Babetesi 9
9
Abimeleki mbwaakajata bwami
1 #
Bab 8:31
Lino Abimeleki mwana wa-Jerubaala wakainka ku-Sekemu kulibasimizyaabo, wakabaambila, balo abasiluzubo boonse bawisi banyina, kuti, 2#Bab 8:30; Matl 29:14; 2 Sam 19:13; 1 Mak 11:1; Ef 5:30; Heb 2:14Kamwaamba mumatwi aabapati boonse ba-Sekemu kuti, Cintu cibotu ncecili? Sa ncibotu kuti bantu bali makumi aali musanu aabili, nku kuti bana boonse ba-Jerubaala, bamweendelezye? Na sa ncibotu kuti muntu omwe amweendelezye? Alimwi mutalubi kuti mebo tuli nyama yomwe azifuwa zyomwe anywebo. 3#Matl 29:15Elyo basimizyabo bakaamba aanguwe mumatwi aabami boonse ba-Sekemu majwi aya oonse. Mpawo myoyo yabo yakalibikidwe kuli-Abimeleki, nkaambo bakati, Ngumukwesu. 4#Bab 8:33; 11:3; 1 Sam 22:2; 2 Mak 13:7; Job 30:8; Tus 12:11; Inc 17:5Nkabela bakamupa mali aansiliva aali makumi aali musanu aabili ngubakagwisya muŋanda ya-Baalaberiti. Aya mali Abimeleki wakaabelesya kukuliletela bantu babuyo bataka kuti bamutobele. 5#Bab 6:24; 2 Bam 10:17; 11:1; Mt 2:16,20Lino wakasika kuŋanda yawisi ku-Ofira, akooko wakajaya beenzinyina boonse, bana ba-Jerubaala bali makumi aali musanu aabili, abbwe lyomwe. Pele kwakasyaala Jotamu mwana muniini wa-Jerubaala, nkaambo wakaliyubide,
6Lino bapati boonse baku-Sekemu, aluzubo loonse lwa-Milo, baka bungana, bakaakubika Abimeleki mubwami kumusamu mupati uuimvwi kuSekemu. 7#Dt 11:29; 27:11; Jos 8:33; Joh 4:20Nkabela Jotamu naakaambilwa, wakaakwiima atala acilundu ca-Gerizimu, wakapozya ijwi lyakwe akubaambila kuti, Amundiswiilile nubami ba-Sekemu, kuti Leza alakwe aswiilile ndinywe. 8#2 Bam 14:9; Bab 8:22Cimwi ciindi misamu yoonse yakaya kuyoolinanikila mwami. Lino yakaambila olifa kuti, Ube mwami wesu. 9#Int 104:15Pele olifa wakavuwa kuti, Ma! Sa ndeke mafuta aali mulindime, ngebalemesya Leza abantu boonse, nje kuyooendelezya misamu? 10Mpawo misamu yakaambila mukuyu kuti, Koza uwe ube mwami wesu. 11Pele mukuyu wakavuwa kuti, Ma! Sa ndeke bunono bwangu amicelo yangu mibotu, nje kuyooendelezya misamu? 12Mpawo misamu yakaambila musaansa kuti, Koza uwe ube mwami wesu. 13Pele musaansa wakavuwa kuti, Ma! Sa ndeke waini wangu uubotezya Leza abantu boonse, nje kuyooendelezya misamu? 14Lumwi misamu yoonse yakaambila kakoka kuti, Koza uwe ube mwami wesu. 15#Is 30:2; Dan 4:12; Hos 14:7; My 21:28; Ezk 19:14; 2 Bam 14:9; Int 104:16; Is 2:13; 37:24; Ezk 31:3Lino kakoka kakaambila misamu kuti, Na ncobeni mulandinanika kuti mbe mwami wanu, lino amuboole kuzoosyoma muceenzule cangu, Pele na tacili boobo, muzwe mulilo mukakoka, utente misamu yakedari iili ku-Lebano.
16 #
Bab 8:35
Lino na cintu eci ncalusyomo acabululami ncimwacita mukupa Abimeleki bwami, alimwi na ncintu cibotu ncimwacitila Jerubaala aluzubo lwakwe, alimwi na mulipede bulumbu bweelede maanza aakwe 17(Nkaambo taata wakamulwida cakutayoowa lufu akumuvuna kumaanza aabaMidyani, 18anukuti nywebo sunu mwabusizya luzubo lwataata inkondo akujaya bana bakwe bali makumi aali musanu aabili boonse abbwe lyomwe, alimwi mwamupa Abimeleki mwana wamuzike wakwe bwami kubami boonse ba-Sekemu nkaambo ngumukwaabo), 19#Is 8:6; Flp 3:3; Jak 4:16lino na cintu eci ncalusyomo acabululami ncimwacitila Jerubaala aluzubo lwakwe buzuba obuno, lino amujane coolwe muli-Abimeleki, alakwe Abimeleki ajane coolwe mulindinywe. 20Pele na tacili boobo, muzwe mulilo muli-Abimeleki akutenta bami ba-Sekemu aluzubo lwa-Milo, alimwi muzwe mulilo mubami ba-Sekemu amuluzubo lwa-Milo akutenta Abimeleki. 21#My 21:16; Jos 19:8; 2 Sam 20:14Mpawo jotamu wakaloboka, wacija, wainka ku-Beeri, waakukala nkuko nkaambo ka-Abimeleki mukwaabo.
22Nkabela Abimeleki kali mwami wa-Israyeli myaka yotatwe. 23#1 Sam 16:14; 18:9,10; 1 Bam 12:15; 18:19; 2 Mak 18:19-22; Is 19:2,14; 2 Tes 2:1,11; Is 33:1; Mt 7:2Elyo Leza wakatuma muuya wakukazyanya akati ka-Abimeleki abami ba-Sekemu, nkabela bami ba-Sekemu bakacitila Abimeleki cakweena, 24#1 Sam 15:33; 1 Bam 2:23; Es 9:5; Int 7:16; 58:10,11; Mt 23:35kuti mulandu wabujayi bwabana bali makumi aali musanu aabili ba-Jerubaala amulandu wabulowa bwabo uboole kuli-Abimeleki mukwabo iwakabajaya akubami ba-Sekemu ibakamugwasya kujaya beenzinyina. 25Bami ba-Sekemu bakamubikila basikulindila ibakayubide atala azilundu. Aba bakali kubbida boonse ibakabaindila munzila, nkabela makani akamvwigwa kuli-Abimeleki,
Gaala mbwaakabusya inkondo
26Mpawo kwakeza Gaala mwana wa-Ebedi abeenzinyina, bakalongela ku-Sekemu, nkabela bantu ba-Sekemu bakali kumusyoma. 27#Bab 8:33Bakaya mumyuunda kuyoocela masaansa aabo, alimwi bakalyataula masaansa akucita waini wakulikondezya, elyo bakanjila muŋanda ya-Leza wabo, bakali kulya akunywa akusampaula Abimeleki. 28#Kul 5:2; 1 Sam 25:10; Matl 34:2Nkabela Gaala mwana wa-Ebedi wakati, Ino nguni Abimeleki? A-Sekemu nguni? Tumumaninenzi milimo? Sa tali mwana wa-Jerubaala na? Sa Zebuli tali ngambela wakwe na? Sa ciindi cimwi teebakali kumanina Hamori wisi Sekemu milimo? Lino iswe tumumaninenzi milimo? 29#2 Sam 15:4; 1 Bam 20:11; Int 10:3Bantu aba nibakaba mumaanza aangu! Nindakagwisya Abimeleki!
Lino wakaambila Abimeleki kuti, Yungizya impi yako, uzwe. 30Nkabela Zebuli mwami wamunzi, naakamvwa majwi aa-Gaala mwana wa-Ebedi, wakanyema loko, 31wakatuma batumwa kuli-Abimeleki kumbali, wati, Bona! Gaala mwana wa-Ebedi ababunyina bakwe basika ku-Sekemu, balabusya bamu bamumunzi kuti bakulwisye. 32Lino buka masiku, uwe abantu mboli abo, mukayube musokwe, 33#1 Sam 10:7; Muk 9:10elyo cifumo, izuba lyapasula buyo, amufume kuyoosaala munzi. Mpawo walo abantu mbali abo bazwe buyo kuzoolwisya, uyoomucitila ijanza lyako mbulikonzya.
34Elyo Abimeleki abantu boonse mbaakali abo bakabuka masiku, bakayuba cakulangila Sekemu munkamu zyone. 35Nkabela Gaala mwana wa-Ebedi naakazwa akwiima kumulyango wamunzi, Abimeleki abantu mbaakali abo bakabuka kuzwa oko nkubakayubide. 36#Mk 8:24Lino Gaala naakabona bantu wakaambila Zebuli kuti, Bona! Kuli bantu bazwa kumitwe yazilundu. Zebuli wakati, Ncobona ncenzule cazilundu cilibonya mbuli bantu. 37Pele Gaala wakaamba lwabili kuti, Bona! Kuli bantu baseluka kuzwa kuIkombolyanyika. Ankamu imwi ilazwa munzila yamusamu mupati wabasondi. 38#2 Sam 2:26,27; 2 Bam 14:8; Jer 2:28; Ezk 47:11; Zef 2:9Mpawo Zebuli wakamwaambila kuti, Kuli kuli lino kulisumpula kwako kwakuti, Ino nguni Abimeleki? Tumumaninenzi milimo? Sa aba bantu teensi mbabo mbowasampaula? Lino, buka, ukainke kuyoobalwisya.
39Elyo Gaala wakasololela bapati ba-Sekemu, wakaakulwisya Abimeleki, 40Lino Abimeleki naakamutanda, wakacija, nkabela kwakajayigwa bantu banjibanji kumulyango wamunzi. 41Lino Abimeleki wakaakukala kuAruma, alimwi Zebuli wakatanda Gaala ababunyina akubakasya kukala ku-Sekemu.
42Nibwakaca, bantu bakalibonya. Nkabela Abimeleki, naakaambilwa, 43wakabweza bantu akubaandaanya munkamu zyotatwe akuyuba musokwe. Lino naakabona bantu balazwa mumunzi, wakabuka kuyoobalwisya, wakabauma, 44Nkabela Abimeleki ankamu zya bantu mbaakali abo bakazuzaanisya, bakaakwiima kumulyango wamunzi, ankamu zyobile zyakazuzaanisya kukulwisya bantu ibakali musokwe, akubauma. 45#Dt 29:23; 1 Bam 12:25; 2 Bam 3:25; Job 8:22; Int 9:16; 11:6; Tus 2:22; Muk 8:12,13Elyo Abimeleki wakali kulwisya munzi buzuba obo boonse, akuzunda munzi, Bantu ibakali mumo wakabajaya, amunzi wini wakaunyonyoona akuuminzila munyo.
46 #
Bab 8:33; 1 Bam 18:26; 2 Bam 1:2-4; Int 115:8; Is 28:15-18 Lino bantu boonse bacisanza caku-Sekemu nibakamvwa, bakanjila muŋanda injumu ya-Eli-beriti. 47Elyo Abimeleki wakaambilwa kuti bantu boonse bacisanza ca-Sekemu balibungene, 48#Int 68:14nkabela Abimeleki wakatanta kucilundu ca-Zalimoni, walo abantu boonse mbaakali abo. Lino Abimeleki wakabweza kaleba mujanza lyakwe, wakateba muleye, watusamu, wakaubweza, wakaubika akuko lyakwe. Wakaambila bantu mbaakali abo kuti, Mulibwene ncindacita mebo; amufwambaane kucita mbubonya obo anywebo. 49Mpawo bantu boonse bakateba umwi aumwi muleye wakwe, nkabela bakatobela Abimeleki, bakazibika kumbali lyaŋanda injumu, bakatenta iŋanda mpobakabede, aboobo bantu boonse bacisanza ca-Sekemu bakafwa, bantu bakali mbuli cuulu, baalumi abanakazi.
50 #
Kul 14:4; 2 Bam 14:10 Lino Abimeleki wakainka ku-Tebezi, wakalwisya Tebezi, alimwi wakazunda. 51Pele kamuli cisanza ciyumu omo mumunzi, nkabela bantu boonse bakacijila kulincico, baalumi abanakazi boonse, bakaakulijalila mukati. Elyo bakatanta alululi lwacisanza. 52Nkabela Abimeleki wakasika kucisanza kuzoocilwisya, alimwi wakaswena kufwaafwi kumulyango wacisanza, kuti acitente amulilo. 53#2 Sam 11:21; Bab 4:17; Job 31:3; Jer 49:20; 50:45; 1 Kor 1:27Pele umwi mwanakazi wakalosya ibbwe lyeziyo kujulu amutwe wa-Abimeleki, wakapwaya kaama kakwe. 54#1 Sam 31:4Mpawo wakafwambaana kwiita mulombe iwakali kuyumuna zilwisyo zyakwe, wakamwaambila kuti, Somona ipanga lyako, undijaye, kuti bantu bataambi kuti, Mwanakazi nguwakamujaya. Elyo mulombe wakamuyasa, aboobo wakafwa. 55Nkabela bantu ba-Israyeli nibakabona kuti Abimeleki ulifwide, bakainka boonse, umwi aumwi kuŋanda yakwe. 56#Matl 9:5,6; Job 31:3; Int 9:12; 11:6; Tus 5:22; 24:12; Inc 28:4; Rom 2:6; Gal 6:7; Ciy 19:20,21Mbuboobo Leza mbwaakabweedezezya Abimeleki mulandu wakwe, nkaambo wakabisizya wisi mukujaya babunyina bali makumi aali musanu aabili. 57Leza wakabweedezezya bantu ba-Sekemu zibi zyabo zyoonse, mbubonya mbuli majwi aa-Jotamu mwana wa-Jerubaala ngaakabatusya.
Currently Selected:
Babetesi 9: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
