Isaya 13
13
Makani Isaya ngaakasinsima aa-Babuloni
1 #
Is 47:1-15; Jer 50:1–51:64 Ngaaya makani aa-Babuloni, cilengano ncaakabona Isaya mwana wa-Amozi.
2 #
Jer 50:2; 51:25 Amusimpike citondezyo atala acilundu cikukwidwe muuwo. Kolizya loko ijwi lyako lyakubaita, Koboobola ajanza lyako kuti banjile mumilyango yabasilutwe. 3#Joel 3:11Ndalailila basalazi bangu, ndaita basinguzu bangu, balemu bangu basekelela, kuti bazuzikizye bukali bwangu. 4Amuswiilile! Lyamvwigwa ijwi lyalupyopyongano akati kazilundu mbuli ijwi lyabantu banji. Amuswiilile! Ndijwi lyamakamu makamu aabantu bamami aabamasi, balibungene. Jehova wamakamu ulabunganya impi yabasilumamba bakulwisya. 5Balazwa kucisi cili kule loko, kumagolelo aakujulu, nkukuti Jehova azibelesyo zyabukali bwakwe. Baleza kukunyonyoona nyika yoonse. 6#Am 5:18; Zef 1:7; Joel 1:15Amulile, nkaambo buzuba bwa-Jehova buli afwaafwi. Buyoosika mbuli lunyonyooko luzwa kuli-Syaatwakwe. 7Nkaambo kako maanza conse ayookompama, amyoyo yoonse yabantu iyoowizuka. 8Bayookankama, Kuciswa akuzunta kuyoobajata mbubonya mbuli inzunto zyamwanakazi uumisr. Bayoogamba kukulangana umwi aumwi mweenzinyina. Masyu aabo ayooba mbuli mulilo. 9#Mal 4:1Amubone! Buzuba bwa-Jehova buleza. Mbuzuba buyumu, bulijisi lunyemo abukali bunji. Bulasaala nyika cakugambya akunyonyoona basizibi bali mulinjiyo. 10#Ezk 32:7; Mt 24:29; Mk 13:24-25; Lk 21:15; Ciy 6:12-13Nkaambo inyenyeezi zyakujulu abandakutema zilaleka kumunika. Izuba liyoosizigwa ciindi cakupasula; awalo mwezi uyookasya mumuni wawo. 11Elyo njoobweedezya nyika bulumbu bwabubi bwayo, abasizibi bayoopegwa mulandu ngubeelede. Njoolesya kulisumpula kwabasicinguni akufwiinsya basikupenzya balikankaizya. 12Njoocita kuti muntu abe muyandisi mbuli ingolida iisalala. Muntu uulya maila uyooyandika mbuli ingolida yaku-Ofiri. 13#Joel 3:16; Hag 2:6; Mt 24:29; Malo 1:12Nkaambo kako njoozungaanya ijulu, ayalo nyika iyootenkana mpiibede, mubukali bwa-Jehova wamakamu amubuzuba bwalunyemo lwakwe lupati. 14Lino kuyooba kuti, mbubonya mbuli insya iitandidwe ambuli imbelele iitakwe mweembeli, bayoopiluka umwi aumwi kubantu bakwe mwini, bayoocija umwi aumwi kunyika yakwe nkwaakazyalilwa. 15Umwi aumwi uujanwa uyooyaswa; umwi aumwi uujatwa uyoojazigwa ipanga. 16#Nah 3:10Atwalo twana twabo tuyoopwayaulwa kumeso aabo. Maanda aabo ayoosaalwa, abanakazi babo bayootizigwa. 17#Jer 51:11Amubone! Ndabusya ba-Medi kuti babalwisye. Aba tabayeeyi insiliva, tabayandi ingolida. 18Mata aabo ayoopwayaula bakubusi. Tabakooyoofwida bana bamwida luzyalo, Meso aabo taakooyoofwida bana luse. 19#Matl 19:24Nkabela Babuloni, uujisi bulemu kwiinda zisi zyoonse, bweebesi ba-Kasidi mbubalikankaizizya, uyooba mbuli Sodoma a-Gomora ciindi eciya Leza naakaimwaya. 20#Is 14:23Taukooyookalwa limbi mane kukabe kutamani. Taakwe uuyookala mulinguwo mumazyalani oonse. Mu-Arabu takooyooliyakila cilao nkuko, abalo beembeli tabakooyoocezya matanga aabo mulinguwo. 21#Is 34:14; Zef 2:14; Ciy 18:2Pele banoole bayoolala nkuko. Maanda aabo ayoozula bamwaaba. Impowani ziyookala oko, azyalo zyeelo ziyoozyana nkuko. 22Baumpe bayoolila mumaanda aabo aabwami, abasuntwe mumaanzanda aabo meebesi. Ciindi cakwe cili afwaafwi. Mazuba aakwe taakooyooyungizizigwa.
Currently Selected:
Isaya 13: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.