1 Makani 19
19
Davida mbwaakakazyanya aba-Amoni
1 #
2 Sam 10:1; 1 Sam 11:1 Lino kusule lyayaaya Nahasi mwami wabana ba-Amoni wakafwa, nkabela mwanaakwe wakalya izina lyakwe, 2Mpawo Davida wakati, Nkamufwide luzyalo Hanuni mwana wa-Nahasi, nkaambo wisi wakandifwida luzyalo mebo. Aboobo Davida wakatuma batumwa kuti bamuumbulizye kumakani aawisi. Pele balanda ba-Davida nibakasika kucisi cabana baAmoni kuli-Hanuni kuti bamuumbulizye, 3bapati babana ba-Amoni bakaambila Hanuni kuti, Uyeeyanzi? Sa ncobeni nkaambo kakulemeka uso Davida ncatumina basikukuumbulizva? Sa balanda bakwe tabazide kuzoolangaula akupilinganya akuvwiya nyika? 4Mpoonya awo Hanuni wakabweza balanda ba-Davida, wabanyoola, wakafwinsizya zikobela kumatako, akubatanda. 5#Jos 6:24,26; Bab 16:22; 1 Bam 16:34Elyo bakainka. Nkabela Davida naakalwiidwa makani aabantu abo, wakatuma basikubacinga, nkaambo bantu bakafwa bweeme loko, Lino mwami wakabaambila kuti, Amulindile ku-Jeriko, mane indezu zyanu zitaangune kumena, elyo nimutaboole,
6 #
1 Sam 14:47; 2 Sam 8:3; 10:6; 1 Bam 11:23; 1 Mak 18:5,9 Lino ba-Amoni nibakabona kuti balinunsya kumeso aa-Davida, Hanuni abana ba-Amoni bakatuma matalenta aansiliva aali cuulu kuti balibelesezye inkalaki abasimbizi ku-Mesopotamiya aku-Aramu Maaka aku-Zeba. 7#My 21:30; Jos 13:9; Is 15:2Bakalibelesezya zyuulu zili makumi otatwe azibili zyankalaki, amwami wa-Maaka abantu bakwe. Aba bakeza akuliyakila zilao kunembo lyaMedeba, Abalo bana ba-Amoni bakayoboloka kuzwa kuminzi yabo, beza kukulwisya. 8Nkabela Davida naakamvwa, wakatuma joabu ampi yoonse yabaalumi basintaze. 9#2 Sam 11:1Elyo bana ba-Amoni bakazwa akulibamba mumindando yakulwa kumulyango wamunzi. Abamwi beenzu bakalibamba abalike musokwe.
10Elyo Joabu naakabona kuti balilangene abasilumamba koonse koonse, kunembo akusule, wakasala bantu basinguzu baba-Israyeli akubabamba kuti balwisye ba-Aramu, 11abantu bamwi basyeede wakababika mumaanza aa-Abisai munyina, nkabela bakalibamba kuti balwisye ba-Amoni. 12Wakati, Na ba-Aramu bandikacila, uleelede kundigwasya, pele na ba-Amoni bakukacila, mebo ndakugwasya. 13#Int 20:7; 34:22; 125:1; Tus 16:3,20; 28:25; Is 30:18; Jer 17:5-8Amube abukozu akulwa canguzu nkaambo kabantu besu aminzi ya-Leza wesu. Lino Jehova acite kufumbwa cimubotela. 14#Lev 26:7,8; My 14:9; Dt 28:7Elyo Joabu abantu mbaakali abo bakaswenenena ba-Aramu kuti babalwisye, nkabela bakacija. 15Lino ba-Amoni nibakabona kuti baAramu bacija, bakacija abalo kubusyu bwa-Abisai munyina, banjila mumunzi, Elyo Joabu wakapiluka ku-Jerusalemu.
16 #
2 Sam 10:16
Pele ba-Aramu nibakabona kuti bazundwa kuba-Israyeli, bakatuma batumwa kuti batambe ba-Aramu-nyina ibakakede mutala lya-Firate, aSofaki silutwe wabasilumamba ba-Hadadezeri nguwakabazulwida. 17Nkabela Davida naakaambilwa makani, wakabunganya ba-Israyeli boonse, wazubuka Jordano, wasika nkubakabede, wabamba mindando yakubalwisya. Elyo Davida naakamana kubamba mindando yakulwisya, ba-Aramu bakamulwisya. 18#Int 33:16; Tus 21:31Lino ba-Aramu bakacija kubusyu bwaba-Israyeli, nkabela Davida wakajaya akati kaba-Aramu inkalaki zili zyuulu zili musanu azibili abasimaulu bali zyuulu zili makumi one. Alakwe Sofaki silutwe wampi wakajayigwa, 19Elyo balanda ba-Hadadezeri nibakabona kuti bazundwa aba-Israyeli, bakacita luumuno a-Davida akuba bazike bakwe. Aboobo ba-Aramu teebakakonzya kuzumina kugwasya ba-Amoni limbi.
Currently Selected:
1 Makani 19: Ibbaib63
Highlight
Share
Compare
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
