Tituq 2

Hká Dông Nyì Yàp Râ Hkyô

1Nàng kúm gi, tengmán é mhoqshit hkyô eq wuí é dông mhoqshit nyî râ dùt lhê. 2Hpô-mâng pé lé gi, i‑myìt shirâm sé râ hkyô; hkúngga gíng é byù dùt râ hkyô; yhûmsing gùng lé wó hkâng râ hkyô eq, lùmjíng myìt ging râ, chyitdàp myìt ging râ, hkam jan hkyô gîng nyì râ hkyô pé lé, mhoqshit byî nyì àq.

3Haû eq rajung za, hpô-myhí mâng pé lé gi, hkúngga gíng é a-kyang bo nyì râ hkyô; lùmù gànsâng dang a taí râ hkyô; îhpê é jùn a dùt râ hkyô eq ge é hkyô lé za dàt mhoqshit é bang wó dùt râ matú mhoqshit byî nyì àq. 4Haú hkûn, Garai Gasâng é mungdang gi, lùmu pyâm é a hui sháng gàq, yhángmòq gi, hpô-myhí zô pé lé, yhûmsing yhang lâng eq, yhang zô pé lé chyitdàp é, 5yhûmsing gùng lé wó hkang é, siri bo é, i-kun lé dàt wùn wàq é, ge é myìt wó tûn shit é, yhûmsing é yhang lâng ùphkang é dông dàt châng é bang dùt râ matú, ge mhoqshit é hpô-myhí mâng pé dùt râ nghut lhê.

6Haû eq rajung za, zorâm wuì lé le, yhûmsing gùng lé wó hkang nyì kó sháng gàq, lhoqpun lhoqkyîng nyì àq. 7Hkyô hkat hkangmó má, yhángmòq lé nàng yhang ge é múzó alìk tûn shit nyî àq. 8Nang lé lhom htuqhtîng é bang gi, ngá-nhûng é hkyô má mara a wó hûn kômù hoq hpû nyì kó sháng gàq, nàng mhoqshit é hkyô má, taî pyám râ hkyô a bò shoq, têng é, siri bo é eq sansêng é dang taî nyì àq.

9-10Ngá-nhûng é hkyi yù Sû Garai Gasang eq sêng é mhoqshit é hkyô pé hkat hkangmó yúng nyî sháng gàq, hkyô hkat hkangmó má, jùn pé lé, yhángmòq é yhûmsîng wui pê é a‑ô má nyì mù, yhûmsîng wui é i‑myìt ngón shoq dang a tu râ; a hkau râ; wó lum tô é bang dùt râ hkyô pé lé, mhoqshit byî nyì àq.

11Hkâsu mù gâ le, hkungsô wó é myìt myòqbyù hkyô gâ é, ngá-nhûng é kô myhang é Garai Gasang eq hkyi yù Sû, Yesuq Hkrisidùq gi, hpungwup shingkang eq htoq shit râ hkyô lé láng nyi é hkûn, 12târâ a hkúnggâ é myìt eq mingkan myìt ô nau é hkyô koi pyám luî, shí i-pyàt má yhûmsing gùng lé wó hkâng râ, díngmán râ eq, târâ hkúnggâ é hkyô wó cháng shoq, 13ngá-nhúng lé mhoqshit byi râ matú, Garai Gasâng jeju chyûnghuq gi, htoq shit bê nghut mù luî, byù lhúnglhâng bang lé hkyi yù hkyô hpóng byi bê nghut ri. 14Haû Yesuq Hkrisidùq gi, agè ashop é hkyô bànshoq mai ngá-nhúng lé hkyi yù mù, ge é múzó hkangmó lé châng kut nau é, Yhânggùng yhang sing é byùhú rahú dùt râ matú wó lhoq sân-yúng yû shoq ga, ngá-nhûng é matú Yhânggùng lé àp byî pyám bê nghut ri.

15Nang lé ó yùq èq le, a wú shôm pyám kó sháng gàq; nàng gi, ahko ahkáng bànshoq eq, yhángmòq lé shí hkyô pé mhoqshit nyî àq; myìt wum byî é eq tân mhoqshit é hkyô lé le kut nyî àq.

Currently Selected:

Tituq 2: znot

Highlight

Copy

Compare