Isaya 53
53
1 #
1 Kor 1:18; Joh 12:38; Rom 10:16 Ino nguni wakazuminina makani esu? Nguni wayubunwidwa kuboko kwa-Jehova? 2#Mk 9:12Wakakula kumeso aakwe mbuli intengantenga ambuli muyanda uuzwa munyika injumu. Katajisi ciwa cibotu nibuba bwiime bweebesi kuti tumweebele. Katajisi bweebesi bucita kuti tumuyande. 3#Int 22:6; Heb 4:15; Joh 1:10Wakasampaulwa akukakigwa kubantu, muntu wamapenzi uubwene maciswe. Kali mbuli muntu uusesemya meso; wakasampaulwa; teetwakamulemeka pe.
4 #
Mt 8:17; 26:66; 1 Pet 2:24 Ncobeni wakalemenwa maciswe esu, wakatola mapenzi esu. Iswe twakayeeya kuti ijanza lya-Leza ndelyamuletela mapenzi ayo ngaaumwa. 5#1 Pet 2:24Pele wakayaswa nkaambo kamilandu yesu, wakaumwa nkaambo kazibi zyesu. Kutugwasya iswe nciceeco ncaakakwabbawidwa, amibunda yakwe niiituponya. 6#1 Pet 2:25Toonse twapambuka mbuli imbelele ziswekede, twatola umwi aumwi inzila njayanda mwini, lino Jehova walemezya nguwe milandu yesu toonse.
7 #
Inc 8:32; 1 Pet 1:19; Ciy 5:6 Wakapenzegwa akufwiinsigwa, nekubaboobo taakwe naakabbanuna mulomo wakwe abuniini. Wakeenzegwa mbuli kabelele kaya kukujayigwa, ambuli imbelele iiumuna mumaanza aasikugela, mbubonya alakwe takajulidwe mulomo wakwe. 8#Dan 9:26Wakakasigwa kubetekwa kabotu, aboobo wakatolwa. Nguni akati kabasanyina wakabika moyo wakwe kumakani aya aakuti, naakagwisigwa munyika yabaumi njimilandu yabantu bangu njaakauminwa. 9#Mt 27:57; 1 Pet 2:22Wakabikwa mukabanda antoomwe abasizibi, wakazikwa amuvubi, nekuba kuti taakwe bubi mbwaakacitide, alimwi taakwe naakaamba calweeno abuniini.
10 #
2 Kor 5:21; Gal 3:13; Rom 6:9; Ef 1:5 Pele lukanze lwa-Jehova ndolwakamuuma. Ngonguwe iwakamupenzya. Naazoolituula mbuli cipaizyo cakumanya milandu yabantu, uyoobona lunyungu lwakwe, uyoongola mubuumi bwakwe, nkabela makanze aa-Jehova ayooya kunembo mumaanza aakwe. 11#Joh 17:3; 1 Joh 2:1; Rom 5:18Uyoobona micelo moyo wakwe njiwakapengela, uyookuta. Kuluzibo lwakwe mulanda wangu uululeme uyoolulamika bantu banji. Uyootola milandu yabo. 12#Flp 2:9; Kol 2:15; Mk 15:28; Lk 22:37; 23:34Nkaambo kako njoomupa caabilo antoomwe abapati, uyooabilwa imbono antoomwe abasintaze, nkaambo wakazumina akutala buumi bwakwe, wakabalwa antoomwe abasikusotoka mulao, wakatola zibi zya bantu banji, akukombela basimilandu.
The Bible in Tonga (Zambia) © United Bible Societies, 1963.