1 Bami 1
1
Davida mbwaakacembaala
1Lino mwami Davida wakacembaala akuba amyaka minji. Bakamusamika zyakusama zinji, nekubaboobo takwakakasaalilwa pe. 2#1 Sam 16:21Nkabela balanda bakwe bakamwaambila kuti, Kuyandawidwe mwami simalelo wesu musimbi nakalindu, kuti aime kubusyu bwamwami akumulela, alimwi alale kucamba cako, kuti mwami simalelo wesu akasaalilwe. 3#Jos 19:18Mpawo bakatalika kuyandaula mucisi coonse ca-Israyeli nakalindu mweebesi, nkabela bakajana Abisagi waku-Sunamu akumusisya kumwami. 4#Matl 4:1; Mt 1:25Oyo musimbi kali mweebesi loko, elyo wakaba muleli wamwami akumukutaukila, pele mwami taakali kuswanana awe pe.
Adonija mbwaakasoleka kujata bwami
5 #
2 Sam 3:4; 1 Mak 3:2; Dt 17:16; 2 Sam 15:1; Int 20:7 Lino Adonija mwana wa-Hagiti wakalisumpula, wakati, Mebo ndaba mwami. Nkabela wakalibambila inkalaki abasimbizi abantu bali makumi osanwe bakuzuzaana kunembo lyakwe. 6#1 Sam 3:13; Tus 23:13; 29:15; 2 Sam 3:3,4; 1 Mak 3:2Wisi taakwe naakamukataazya abuniini kukumubuzya kuti, Ino nkaambonzi nocita obo? Alimwi kali muntu mweebesi loko. Ngonguwe wakatobela Abisalomu kukuzyalwa. 7#2 Sam 20:25; 1 Bam 2:22Nkabela bakabuzyanya makani a-Joabu mwana wa-Zeruya a-Abiyatare mupaizi, elyo aba bobile bakatobela Adonija akumugwasya. 8#1 Bam 4:18; 2 Sam 23:8Pele Zadoki mupaizi a-Benaya mwana wa-Jehoyada a-Natani musinsimi a-Simeyi aReyi aboonse basilumamba Davida mbaakajisi teebakazuminana a-Adonija pe.
9Mpawo Adonija wakatuula imbelele aŋombe abanyama baneneede kuIbbwelyanzoka kumbali lya-Enirogeli. Nkabela wakatamba boonse bakwabo bana bamwami abantu boonse ba-Juda balanda bamwami. 10Pele Natani musinsimi a-Benaya abasilumamba a-Solomoni munyina takwakabatamba pe.
Natani a-Batiseba mbubakazunda Adonija
11 #
2 Sam 3:4
Lino Natani wakaambila Batiseba banyina Solomoni kuti, Sa tomvwide kuti Adonija mwana wa-Hagiti wajata bwami, nkabela Davida mwami wesu tezi? 12#Tus 11:14; 12:15Lino boola, nkakulaye mboelede kucita, kuti uvune buumi bwako omwini abuumi bwamwanaako Solomoni. 13#1 Mak 22:9; 29:23; Jer 33:21Koya lino kumwami Davida, ukamwaambile kuti, O Mwami simalelo wangu, sa teewakandikonkezya mebo ndemulanda wako kuti, Solomoni mwanaako nguuelede kulya bwami bwangu akukala acuuno cangu? Ino nkaambonzi Adonija waba mwami? 14Lino nocili mukwaambaula amwami, ambebo ndakutobela musule kuzooyumya majwi aako.
15Elyo Batiseba wakainka, wanjila muŋanda mwami mwakali koona. Lino mwami wakalicembeede loko, a-Abisagi waku-Sunamu wakali kukutaukila mwami. 16Mpawo Batiseba wakakotama akuvundamina mwami, nkabela mwami wakamubuzya kuti, Ujisinzi? 17#Matl 18:12; Ef 5:33; 1 Pet 3:6Wakamuvwiila kuti, O mwami, wakakonkezya kuzina lya-Jehova Leza wako kulindime ndemulanda wako, wati, Ncobeni Solomoni mwanaako nguuelede kulya bwami bwangu akukala acuuno cangu. 18Lino bona! Adonija wajata bwami! Pele mwami simalelo wangu tezi. 19Wajaya iŋombe abanyama baneneede ambelele zinji loko, alimwi watamba bana bamwami boonse, a-Abiyatare mupaizi, a-Joabu silutwe wampi, pele mulanda wako Solomoni tamutambide pe. 20Lino O mwami simalelo wangu, meso aaba-Israyeli boonse alilangide alinduwe, kuti ubaambile na nguni uuelede kukala acuuno cako cabwami musule lyako. 21#Dt 31:16; Is 57:2; 1 Bam 2:10Lumwi mwami simalelo wangu nayoolala abamawisi, mebo amwanaangu Solomoni tuzooba basimulandu.
22Lino naakacili kwaambaula amwami, alakwe Natani musinsimi wakasika. 23Mpawo mwami wakaambilwa kuti, Ngooyu Natani musinsimi wasika. Nkabela wakanjila kubusyu bwamwami akumukotamina ansi. 24Lino Natani wakati, O mwami simalelo wangu, sa wakaamba kuti, Adonija andilide bwami akukala acuuno cangu? 25#1 Sam 10:24; 2 Sam 16:16; 2 Bam 11:12; 2 Mak 23:11Nkaambo sunu wainka kuyoojaya ŋombe abanyama baneneede ambelele zinji loko, alimwi watamba bana bamwami boonse, abapati bampi, a-Abiyatare mupaizi. Balalya akunywa kulinguwe, alimwi balaamba kuti, Apone mwami Adonija. 26Pele mebo ndemulanda wako, a-Zadoki mupaizi, a-Benaya mwana wa-Jehoyada, a-Solomoni mulanda wako, teetwatambwa pe. 27Sa makani aya azwa kumwami simalelo wangu? Sa tona kutuzibya, iswe tubalanda bako, oyo uuelede kukala acuuno cabwami musule lyako, O mwami wangu?
28Mpawo mwami Davida wakavuwa kuti, Amundiitile Batiseba. Nkabela wakeza kubusyu bwamwami, akwiimikila kunembo lyakwe. 29#Bab 8:19; 1 Sam 14:39; 25:34; 2 Sam 4:9; 12:5; 1 Bam 17:1; 2 Bam 4:30; Matl 48:16; 2 Sam 4:9; Int 19:14; 31:5,7; Malo 3:58Elyo mwami wakakonkezya kuti, Mbubonya Jehova mbwali muumi, ngonguwe iwakandivuna mumapenzi aangu oonse, 30ncobeni ndacita buzuba obuno mbubonya mbundakakonkezya kulinduwe muzina lya-Jehova Leza waIsrayeli, Nkaambo ndakati, Solomoni mwanaako nguuti lye bwami bwangu akukala acuuno cangu. 31#Neh 2:3; Dan 2:4; 6:21Lino Batiseba wakakotamina ansi akuvundama kubusyu bwamwami. Wakati, Mwami Davida simalelo wangu apone lyoonse akutamani,
32Mpawo mwami Davida wakati, Amundiitile Zadoki mupaizi a-Natani musinsimi a-Benaya mwana wa-Jehoyada, Nkabela boonse bakeza kumwami. 33#2 Sam 20:6; Es 6:8; 2 Mak 32:30Lino mwami wakabaambila kuti, Amwiinke abalanda basimalelo wanu, mutantike Solomoni mwanaangu abbiza lyangu ndemwini, akumusisya ku-Gihoni. 34#1 Sam 10:1; 16:3,12; 2 Sam 2:4; 5:3; 1 Bam 19:16; 2 Bam 9:3; 11:12; 2 Sam 15:10; Mk 11:9,10Mwasika oko, Zadoki mupaizi a-Natani musinsimi bamunanike, abe mwami waba-Israyeli. Balizye mweembo, baambe kuti, Apone mwami Solomoni. 35Lino muzooboola awe okuno, nkabela uyookala acuuno cangu cabwami, kuti aendelezye mucibaka cangu, nkaambo ngonguwe ngundabika kuti abe mwami wacisi coonse ca-Israyeli aca-Juda. 36#Dt 27:15-26; Jer 11:5; Mt 6:13Mpawo Benaya mwana wa-Jehoyada wakavwiila mwami kuti, Akube boobo! Jehova Leza wamwami simalelo wangu alakwe aambe obo, 37#Dt 2:7; Jos 1:5,17; 1 Sam 20:13; 1 Bam 8:57; 2 Bam 2:9; 1 Mak 28:20Mbubonya mbuli Jehova mbwaakali amwami simalelo wangu, abe a-Solomoni mbubonya, akusumpula cuuno cakwe akwiinda cuuno ca-Davida mwami simalelo wangu.
Solomoni mbwaakananikzua mafuta aabwami
38 #
2 Sam 8:18; 23:20-23 Lino Zadoki mupaizi a-Natani musinsimi a-Benaya mwana wa-Jehoyada aba-Kereti aba-Peleti boonse bakaya kuyootantika Solomoni abbiza lyamwami Davida akumusisya ku-Gihoni. 39#Kul 30:23-32; Int 89:20; 1 Sam 10:1; 16:1; 1 Mak 29:22; 1 Sam 10:24Nkabela Zadoki mupaizi wakabweza luja lwamafuta kuzwa mutente, akunanika Solomoni, Elyo bakalizya mweembo, abantu boonse bakaamba kuti, Apone mwami Solomoni! 40Nkabela bantu boonse bakamutobela, akuya bulizya namalwa akusekelela lusekelelo lupati, lumwi nyika yakaanduka nkaambo kamuzumo wabo.
Adonija mbwaakalibombya
41Lino Adonija abantu boonse mbaakatambide bakamvwa mbubakamanina buyo kulya, Nkabela Joabu naakamvwa kulila kwamweembo, wakabuzya kuti, Ino lupyopyongano olo luli mumunzi lwaamba nzi? 42#2 Sam 18:27Kacaambaula buyo, wakasika Jonatani mwana wa-Abyatare mupaizi. Elyo Adonija wakamwaambila kuti, Njila! nkaambo uli muntu mwini-mwini, Ncobeni ulaleta makani mabotu. 43Mpawo Jonatani wakavwiila Adonija, wakati, Pe! Simalelo wesu mwami Davida wapa Solomoni bwami. 44Alimwi mwami wakamutuma a-Zadoki mupaizi a-Natani musinsimi a-Benaya mwana wa-Jehoyada aba-Kereti aba-Peleti, nkabela bakamutantika abbiza lyamwami. 45Lino Zadoki mupaizi a-Natani musinsimi bakamunanika mafuta aabwami ku-Gihoni, alimwi bamugwisya nkuko, beza busekelela, aboobo munzi woonse ulipyopyongene, Ngonguwo muzumo ngumumvwide. 46#1 Mak 29:23Lino Solomoni ulikede acuuno cabwami. 47#Matl 47:31Abalo balanda bamwami beza kuzoolumbaizya mwami Davida simalelo wesu, Bati, Leza wako alemeke izina lya-Solomoni, libe ampuwo kwiinda izina lyako, acalo cuuno cakwe cisumpulwe kwiinda cako, Mpawo mwami wakakotama abulo. 48#1 Bam 3:6; Int 132:11,12Alimwi mbuboobu mbwaamba mwami. Alumbwe Jehova Leza wa-Israyeli, nkaambo sunu watupa muntu wakukala acuuno cabwami bwangu, ameso aangu ndemwini alicibwene.
49Mpawo bantu boonse ba-Adoniia mbaakatambide bakakankama, banyamuka, bacija umwi aumwi kumunzi wakwe. 50#1 Bam 2:28; Kul 21:14; 38:2Alakwe Adonija wakayoowa nkaambo ka-Solomoni, nkabela wakanyamuka, waakujata meja aacipaililo. 51Lino Solomoni wakalwiidwa kuti, Bona! Adonija wayoowa mwami Solomoni, lino ulijisi meja aacipaililo, uli mukwaamba kuti, Mwami Solomoni andikonkezye sunu kuti ncobeni mulanda wakwe takooyoomujazya ipanga. 52#1 Sam 14:45; 2 Sam 14:11; Inc 27:34; Dt 1:17Elyo Solomoni wakati, Na waba muntu uululeme, takukooyoowida ansi nikaba kasusu kamutwe wakwe, pele na bubi bujanwe mulinguwe uyoofwa. 53Mpawo mwami Solomoni wakatuma kuti bamugwisye kucipaililo nkwakacijilide, elyo wakeza kuzookotamina mwami Solomoni. Lino Solomoni wakamwaambila kuti, Koya kuŋanda yako.
Currently Selected:
1 Bami 1: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
