1 KORINTUS 6

Mantagi' ra pabukat Kristian giu' ra makama

1Amon ru sangulun intor ramuyun mansangor ra pabukat Kristian, kua ibito' no pansasangaran ti ra akim ondo' sala' ka ulun Kristian? Kua pai' pakisalasai io ra ulun ri Aki Kapuuno' ra kapaganan nano? 2Kalo kia nakapandai kau ra ulun ri Aki Kapuuno' mangakim ra ulun ru tana' ti ra tauli no? Amon ru akau no mangakim ra ulun ru tana' ti, maaru' masalasai min baal ra kalo kula' maatang koson raginio? 3Kalo kia nakapandai kau ra itakau niayuk mangakim ra malaikat-malaikat? Intor raginio, mulu' poyo masalasai min niayuk kapaganan ru kaayagan min ra moonong orou ti. 4Amon ru mokoondo' kapaganan koson raginio, kua pakisalasai kau ra akim ondo' kalo makaulig ri Aki Kapuuno'? Sabap ra ilo kalo urumaton ra pasimpungan ulun Kristian. 5Mapara' boo uyu' no! Maaru' mokoondo' intor ramuyun ondo' mapintar koson manalasai ra pansasangaran ra gino ngai' ru ulun Kristian. 6Kaa' pinoloso min ayuk ulun Kristian mantatagi' ra rondo' am bokon giu' ra makama, am ulun sala' ka Kristian no boo manalasai risilo.

7Sotopot no pansasangaran koson raginio, nasalingai' kau boo mampakito ra pangintapatan malawo. Mulu' bonsoi ru akau kalaatin kapoam gaawin intor ra akau mantatagi' ra rondo' am bokon. 8Kaa' akau boo galama' mangkalaat ra rondo' am bokon am migagaau ra rondo' am bokon, ioginio pabukat min ra Kristian. 9Maaru' natutunan min ra ulun malaat kalo masauk ra ulun ri Aki Kapuuno'. Pai' kano iruung; ulun ondo' mansawa', sumamba ra sinungkalalaing, lumapau am ungkuyon homoseksual, 10ondo' mantakou, makalit, gagaukon, manimbaal ra ragu ra ulun bokon, am poyo ulun mampagaau – ngaangai' ulun raginio kalo masauk ra ulun ri Aki Kapuuno'. 11Ragili mokoondo' kukula' ngaulun intor ramuyun makapaliso koson raginio. Kaa' raino kinapasau kano intor ra tula min am nasauk kano ra ulun ri Aki Kapuuno' galama'. Pinobonsoi kano ri Aki Kapuuno' ralalom inggalan ru Tuhan takau, i Jisus Kristus, am poyo ra kuasa' ru Ambiluo ri Aki Kapuuno' takau.

Urumato' noyo i Aki Kapuuno' ra inan mino pana

12 # 1 Kor. 10:23 Mokoondo' ulun mindagu ra, “Kolondo' boo mokopongompong raki' mambaal ra atan ayuk kasagaan ru guang kuno.” Ginio motopot: Kaa' sala' ka ngaangai' no moonsoi rirun. Aku pana makatilu mindagu ra, “Kolondo' boo mokopongompong raki' mambaal ra atan ayuk kasagaan ru guang kuno.” Kaa' kalo masaga' aku ra atan ayuk pana mangulipon raki'. 13Mokoondo' niayuk ulun mindagu ra, “Akanon pasuangon ra tinai', am tinai' papasuangan ra akanon.” Ginio motopot: Kaa' karuruo no pusoon ri Aki Kapuuno'. Kaa' kalo moonsoi amon ru ulun mansasawa' ayuk, kaa' musiti' takau mangurumat ra Tuhan ra inan takano pana. Bagu alungin ru Tuhan inan takati. 14I Aki Kapuuno' namayag saguli' ra Tuhan Jisus intor ra kapatayan, mogondo' niayuk ritakau ra bayagon No saguli' ralalom ru kuasa' Nano.

15Nakapandai kano ra inan mino koson ra santayaran ru inan ri Kristus. Ginio poyo, moonsoi kia ru alapon santayaran ra inan ri Kristus no am pasimpungo' ra ruandu' mantalan ra inan? Kalo, kalo noyo toojo. 16#Kas. 2:24Kapoam, musiti' makapandai kau ra osoi ayuk makasimpung ra ruandu' mantalan ra inan, masauk io rondo' riso. Sabap ra gitio noyo tinulisan ra Buuk Kitab, “Karuruo no masauk boo rondo'.” 17Kaa' ulun ondo' masimpung ra Tuhan, io am Ambiluo ru Tuhan masauk boo rondo'.

18Inggaluri' min noyo pansasawaan. Atan ayuk tula ra bokon ondo' baalon ru sasangulun, kalo mangkinibit ra inan nano. Kaa' ulun ondo' mansawa', io galama' mangkinibit ra inan nano makatula. 19#1 Kor. 3:16; 2 Kor. 6:16Musiti' makapandai kau ra inan mino noyo ayanan ru Ambiluo ri Aki Kapuuno', ondo' tinaakan Nano koson paayanon ra guang min. Ginio ra inan mino sala' ka akau galama' tatangan, kaa' i Aki Kapuuno'. 20Mologo toojo pinambabali ri Aki Kapuuno' ramuyun, ioginio i Kristus. Sabap raginio, urumato' noyo i Aki Kapuuno' ra inan mino pana.

Currently Selected:

1 KORINTUS 6: TMT

Highlight

Copy

Compare