2 Samuele 21
21
Makani aanzala. Mbuyakalesegwa
1 #
My 27:21; 1 Sam 22:10-15; Lev 18:25; My 35:33; Is 26:21 Lino kakuli inzala kuciindi ca-Davida myaaka yotatwe. Elyo Davida wakabuzya makani kuli-Jehova, nkabela Jehova wakati, Nkikaambo ka Saulo aluzubo lwakwe lwabulowa, nkaambo wakajaya ba-Gibeoni. 2#Jos 9:3-15Mpawo mwami wakaita ba-Gibeoni akubaambila makani, (Aba ba-Gibeoni teebakali babana ba-Israyeli pe, kabali baba-Amori ibakasyaala, ba-Israyeli mbubakatangana abo cizuminano. Nkabela Saulo wakali kuyanda kubajaya mukusungwaala kwakwe nkwaakasungwaalila bana ba-Israyeli aba-Juda). 3#2 Sam 20:19Davida wakababuzya ba-Gibeoni kuti, Nkamucitilenzi? Nkamulungilenzi, kuti muletele lukono lwa-Jehova coolwe? 4Lino ba-Gibeoni bakamwaambila kuti, Aya makani ngotujisi a-Saulo aluzubo lwakwe teensi makani aansiliva nanka ingolida, pe, alimwi taciboti kuti ujaye muntu naba omwe wamu-Israyeli nkaambo kandiswe. Lino wakati, Kufumbwa cintu ncimwaamba, njoomucitila ncico.
5Elyo bakaambila mwami kuti, Oyo muntu iwakatupenzya akutuvwiya kuti tunyonyoonwe akutasyaala kumwi kucisi ca-Irayeli, 6#Bab 20:4; 1 Sam 10:24,26tupegwe bantu bali musanu ababili babana bakwe, kuti tubasine kumeso aa-Jehova muGibeya munzi wa-Saulo musale wa-Jehova. Mpawo mwami wakati, Mbubo, ndamupa. 7#1 Sam 20:8,15-17,42; 23:18; 18:3; 2 Sam 9:1-7Pele mwami wakafwida insoni Mefibosete mwana wajonatani mwana wa-Saulo, nkaambo kacikonkezyo ca-Jehova ncibakakonkezyanya aba bobile, Davida a-Jonatani mwana wa-Saulo. 8#1 Sam 18:19; 2 Sam 3:7Mwami wakabweza bana bobile ba-Rizipa, mwana musimbi wa-Aya, mbaakazyalila Saulo, Arimoni a-Mefibosete, alimwi wakabweza bana bosanwe ba-Mikala, mwana musimbi wa-Saulo, mbaakazyalila Adriyeli mwana wa-Barizilai mu-Meholati, 9#2 Sam 6:17wakabaaba mumaanza aaba-Gibeoni, nkabela bakabasina kucilundu kumeso aa-Jehova, aboobo bakawa antoomwe boonse bali musanu ababili. Bakajayigwa kumatalikilo aaciindi cakutebula, nkukuti bantu nibakasaanguna kutebula bbaale,
10 #
2 Sam 3:7; Dt 21:23 Mpawo Rizipa mwana wa-Aya wakabweza zisani zyamasaka, wakaziyanika atala andomba nikwakatalika kutebulwa mane zyakawidwa imvula yakujulu, nkabela teewakazumizya bayuni bakujulu kukala alinzizyo ciindi cesikati nibaba banyama bamusokwe ciindi camasiku. 11Elyo Davida naakaambilwa ncaakacita Rizipa mwana wa-Aya simamambe wa-Saulo, 12#1 Sam 31:8-13Davida wakaakuleta zifuwa zya-Saulo azifuwa zya-Jonatani mwanaakwe kuzwa kubantu baku-Jabezi-Gileadi, nkaambo mbabo bakazibba kumugwagwa waku-Betisani, nkubakabaanzika ba-Filisti obo buzuba ba-Filisti mbubakajaya Saulo ku-Giliboa. 13Wakagwisya nkukonya zifuwa zya-Saulo azifuwa zya-Jonatani mwanaakwe, alimwi bakaleta zifuwa zyabaanzikidwe, 14#Jos 18:28; 7:26; 2 Sam 24:25nkabela bakazika zifuwa zya-Saulo azya-Jonatani mwanaakwe mucisi ca-Benjamini, mumunzi wa-Zela, mukabanda ka-Kisi, wisi. Bakacita zintu zyoonse nzyaakalailila mwami. Elyo kusule lyayaaya Leza wakafwida cisi buuya.
Mbwaakajayigwa mantu aaba-Filisti
15Lino ba-Filisti aba-Israyeli bakacita inkondo alimwi, nkabela Davida wakainka abalanda bakwe kuyoolwana aba-Filisti, Elyo Davida wakaamba kuwizuka. 16Lino Isibenobi, umwi wabana ba-Rafa, kaliko. Bulemu bwasumo lyakwe kabuli masyekeli aali myaanda yotatwe aamukuba, Kasamide zilwisyo zipya, nkabela wakali kuyeeya kujaya Davida, 17#1 Bam 11:36; Int 132:17pele Abisai mwana wa-Zeruya wakamugwasya, wakayasa mu-Filisti akumujaya. Lino bantu ba-Davida bakamukonkezya kuti, Toelede kutusindikila limbi kunkondo, kuti utazimyi mumuni wa-Israyeli,
18 #
1 Mak 11:29
Lino musule lyayaaya kwakalwigwa inkondo aimwi aba-Filisti ku-Gobu, Mpawo Sibekai mu-Husai wakajaya Safi, umwi wabana ba-Rafa. 19Aimwi inkondo yakalwigwa aba-Filisti ku-Gobu, nkabela Elhanani mwana waJareoregimu waku-Betelehemu wakajaya munyina Goliati mu-Giti, nguwakajisi isumo lili aluti mbuli cisamu casikuluka. 20#1 Mak 20:6Alimwi kwakalwigwa inkondo aba-Filisti ku-Gati. Oko kakuli umwi muntu mupati loko, wakali aminwe iili musanu aumwi kumaanza aakwe oonse obile, atukumo tuli musanu akamwi kuzituta zyakwe, nkokuti zyoonse zyakali makumi obile azine. Oyu alakwe wakazyalwa a-Rafa, 21nkabela naakasampaula baIsrayeli, wakamujaya jonatani mwana wa-Simeyi munyina Davida. 22Aba bone mbaakazyala Rafa ku-Gati, nkabela boonse bakajayigwa kumaanza aa-Davida abalanda bakwe.
Currently Selected:
2 Samuele 21: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
