Johane 3
IBBAIB63

Johane 3

3
Jesu mbwaakaambaula a-Nikodemo
1 # Joh 7:50; 19:39 Eno kwakali muntu waba-Farisi uutegwa Nikodemo, mweendelezi waba-Juda. 2#Mt 22:16Walo wakeza kuli-Jesu masiku, wakamwaambila kuti, Rabi, tulizi kuti nduwe mwiiyi uuzwa kuli-Leza, nkaambo takukwe muntu uukonzya kucita malele aya ngocita, Leza atanooli awalo, 3#Mt 18:3; Lk 17:21; 1 Pet 1:23Jesu wakavuwa kuti, Ncobeni ndakwaambila kasimpe, Muntu atazyalwa akuzyalwa kwakujulu, takonzya kubona Bwami bwa-Leza, 4Nikodemo wakamwaambila kuti, Ino muntu ulakonzya buti kuzyalululwa acembaala? Sena ulakonzya kunjila lwabili mwida lyabanyina, kuti azyalwe alimwi? 5#Ezk 36:25-27; Ef 5:26; Tit 3:5Jesu wakavuwa kuti, Ncobeni ndakwaambila kasimpe, Muntu atazyalwa amaanzi a-Muuya, takonzya kunjila mu-Bwami bwa-Leza, 6#Joh 1:13; Matl 5:3; Int 51:5Icizyalwa mumubili, mubili, acalo icizyalwa mu-Muuya, muuya. 7Utagambwi mbwendakwaambila kuti, Ulyeelede kuzyalwa akuzyalwa ukuzwa kujulu. 8#Mk 4:41; Muk 11:5Luuwo lulaunga koonse nkoluyanda, eno ulamvwa kuvuuma kwale, pele tozi nkolizwida ankoluya, mbubonya mbokubede kuluumwi umwi uwazyalwa ku-Muuya. 9Nikodemo wakavuwa kuti, Ino inga zintu ezi zilaba buti? 10Jesu wakavuwa kuti, Sena toli mwiiyi waba-Israyeli? Sena tonamvwisya aya makani? 11#Joh 7:16; 8:26,28; 12:49Ncobeni ndakwaambila kasimpe, Swebo tulaamba eco ncotuzi akulungulula­ eco ncotwakabona, anywebo tamukutambuli kulungulula kwesu. 12#Lk 22:67Kuti ndamwaambila zyaansi tamusyomi, iniinga mulasyoma buti ndamwaambila zyakujulu? 13#Tus 30:4; Ef 4:9Nkaambo takukwe muntu uwakatanta kujulu, pele oyo uwakazwa kujulu, nguwenya Mwana a-Muntu. 14#My 21:8,9Alimwi mbubonya Musa mbwaakasumpula nzoka munkanda, mbubonya awalo Mwana a-Muntu ulyeelede kuyoosumpulwa, 15kuti muntu woonse uumusyoma abe abuumi ubutamani.
16 # Rom 5:8; 8:32; 1 Joh 4:9 Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani, 17#Joh 5:22; 12:47; Lk 19:10; Inc 17:31Nkaambo Leza taakwe naakatuma Mwanaakwe munyika kuti akiibeteke nyika, pele kuti inyika ikafutulwe nguwe. 18#Joh 3:36; 5:24Oyo uumusyoma tabetekwa, pele oyo uutamusyomi wabetekwa kale, nkaambo tasyomede kuzina lya-Mwana a-Leza, simuzyalwa alike, 19#Joh 1:5,9-11; 12:48Eno oku nkubetekwa, kuti mumuni wasika ansi, pele bantu bayanda mudima kwiinda mumuni, nkaambo milimo yabo mibi, 20#Ef 5:13Nkaambo muntu umwi umwi uucita cibi uluusulide mumuni, tasiki kumumuni, kuti ambweni milimo yakwe yatopwa. 21Pele oyo uucita zyabwini nguuza kumumuni, kuti milimo yakwe iboneke kuti yacitwa muli-Leza.
Johane mbwaakaamba Jesu
22 # Joh 4:1,2 Naakamana aya Jesu wakeza abasikwiiya bakwe kucisi ca-Judaya, oko wakaakukala abalo, wakali kubapatizya. 23#Mt 4:12Awalo Johane wali kubapatizya mu-Ainoni, afwaafwi ku-Salemu, nkaambo kwali maanzi manjimanji oko. Eno bantu bakasika kulinguwe, bakabapatizigwa. 24#Mt 14:3; Mk 6:17; Lk 3:19-20Nkaambo Johane takalina kubikwa muntolongo. 25Eno akabuka makani aakusalazya akati kabasikwiiya ba-Johane amu-Juda umwi, 26#Joh 1:26-34Bakasika kuli-Johane, bakamwaambila kuti, Rabi, oyo ngookali awalo kutala lya-Jordano, ngookazoolungulula, nguwenya oyo ulabapatizya, abantu boonse balainka kulinguwe. 27#Heb 5:4Johane wakavuwa wakati, Muntu takonzya kutambula cintu, mane acijane kujulu, 28#Joh 1:20,23,27; Mk 1:2; Mt 11:10Anywebo nobeni muli bakamboni bangu mbwendakati, Nsili Kristo oyo, pele kuti, Ndatumwa kumusolwedela. 29#Mt 9:15; 22:2Uujisi bwiinga ngusibwiinga, pele mweenzinyina sibwiinga, uuima akumuswiilila, ulabotelwa kwiindilila nkaambo kajwi lyasibwiinga, nkaambo kaako kukondwa kwangu oku kwazyulila. 30#2 Sam 3:1Walo ulyeelede kukomezegwa, pele mebo ndyeelede kucesegwa.
31 # Joh 8:23 Oyo uuzwa kujulu uli ajulu lyaboonse, oyo uuzwa ansi ngwaansi, ulaamba zyaansi, oyo uuzwa kujulu uli ajulu lyabamwi boonse. 32#Joh 3:11Eno eco ncaakabona akumvwa, ulacilungulula, pele takukwe muntu uwatambula kulungulula kwakwe, 33Oyo uwakatambula kwakwe, nguusinizya kuti Leza mbobwini. 34#Joh 1:33,34Nkaambo oyo ngwaakatuma Leza nguuamba majwi aa-Leza, nkaambo teeleki Muuya ngwapa. 35#Mt 11:27; Lk 10:22; Joh 5:20; 17:2Wisi uyanda Mwana, wakamupa zintu zyoonse mujanza lyakwe. 36#Joh 3:18; Lk 3:7; 1 Joh 5:12Oyo uusyoma Mwana nguuli abuumi ubutamani, pele oyo uutamvwi Mwana takooyoobona buumi, pele bukali bwaLeza bulikede alinguwe.

The Bible in Tonga (Zambia) © United Bible Societies, 1963. 


Learn More About Ibbaibele 1963