1 KORINTUS 11

1 # 1 Kor. 4:16; Plp. 3:17 Tilu kano raki', mogondo' ra aku pana tumilu ri Kristus.

Marundung paat sumambayang

2Paringkuanangan ku ramuyun sabap ra masalok kau mangkara' ra nangilaan kuli ramuyun am gumagaya' kau niayuk. 3Kaa' masaga' aku ra akau makarati' ra i Kristus noyo maningganai ra moonong ungkuyon, ralaki maningganai ra andu', am i Aki Kapuuno' no maningganai ri Kristus. 4Amon ru sangulun ungkuyon marundung paat ra io makiasi' kapoam mampasaboi ra bala' intor ri Aki Kapuuno' giu' ra baloi sambayangan, arati' no kalo mangurumat io ri Kristus. 5Amon ru sangulun ruandu' kalo marundung paat ra io makiasi' kapoam mampasaboi ra bala' intor ri Aki Kapuuno' giu' ra baloi sambayangan, arati' no kalo mangurumat io ra ralaki nano; ginio nogondo' ayuk boo ra sangulun ruandu' nambulut. 6Sabap ra amon ru sangulun ruandu' marara' marundung, moonsoi abuk nano lomporon. Kaa' amon ru sangulun ruandu' bulutin kapoam lamparin abuk nano, ginio mampakauyu' riso. Ginio ra moonsoi marundung io. 7#Kas. 1:26-27Ungkuyon kalo pana marundung, sabap ra io inaru' mampakito ra baal am katulayan ri Aki Kapuuno'. Kaa' ruandu' inaru' mangurumat ra ungkuyon. 8#Kas. 2:18-23Sabap ra ungkuyon kalo inangun intor ra ruandu', kaa' ruandu' inangun intor ra ungkuyon. 9Am ungkuyon kalo niayuk inangun koson kaatangan ru ruandu', kaa' ruandu' inangun koson kaatangan ru ungkuyon. 10Ginio ra, sabap ra malaikat-malaikat no, sangulun ruandu' musiti' marundung koson ra tatandu' ra io iowon makiasi'. 11Kabalu' pana koson raginio, ralalom kaayagan takau koson ulun Kristian, ruandu' kalo makatanggang ru kolondo' ungkuyon, am ungkuyon pana kalo makatanggang ru kolondo' ruandu'. 12Sabap ra kabalu' pana ruandu' kasaa' ragili inangun intor ra ungkuyon, kaa' kopongo ginio ruandu' boo maganak ra ungkuyon; i Aki Kapuuno' sotopot no mampasauk ra ngaangai' ti.

13Karaa' min galama'; moonsoi kia sangulun ruandu' kalo marundung, amon ru makiasi' io ri Aki Kapuuno' paat sumambayang? 14Sala' kia ka maya' ra kaindalaman min, ungkuyon ondo' maawar abuk no makauyuyu' toojo. 15Kaa' abuk maawar tinaakan noyo ra ruandu' koson pananaub ra ulu nilono, am ginio rondo' kaansukan nilai. 16Amon ru mokoondo' magagansang raginio, ginii ayuk susuban intor ramon am niayuk intor ra pasimpungan ulun Kristian ra bokon koson ra aturan ra sumambayang.

Pagakanan ru Tuhan

(Mat. 26:26-29; Mrk. 14:22-25; Luk. 22:14-20)

17Ugar ru sambayang mino sotopot no kalo magibit ra kasingkatan, kaa' kalaatan. Intor raginio kalo mokopongompor aku ramuyun. 18Kasaa' i, nokorongog aku ra paat ru pasimpungan mino, mokoondo' mansusuai am mansasangor ra rondo' am bokon. Am mangintopot aku niayuk ra tanou raginio. 19Sotopot no kalo makaimuag amon mokoondo' ramuyun mansusuai, maa' raginio mapandayan boo osoi ulun Kristian toojo. 20Am poyo ra akau masisimpung, sotopot no sala' ka pagakanan ru Tuhan ondo' paugaron min. 21Sabap ra paat ra pagakanan min, sigagama' kau mangakan ra akanon galama' am manginum suku' mokoondo' magauk, kaa' bokon-bokon no maitilan sabap ra kalo matayaran ilo. 22Kua guat? Kolondo' kia pagakanan am paginuman ra baloi min galama'? Kua pai' min urumato' ra pasimpungan ulun Kristian, am kua pampakauyu' poyo ra ulun musikin? Atan kia paraguon ku ramuyun? Omporon takamin kia? Kalo! Topot-topot kalo mokopongompor aku ramuyun.

23Sabap ra pangilaan ondo' pinasaboi ku ramuyun i, naapu ku intor ra Tuhan; ioginio paat ra rondom Tuhan Jisus pinataak ra pantula' Nano, alapo' No ruti', 24am pakaparingkuanangan Io ri Aki Kapuuno' raginio, pipilango' No ruti' i liliwa' minindagu, “Gitio noyo inan Kutu ondo' pataakin ramuyun. Akano' min gitio koson pangkaraan min Raki'.” 25#Kai. 24:6-8; Jir. 31:31-34Nogondo' niayuk ra Io nopongo nangakan, alapo' No sangkir ru anggur am indagu, “Sangkir ti am nabantuan bagu ri Aki Kapuuno', ondo' saukon ru raraa' Kuno galama'. Moonong ra akau manginum raginio, baalo' min gitio koson pangkaraan min Raki'.”

26Sabap ra moonong ra akau mangakan ra ruti' ti am niayuk manginum ra sangkir ti, mampatanou kau ra pinatayan ru Tuhan saboi ra Io matong saguli'. 27Ginio boo ra osoi ayuk mangakan ra ruti' ru Tuhan kapoam manginum ra sangkir ru Tuhan ra kalo mangurumat Riso, ulun no makatula, sabap ra kalo mampakaatang ra inan am raraa' ru Tuhan. 28Ginio ra moonong ulun musiti' galing mangimumui ra baal ru guang nano galama', bagu no makaakan ra ruti' am makainum intor ra sangkir no. 29Sabap ra amon ru ulun no mangakan ra ruti' no am manginum intor ra sangkir no am kalo makarati' ra pagakanan raginio makainamot ra inan ru Tuhan, ulun no ukumin ri Aki Kapuuno', sabap ra kalo mangurumat io raginio. 30Ginio sabap ra masuang boo intor ramuyun marualan am malawo, am mokoondo' niayuk kukula' ngaulun minatoi. 31Kaa' amon ru mangimumui takau galing ra baal ru guang takau, kalo boo akimin takau ri Aki Kapuuno'. 32Kaa' amon ru akimin takau pana ri Aki Kapuuno', ginio rondo' pangilaan no ayuk ritakau, maa' raginio kalo boo ukumin takau mabaya' ra ulun ru tana' ti.

33Ginio boo ra pabukat kau ngaangai', amon ru tumimung kau mangakan ra Pagakanan ru Tuhan, inaani' min galing ra makaratong ngaangai'. 34Osoi maitilan, musiti' io mangakan galing giu' ra baloi, maa' raginio kalo ukumin kau ri Aki Kapuuno' sabap ra pasimpungan mino. Ondo' kapaganan ra bokon, balain takamin ayuk paat ra aku sumaguli' poyo ramuyun.

Currently Selected:

1 KORINTUS 11: TMT

Highlight

Copy

Compare