1 Samuele 28

Saulo mbwaakaya kukusonda kumusangu waku-Endori

1 # 1 Sam 29:1 Lino kuciindi eco ba-Filisti bakayobolola boonse basinkondo babo kuyoolwana aba-Israyeli. Nkabela Akisi wakaambila Davida kuti, Ncobeni uleelede kwiinka ambe kunkondo, webo abantu bako. 2#Rom 12:9Mpawo Davida wakaambila Akisi kuti, Mbubo, ayebo uyoobona mbenjoocita ndemulanda wako. Alimwi Akisi wakaambila Davida kuti, Ncibotu, uyoeba intobo yangu mazuba oonse.

3 # Lev 19:31; 20:27; Dt 18:10-11; 1 Sam 25:1; Is 57:1,2; Inc 16:16,19; Kul 22:18 Lino Samuele wakalifwide. Ba-Israyeli boonse bakalimulilide akumuzika mu-Rama mumunzi wakwe. Alimwi Saulo wakalibagwisizye boonse basangu abasondi munyika. 4#Jos 19:18; 2 Bam 4:8; 1 Sam 31:1Lino ba-Filisti bakabungana, bakeza kuzooyaka malabba aabo mu-Sunemu. Alakwe Saulo wakabunganya boonse ba-Israveli kumalabba ku-Giliboa. 5#Job 15:21; 18:11; Int 48:5,6; 73:19; Is 57:20; Dan 5:6Nkabela Saulo naakabona malabba aaba-Filisti, moyo wakwe wakayoowa akukankama loko. 6#My 27:21; 1 Sam 14:37; Tus 1:28; Malo 2:9; My 12:6; Kul 28:30; Dt 33:8Elyo Saulo wakabuzya kuli-Jehova, pele Jehova takakamutyaba pe, nikuba kuziloto nikuba muzilengano nikuba kubasinsimi. 7Mpawo Saulo wakaambila balanda bakwe kuti, Amundiyandwide mwanakazi musondi, kuti nje kulinguwe, nkabuzye. Lino balanda bakwe bakamwaambila kuti, Mwanakazi musondi nkwali ku-Endori. 8#Dt 18:11; 1 Mak 10:13; Is 8:19Mpawo Saulo wakalisandula akusama zyakusama zimbi, wakainka abantu bobile, bakasika kuliyooyo mwanakazi masiku. Wakati, Kondisonda kumuzimu, undibonye oyo ngwenti ambe. 9Elyo mwanakazi wakamwaambila kuti, Ulizi Saulo ncacitide, mbwagwiside boonse basangu abasondi munyika. Ino nkaambonzi nomuyandaula buumi bwangu kuti mfwe? 10Nkabela Saulo wakakonkezya muzina lya-Jehova, wakati, Ncobeni Jehova mbwali muumi, tokwe noyoojana mulandu nkaambo kamakani aya.

11Mpawo mwanakazi wakabuzya kuti, Ino nguni ngwenjelede kukubonya? Wakati, Ndibonya Samuele. 12#Is 57:2; Ciy 14:13Lino mwanakazi naakabona Samuele, wakoongolola ajwi ipati, alimwi mwanakazi wakaambila Saulo kuti, Nkaambonzi nowandeena? Nduwe Saulo. 13#Kul 22:28; Int 138:1Pele mwami wakamwaambila kuti, Utayoowi pe, Ncinzi ncowabona? Mpawo mwanakazi wakaambila Saulo kuti, Ndabona muzimu uuzwa munyika. 14#1 Sam 15:27; 2 Tes 2:10,11Alimwi wakabuzya kuti, Uli buti? Wakati, Mwaalumi munene nguwazwa, alimwi ulisamide cikobela. Mpawo Saulo wakaziba kuti ngu-Samuele, nkabela wakakotamika busyu bwakwe ansi akulemeka.

15 # Tus 5:11; 14:14; 1 Sam 18:12 Lino. Samuele wakaambila Saulo kuti, Ino nkaambonzi nondicubila kundibusya? Saulo wakati, Ndafwaba loko. Ba-Filisti balandilwisya, alakwe Leza wandisia, tacindivwiili limbi pe, nikuba kubasinsimi nikuba kuziloto, Nciceeco ncindakwiitila, kuti undaambile mbwenjelede kucita. 16Lino Samuele wakati, Pele nkaambonzi nobuzya kulindime, na Jehova ulikusiide akuba sinkondonyoko? 17#1 Sam 15:28Jehova wacita mbubonya mbwaakaamba kumulomo wangu. Jehova wakusukula bwami, wabupa mweenzinyoko Davida. 18#1 Sam 15:3-9; 1 Bam 20:42; 1 Mak 10:13; Jer 48:10Mbuli mbotakaswiilila ijwi lya-Jehova akutacitila baAmaleki bukali bwakwe bupati, nciceeco Jehova ncakucitila obo sunu. 19Jehova ulakwaaba, webo aba-Israyeli, mumaanza aaba-Filisti. Junza webo abana bako muzooba okuno kulindime, abalo basinkondo ba-Israyeli ulabaaba mumaanza aaba-Filisti. 20#1 Sam 25:37; Job 15:20-24; Int 50:21Mpawo Saulo wakafwambaana kuvundama amubili wakwe woonse ansi, wakayoowa loko nkaambo kamajwi aa-Samuele, takakacili anguzu pe, nkaambo taakwe ncaakalide buzuba obo boonse isikati amasiku. 21#Bab 12:3; 1 Sam 19:5; Job 13:14Lino mwanakazi naakasika kuli-Saulo, wakabona kuti ulipenzedwe loko, elyo wakamwaambila kuti, Bona! Ndemulanda wako ndaswiilila ijwi lyako, buumi bwangu ndabubika mujanza lyangu, ndaswiilila majwi aako ngondaambila. 22Lino uleelede kundiswiilila ambebo ndemulanda wako. Nkakuletele tusima, uzoolye, elyo uzooba anguzu wazootalika lweendo lwako. 23#Matl 4:6; 1 Bam 21:4; Tus 25:20,21Pele wakakaka, wakati, Pe, nsikoolya. Nekubaboobo balanda bakwe amwanakazi bakamukakatizya, elyo wakaswiilila majwi aabo, wakabuka ansi, wakakala abulo. 24#Matl 18:7,8; Lk 15:23-30Nkabela mwanakazi wakali amoombe uuneneede muŋanda. Mpawo wakafwambaana kumujaya, alimwi wakabweza busu, wakabukanda akujika zinkwa. 25Elyo wakazileta kuli-Saulo akubalanda bakwe, nkabela nibakamana kulya, bakanyamuka, bakainka masiku ayo ngaonya.

Currently Selected:

1 Samuele 28: Ibbaib63

Highlight

Copy