ngoopor ngambilor nokoorot#nokoorot; Kukula' naskhah nakalair: nagalung. Io risilo giu' ra tana' kaagisan. 19#Sag. 7:1; Jos. 14:1Pinuso No tulu' ringai' bansa' ra tana' ru Kanaan i am pataaki' no pagun raginio risilo koson ra longgom nilo. 20#Tin. 2:16; 1 Sam. 3:20Ngaangai' raginio nasauk buoi 450 ngambilor ragili.
Kopongo ragili,#Ngaangai' raginio nasauk buoi 450 ngambilor ragili. Kopongo ragili; kapoam: Olo'-olo' pakasail 450 ngambilor. anii' ilo boo ri Aki Kapuuno' ra akim suku' i Nabi Samuil. 21#1 Sam. 8:5; 10:21Paat ra ilo nakitaak ra raja', anii' ilo ri Aki Kapuuno' ra sangulun anak ri Kis intor ra tayar ru Binjamin, iono i Saul, koson namarinta buoi apat ngoopor ngambilor. 22#1 Sam. 13:14; 16:12; Mzm. 89:21Kopongo i Saul ininggi', papalito' ri Aki Kapuuno' i Daut koson ra raja' nilo. Gitio ragu ri Aki Kapuuno' ri Daut, ‘Napandayan Ku i Daut, anak ri Isai, kasagaan ru guang Kuno, am niayuk gumagaya' io ra ngaangai' susuban Kuno.’ 23I Jisus ti noyo papag ri Daut am sinauk Io ri Aki Kapuuno' ra Mamamayag ra ulun ru Israil sumugut ra bantu' Nali. 24#Mrk. 1:4; Luk. 3:3Paat ri Jisus kalo poyo nakatalimpuun ra kandoi Nali, i Juanis nanusub ra ngaangai' ulun ru Israil koson tumalikur ilo intor ra tula nilo am riwon. 25#Mat. 3:11; Mrk. 1:7; Luk. 3:16; Jua. 1:20, 27Maar mopongo kandoi ri Juanis, indagu io ra ulun masuang, ‘Osoi kia aku ti ra pangkaraan min? Pai' ru aku no ulun ondo' inaanin min. Kaa' rongogo' toojo! Matong Io ra tauli no, am mamagus ra kasut Nano pana kalo maaya' aku.’
26Pabukat kau ngaangai', papag ri Abragam am niayuk ngaangai' sala' ka Jaudi ondo' sumamba ri Aki Kapuuno'; itakau no napasabayan ra Tanou pamayagan no. 27Sabap ra ulun minayan ra Jirusalim am tingganai nilo kalo nakatutun ra Io no Mamamayag i. Kalo nangarati' ilo ra nangilaan ru nabi-nabi, kabalu' pana basaan ra moonong orou Sabat. Ginio nangkinibit risilo nangukum ri Jisus am koson raginio norontop noyo ragu ru nabi-nabi. 28#Mat. 27:22-23; Mrk. 15:13-14; Luk. 23:21-23; Jua. 19:15Kabalu' pana kolondo' natuum nilo ra atan ayuk sasaban koson ra Io ukumin ra potoyon, kaa' kitaako' nilo niayuk ri Pilatus ra io ti potoyon. 29#Mat. 27:57-61; Mrk. 15:42-47; Luk. 23:50-56; Jua. 19:38-42Kopongo sinauk nilono ri Jisus ngaangai' ondo' tinulisan ra Buuk Kitab intor Riso, patuuno' nilo boo baangkai Nali intor ra salip am ongoi nilo lobongo'. 30Kaa' binayag Io boo saguli' ri Aki Kapuuno' intor ra kapatayan. 31#Rin. 1:3Tauli no boo ra buoi kukula' ngoorou, minintalang Io ra ulun ondo' nababaya' Riso intor ra Galilia suku' ra Jirusalim ragili. Raino ilo ti noyo sasi' Nano ra bansa' ru Israil. 32Raino akai mampasaboi ra Tanou Moonsoi ti ramuyun: Atan ondo' binantu' ri Aki Kapuuno' ra kinamatuaan takali, 33#Mzm. 2:7sinauk No noyo ritakau, ioginio papag nilo, ra i Jisus binayag saguli' intor ra kapatayan. Koson tinulisan ra Kitab Mazmur karuo,
‘Okou noyo Anak Kuno,
orou raiti' niayuk Aku masauk ra Ama' Muno.’
34 #
Jis. 55:3
Binayag Io no saguli' ri Aki Kapuuno' intor ra kapatayan; koson kalo mapasa' Io ralalom ra lobong. Kon ragino ragu ri Aki Kapuuno',
‘Aniin tokou ra barakat ondo' matulai,
barakat ondo' binantu' Kuno ri Daut i.’
35 #
Mzm. 16:10
Koson niayuk ra ragu Nano ra tayar ra bokon,
‘Kalo polosoon Mu Ulipon Muno ondo' gumagaya' tojojo matutuk ra lobong.’
36Sabap ra sinugut noyo ri Daut ondo' nanusuban ri Aki Kapuuno' paat ra io naayag. Io pana patoi am linobong ra labangan ru kinamatuaan nano. Baangkai nali pana napasa'. 37Kaa' ginio kalo nasauk Riso ondo' binayag saguli' ri Aki Kapuuno' intor ra kapatayan. 38-39Ginio boo ra pabukat kau ngaangai', intutun kano toojo ra ralalom inggalan ri Jisus noyo tanou ti posoboyon ramuyun, koson ra tula mino maampun. Osoi ayuk mangintopot Riso makalabus intor ra ngaangai' tula ondo' kalo maalap kapuso ru Ukum ri Musa. 40Ginio ra ilalai' min koson kalo masauk ramuyun atan ondo' rinagu ru nabi-nabi,#Kukula' naskhah nakalair kolondo': ramuyun.
41 #
Ab. 1:5
‘Ilai' min, ulun magagasab! Pangimuag am kapuso kau!
Sabap ra raino ti mokoondo' saukon Kuno poyo
ondo' kalo lair intopoton min,
ra kabalu' pana mokoondo' noyo ulun mambala' ramuyun.’ ”
42Paat ri Paulus am i Barnabas miningkual intor ra baloi sambayangan i, ulun-ulun no nanusub risilo sumaguli' poyo paat ra orou Sabat ra matong no, koson mangila' poyo risilo. 43Pakaingkual boo ngaangai' ulun intor ra baloi sambayangan i, masuang ulun siminunu' ri Paulus am i Barnabas, ilo ti am ulun ru Jaudi am niayuk ulun sala' ka Jaudi ondo' siminubol noyo ra ugama Jaudi. Pambilin ruo ngaulun rasul i risilo koson marayus malansan ra asi' ri Aki Kapuuno'.
44Paat ra orou Sabat ra sumunu' no, mamaar ngaangai' ulun ondo' minayan ra bandar i minongoi pangkirongog ra bala' ru Tuhan. 45Kaa' paat ra ulun ru Jaudi nakakito ra ulun masuang no, nangusolon ilo toojo. Inanggal nilo ngaangai' rinagu ri Paulus saboi nagasab riso. 46Kaa' mulu' piboo i Paulus am i Barnabas makakau' mindagu, konilo, “Akau no galing sotopot no papasabayan ra bala' intor ri Aki Kapuuno' ti. Kaa' kalo inapu min am pangkaraan min poyo ra kalo noyo maaya' kau mokoowot ra kaayagan motopot am mantilayun ti. Ginio sabap ra akau iruanin mai am mongoi akai poyo ra ulun sala' ka Jaudi. 47#Jis. 42:6; 49:6Sabap ra gitio noyo nanusuban ru Tuhan i ramon, ragu Nano,
‘Inaru' Ku noyo ra akau no masauk ra sinda ru ulun sala' ka Jaudi,
koson ngaangai' bansa' ru tana' ti bayagon.’ ”
48Pakaining ayuk ulun sala' ka Jaudi ragu raginio, naansukan ilo toojo saboi mongongompor ilo ra bala' intor ra Tuhan i. Ulun ondo' inaru' noyo ri Aki Kapuuno' koson mokoowot ra kaayagan motopot am mantilayun, nangintopot ilo ri Jisus niayuk.
49Bala' ru Tuhan nakatabual ra ati ayuk intok ra libung raginio. 50Kaa' ulun ru Jaudi nanusuk ra tingganai ru bandar raginio am poyo ruandu' kauligan ondo' nangintopot ri Aki Kapuuno' am sala' ka Jaudi. Pinasalula' nilo boo ra rondo' imbolo' ri Paulus am i Barnabas, saboi pinaugar ilo karuo intor ra libung nilai. 51#Mat. 10:14; Mrk. 6:11; Luk. 9:5; 10:11Ginio ra kabuli' nilo jamol ru kalayam nilai ra saang ru ulun-ulun no koson rondo' pangkaraan intor ra paliso malaat nilai. Kakabuli' nilo ayuk am ugar ilo boo ongoi ra Ikonium. 52Kaa' naansukan niayuk ulun mangintopot ri Jisus giu' ra Antiokia, am ilo kinuasa' ru Ambiluo ri Aki Kapuuno'.
Currently Selected:
RINALATAN 13: TMT
Highlight
Copy
Compare
Share
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
