2 TISALONIKA 2
2
Ulun Malaat
1 Koson ra ratangan ru Tuhan takau, i Jisus Kristus, am pantimungan takau mongoi simpung Riso, pabukat kau ngai' kitaakon takamin: 2Pai' kano kataki' kalingou kapoam magalabo sabap ra nakaining kau ra nasuku' kon noyo Orou ratangan ru Tuhan Jisus. Mokoondo' lair mindagu, ginio sinabit mai paat ra kinuasa' akai ru Ambiluo ri Aki Kapuuno', kapoam ralalom pangilaan kapoam tinulisan mai. 3Pai' min noyo polosoo' osoi ayuk mamparuung ramuyun ra atan ayuk pana sasaban. Sabap ra kalo poyo masuku' Orou ratangan ru Tuhan Jisus, maaru' gitio galing masauk: Masuang boo ulun tumula' ri Aki Kapuuno' am mintalang boo Ulun Malaat, io ondo' inaru' noyo pasubolon ra naraka. 4 Makimantula' am makiompor io ra ngaangai' ondo' rokoon tuhan kapoam atan ayuk ondo' sambaan ru ulun, saboi sumubol am manturung io ra Baloi Tuhan am migiangku ra io rokoon i Aki Kapuuno'.
5Kalo kia kinara' min ra aku soroi ramuyun ragili, ra ingkula' aku noyo nambala' ramuyun ra ngaangai' baal raginio? 6Am raino makapandai kau ra atan ondo' mongompong riso, makasaboi paat ra inaru' ri Aki Kapuuno' mintalang io. 7Kuasa' ru Kalaatan ondo' kalo makito ti timinalimpuun noyo mamparuku' ra ulun, kabalu' pana kalo poyo minintalang io. Kaa' ondo' mongompong riso no, musiti' iruon pagulu ri Aki Kapuuno', 8 bagu no Ulun Malaat ti mintalang. Kaa' paat ri Tuhan Jisus matong, potoyon No Ulun Malaat no ra sampuyon no ayuk am pusoon No io ra sinda ru ratangan Nano. 9 Ulun Malaat ti mintalang mabaya' kuasa' ru Tingganai ru riwato am mambaal io ra mansalinut sauk makakuasa', tatandu' am kaimuagan ondo' abau ayuk ngaangai'. 10Mamparuung io ra mansalinut kalaatan ra ulun ondo' maaru' pusoon. Pusoon ilo sabap ra kalo nangapu am nonogom ilo ra katapatan intor ri Aki Kapuuno' ondo' makapamayag risilo. 11Ginio sabap ri Aki Kapuuno' mompoloso risilo ra palayawon, saboi mangintopot ilo ra atan sotopot no abau. 12Maa' raginio, ngaangai' ondo' kalo mangintopot ra katapatan intor ri Aki Kapuuno', kaa' maansayan ayuk ra kalaatan, ukumin ilo.
Pinili' kano ra bayagon kau
13Pabukat ku ngai' ondo' tagamin ru Tuhan, musiti' akai masalok maringkuanang ri Aki Kapuuno' sabap ra akau, sabap ra pinili' kano ri Aki Kapuuno' ra kasaa' ra bayagon kau. Ralalom ru Ambiluo Nano am pangintapatan min ra katapatan intor ri Aki Kapuuno', sinauk kau ri Aki Kapuuno' ra ulun Nano ondo' mapasau. 14Sasaban ragitio noyo nampiau Io ramuyun mansail ra Tanou Moonsoi ondo' pinabala' mai ramuyun. Nampiau Io ramuyun koson mokoowot kau ra katulayan ru Tuhan takau, i Jisus Kristus. 15Ginio sabap ra, pabukat kau ngai', pirot kano pangintopot am suguto' noyo pangilaan maili ramuyun, iou pana ondo' rinagu kapoam tinulisan mai ra surat.
16Gama' ru Tuhan takau, i Jisus Kristus galama', am i Aki Kapuuno', Ama' takau, ondo' nonogom ritakau am ondo' ralalom ru kataawan Nano nangani' ritakau ra guang mataan am ra kalansanan moonsoi, 17mampakatasu' am mampaikang ra guang mino. Maa' raginio makapambaal am makapampatanou kau boo ra atan ondo' moonsoi.
Currently Selected:
2 TISALONIKA 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.