Rute 3
3
Naomi mbwaakasoleka kubambila Rute lukwato
1 #
1 Kor 7:36; 1 Tim 5:8; Dt 4:40; Rut 1:9; Int 128:2; Jer 22:15,16 Lino Naomi banyinazyala Rute bakamwaambila kuti, Mwanaangu, sa tacili cibotu kuti nkakuyandawide cikalilo, kuti ube kabotu? 2#Rut 2:8Swiilila! Ulya Boazi, nguwakali kweendeenda abasimbi bakwe, sa tali siluzuboma na? Bona! Sunu masiku ulapupulula bbaale kulubuwa lwakwe. 3#2 Sam 14:2Samba, ulinanike, ulisamike kabotu, akwiinka nkukonya oko kulubuwa, pele utalizibyi kumuntu oyo mane akamanisye kulya akunywa. 4Lino kuciindi cakulala kwakwe, bona mpayoolala, elyo uleelede kuya akuvumbula maulu aakwe, nkabela uyookulwiida mboelede kucita. 5#Ef 6:1; Kol 3:20Wakamuvwiila kuti, Coonse ncondilailila njoocita mbubonya.
6Elyo wakainka kulubuwa, wacita mbubonya banyinazyala mbubakamuJailila. 7#Bab 19:6; 2 Sam 13:28; Es 1:10Boazi naakamana kulya akunywa, alimwi moyo wakwe nowakakondedwe, wakaakulala kumamanino aacilwi camaila, nkabela mpoonya awo Rute wakasika cabuumuzi, wavumbula maulu aakwe, walala. 8Lino akati kamasiku mwaalumi wakatilimuka, wasanduka, wabona kuti kuli mwanakazi uulede kumaulu aakwe. 9#Ezk 16:8Wakamubuzya kuti, Nduweni? Nkabela wakamuvwiila kuti, Ndime Rute mulanda wako. Kondivumbya malogwe aako ndemulanda wako, nkaambo nduwe siluzuboma. 10#Rut 2:20; 1:8Mpawo wakati, Jehova akupe coolwe, mwanaangu, nkaambo obu buuya bwako busyaalizi bulainda bwakutaanguna, nkaambo tona kutobela balombelombe, nibaba bacete nibaba bavubi. 11#Tus 12:4; 31:10,29,31Lino utayoowi mwanaangu. Coonse cili buti ncoamba, nzoocicita, nkaambo basimunzima boonse balizi kuti uli mwanakazi uuzyalikene. 12#Rut 2:20; 4:1; 1 Tes 4:6Lino ndime siluzubonyoko ncobeni, pele nkwali siluzubonyoko aumwi waafwiifwi kwiinda ndime. 13#Dt 25:5; Rut 4:5; Mt 22:24; Bab 8:19; Jer 4:2; Heb 6:16Ona masiku ano, lino bwaca buyo, na oyo muntu ulazumina kukucitila ceelelo cabusiluzubonyoko, ncibotu, pele na moyo wakwe tuuyandi kukucitila ceelelo cabusiluzubonyoko, lino Jehova mbali muumi, nzoocita mebo. Lala, mane bukace.
14 #
Rom 12:17; 14:16; 1 Kor 10:32; 2 Kor 8:21; 1 Tes 5:22; 1 Pet 2:12 Aboobo wakalala kumaulu aakwe, mane bwakaca, pele wakabuka ciindi camasikusiku. Elyo wakati, Kutazibwi kuti kwasika mwanakazi okuno kulubuwa lwacipolelo. 15Alimwi wakati, Leta kaputi ngosamide, ujate. Elyo naakamujisi, wakamweelekela zisuwo zyabbaale zili musanu acimwi, wamupa, aboobo wakapiluka kumunzi. 16Lino naakasika kulibanyinazyala, bakamubuzya kuti, Ino weenda buti, mwanaangu? Mpawo wakabaambila zyoonse mwaalumi nzyaakamucitila. 17Alimwi wakati, Wandipa ezi zisuwo zyabbaale zili musanu acimwi, nkaambo wakati, Toelede kupiluka maya kulibanyokozyala pe. 18Lino bakati, Kala, mwanaangu, mane ukazibe na makani alaba buti. Nkaambo oyo mwaalumi takoolyokezya pe, uyoomanisya makani buzuba obuno.
Currently Selected:
Rute 3: Ibbaib63
Highlight
Share
Compare
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.