Isaya 22
22
Misobano yabuyo yabana ba-Jerusalemu
1Ngaaya makani aasinsimwa aakuti lyacilengano. Waba anzi lino? Nkaambonzi mulitantide nyoonse atala anduli zyamaanda? 2Uwe o Munzi uuzwide kuyobayoba, munzi walupyopyongano, munzi uusekelela: bajayidwe bako teebakajazigwa ipanga, teebakafwa munkondo pe. 3Basinkuta bako boonse bakacija antoomwe, bakaangwa kumaanza aabasimata. Boonse ibakajanwa mulinduwe bakaangwa antoomwe, bakacija kule. 4Nkaambo kako ndaka ti, Amundifutatile, mulange kumbi, Nkalile loko. Mutasoleki kunduumuzya pe, nkaambo kalunyonyooko lwamwana musimbi wabantu bangu. 5#Es 3:15; Malo 1:5Nkaambo buzuba bwamapenzi abwakulyataulwa abwalupyopyongano bwazwa ku-Mwami Jehova wamakamu mukuti lyacilengano. Malambo alamwayigwa, akuzilundu balalila. 6#Is 21:2; Jer 49:35Ba-Elamu bakabweza inkomo yamivwi, bakali ankamu zyabantu batantide amabbiza, abalo ba-Kiri bakayubununa intobo. 7Lino makuti aako mabotu oonse akalizwide mwa inkalaki, abalo basimabbiza bakalibamba mumindando kumulyango. 8#1 Bam 7:2Elyo wakayubunwida cisi ca-Juda zyakulivumba zyaco, nkabela mubuzuba ubo mwakali kulangila iŋanda yazilwisyo zyamulusaka. 9#2 Bam 20:20; 2 Mak 32:4; Lwi 4:4Nkabela mwakabona munzi wa-Davida mbuwakamwayidwe kumasena manji, elyo mwakabunganya maanzi aaziba lyakunsi. 10Alimwi mwakabala mweelwe wamaanda aamu-Jerusalemu, nkabela mwakamwaya maanda kuti mumamike bulambo bwamunzi. 11#Neh 3:16Alimwi mwakacita ikala akati kamalambo obile lyakujata maanzi aaziba lyakalekale, pele teemwakabika myoyo yanu kuliyocyo iwakalenga zintu ezi nikuba kulemeka oyo iwakazibumba kalekale. 12Mubuzuba obo Mwami Jehova wamakamu wakaita bantu kuti balile akoomoka akulinyoola akulisamika zisani zyamasaka, 13#Is 5:12; Am 6:3; Lk 17:26-29; Is 56:12; 1 Kor 15:32pele bona! Kwaboneka buyo kusekelela akukondwa, kujaya basune akujaya imbelele, kulya nyama akunywa bukoko, cakwaamba kuti, Atulye akunywa, nkaambo junza tulafwa. 14#1 Sam 3:14; Ezk 24:13Mpawo Jehova wamakamu wakandiyubunwida makani mumatwi aangu. Ncobeni mulandu wanu wazibi zili boobu tuukonzyi kumana cita mufwe, mbwaamba Mwami Jehova wamakamu.
Sebina mbwaakatapatilwa
15 #
2 Bam 18:37; Is 36:3; 1 Bam 4:6 Mbuboobu mbwaamba Mwami Jehova wamakamu. Koya kuliyooyo sikuyobolamali, kuli Sebina mupati waŋanda, 16ukamwaambile kuti, Ucitanzi okuno? Nguni simukowanyoko okuno? Nkaambonzi nolibezela kabanda okuno? Ulalibezela kabanda kujulu! Ulalisida cikalilo mundomba! 17Swiilila! Jehova uyookusowa anze cakuwaala anguzu! Ncobeni uyookuvunga cakuvungisya. 18Uyookulambaila mbuli impila, uyookuwaala munyika impati, elyo uyoofwa nkukonya oko, azyalo inkalaki zyabulemu bwako ziyooba nkuko, uwe nousya luzubo lwamwami wako insoni. 19Njookutonta kuzwa kumilimo yako, akukugwisya mubusena bwako. 20#2 Bam 18:18Lino mubuzuba obo njooita mulanda wangu Eliyakimu mwana wa-Hilikiya, 21#Job 29:16nkabela njoomusamika cikobela cako akumuyumya alutambo lwako, abwalo bwami bwako njoobwaaba mumaanza aako. Elyo uyooba wisaabo bantu bakede mu-Jerusalemu aluzubo lwa-Juda. 22#Ciy 3:7Nkabela njoobika aziwezo zyakwe cijaluzyo caŋanda ya-Davida. Uyoojala, elyo taakwe uyoojula mo; uyoojula, elyo taakwe uuyoojala mo. 23#Ezr 9:8Njoomukankamina mbuli inembe mubusena mbwiingangamina, nkabela uyoobeda luzubo lwawisi cuuno cabulemu. 24Alinguwe mpobayooanzika bulemu boonse bwaluzubo lwawisi, abana mbazyede alunyungu lwakwe, azibelesyo zyoonse ziniini kuzwa kumitiba yakusambila kusikila kunongo zyawaini. 25Mubuzuba obo, mbwaamba Jehova wamakamu, inembe iyakakankaminidwe mubusena mbwiingangamene iyoozunguna, iyoogonkwa akuwa, awalo mukuli iwakaanzikidwe alinjiyo uyootemwa, nkaambo mbuboobo Jehova mbwaamba.
Currently Selected:
Isaya 22: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
