2 PITRUS 2
2
Ulun migigiangku ra mangingila'
1Paat ra galing i, mokoondo' noyo ulun migigiangku ra nabi intor ra bansa' ru Jaudi, am mogondo' niayuk ra tatanga' mino ra mokoondo' sumalula' niayuk ulun migigiangku ra mangingila'. Mangila' ilo ondo' kalo motopot am ondo' mampalayau ra ulun. Magali' ilo ra Tuan ondo' nampalabus risilo. Ginio boo mangkinibit risilo mapuso ra maagu no. 2Kabalu' pana koson raginio, masuang ulun tumilu ra kinibit ru guang malaat nilai. Binaal nilai ti noyo mangkinibit ra masuang boo ulun magasab ra Ralan Katapatan. 3Ulun-ulun migigiangku ra mangingila' maringkumaa' am mansail ra tutunungon nilai ti noyo maguyum ilo ayuk ra ampos nilo galama'. Kaa' pinatampos noyo kalalair ukum pataakin risilo am kapusaan ondo' inaru' no, maginaa noyo risilo.
4Malaikat-malaikat ondo' nambaal ra tula no pana kalo pinoloso ri Aki Kapuuno', kaa' inukuman No, am pinatiran ra naraka. Binangkil ilo ra intok molondom suku' Orou Pangakiman.
5 Koson niayuk ra ulun malaat ra galing i, kalo pinoloso ri Aki Kapuuno'. Paat ragili namparatong Io boo ra rosob maayo risilo. I Nuu ayuk am poyo tulu' ngaulun ra bokon ondo' binayag, sabap ra io noyo ondo' napatanou ra katapatan ri Aki Kapuuno'. 6 Mogondo' niayuk ra ati kulaan sauk ru ulun ra bandar Sodom am Gomora: Inukum ilo solobo' ri Aki Kapuuno' karuruo bandar i. Ginio binaal Nano koson ra pampakaraan ati kulaan balos Nano ra ulun malaat. 7 Kaa' i Lot binayag, sabap ra io sangulun motopot; sinindualan guang nano ru ulun malaat ondo' nambaal ra pansasawaan. 8I Lot ti ulun moonsoi toojo. Kaa' siminimpung io risilo, am moonong orou makito am morongog no ra baal malaat nilai, saboi sinindualan guang nali. 9Ngaangai' raginio mampakito ra Tuhan noyo makapandai atan koson mamayag ra ulun ondo' mampakatasu' Riso paat ra ilo makatuum ra pangkinaman. Mangaru' Io niayuk ra kalo labusin ulun malaat no maa' raginio ukumin ra Orou Pangakiman ra tauli no; 10mulu' poyo ukumin ulun ondo' mampagagaya' ayuk ra kinibit ru guang nilo ra majamol am ondo' manalaing ra kuasa' ri Aki Kapuuno'.
Ulun-ulun migigiangku ra mangingila' no makakau' am mangasumbung, saboi kalo mangurumat ilo ra mangunguasa' matulai no. 11Kaa' malaikat-malaikat pana ondo' maayo poyo kinaikang am kuasa' nilai no ka ulun-ulun migigiangku ra mangingila' no, kalo noyo makakau' manguu' am magasab risilo ondo' maayag ra matulai no ra saang ru Tuhan. 12Kaa' ulun-ulun migigiangku ra mangingila' no kolondo' guang. Ilo ti koson ayuk ra bibiag mangasigo ondo' rokopon am potoyon ayuk. Magasab ilo ayuk ra atan ondo' kalo naratian nilai no. Gitio boo kinibit ra ilo ti pusoon. 13Sabap ra nangimbolo' ilo ra ulun bokon, ginio ra imboloon ilo. Makapaliso ilo ra majanjayan, saboi paat ra matawang pana masaga' ilo ayuk mambaal ra atan ayuk laai ru guang nilai galama'. Makatataman am makauyuyu' ilo paat ra rumamai ra jajajou. Ondo' kaansayan nilai ti sotopot no, masaga' ayuk mamparuung ramuyun. 14Ilo ti kalo majajala' mambaal ra tula am makapaliso ilo ra pansasawaan. Ulun ondo' malawo pangintapatan, rukuon nilo palayawo'. Maringkumaa' ilo am ginio kaindalaman nilo. Kaa' ulason ilo ri Aki Kapuuno'! 15 Ilo ti nakalayau sabap ra kalo siminugut ra ralan motopot. Timinilu ilo ra ralan ri Biliam, anak ri Bior ra galing i. I Biliam ti naringkumaa' ayuk ra ruit intor ra kalaatan binaal nali. 16Kaa' sinawai io toojo sabap ra kalaatan nali. Kaladai nano minindagu riso mogondo' ra bolos ru ulun. Nabi no pana jinajalan nompolonggo' ra binaal nano ra sasambungon no.
17Ulun-ulun migigiangku ra mangingila' no mogondo' ra taur napua' kapoam gaun ondo' siniaban ru bagiu' mapuor. Pinatampos noyo ri Aki Kapuuno' risilo rondo' intok molondom toojo. 18Ragu nilai masumbung am sasambungon. Pansasawaan nilono mamparuku' ra ulun ondo' bagu ayuk poyo timinalikur intor ra kaayagan nakalayau. 19Ulun-ulun migigiangku ra mangingila' no mambantu' ra ulun-ulun no ra ralan kalabusan, kaa' ilo galama' inulipon noyo ru kinibit malaat ondo' mamuso risilo ra tauli no. Sabap ra osoi ayuk kuasaan ru atan ayuk pana kalaatan, ulipon io niayuk ru ginio. 20Ulun ondo' nakaulig noyo ri Jisus Kristus, Tuhan am Mamamayag takau, kalo boo kuasaan ilo ru kalaatan ru tana' ti ondo' mampajamol ra kaayagan ru ulun. Kaa' amon ru sumaguli' ilo ra kalaatan nilai, saboi kalaan ilo ru kuasa' malaat no, pupus no lumaat poyo kaayagan nilo intor ra talimpuun i. 21Moonsoi poyo ru ulun koson raginio kalo igogondo' pakaulig ra ralan katapatan ri Aki Kapuuno', intor ra ilo makaulig toojo, kaa' ra tauli kalo boo sumugut ra panusuban ri Aki Kapuuno' ondo' pinasaboi noyo risilo. 22 Atan ondo' nasauk risilo ti, norontop boo ra abig ragitio: “Uku' mampalua', akanon no saguli',” am “Bauwi ra pinariu', lumuoi saguli' ra losok.”
Currently Selected:
2 PITRUS 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.