Romaq 14

Gu-mang Wuì Lé A Jéyáng Râ Hkyô

1Lùmjíng myìt má wum nyhóm sû lé, myíng myo nhô zâ é hkyô pé lé a jéyáng byî é za hàp yù keq. 2Byù rayùq é lùmjíng myìt gi, jung hkangmó zô ri; nghut kôlhang, lùmjíng myìt nyhóm sû gótû rayùq gi, mhan-haq hpoqnòq za zô ri. 3Jung hkangmó zo sû gi, a zo sû lé a ge wú tiq pyám; jung hkang jung mó a zo sû gi, zo sû lé mara a ge byi; hkâsu mù gâ le, Garai Gasang gi, yhang lé hàp yu to bê nghut ri. 4Nàng gi, ó yùq wá nghut mù, góyùq é duìnhâng zoshâng lé jéyáng lhê lhú? Yhang, yàp ging kôlhang, lèqbàt kôlhang, yhâng é yhûmsing myìt za nghut lhê. Yhang gi, wó yàp ging râ nghut lhê; hkâsu mù gâ le, haû Yhûmsîng gi, yhang lé wó yàp ging nhâng Sû nghut lhê.

5Rayùq myìt é gi, buìnyì ra-nyí gi, gó-nyí htoq je ge lhê gâ ri; dum rayùq myìt é gi, nyí wuî rajung za nghut lhê gâ ri. Yùq hkangmó gi, yhûmsîng myìt yu é lé a uq-ô nyì sháng gàq. 6Buìnyì ra-nyí lé, ahkyàk lhê ga myìt yù sû gi, haû Yhûmsing é matú kut é nghut ri. Zô é sû gi, Garai Gasang lé jeju hkya-ôn é yánmai, haû Yhûmsîng lé bun luî zô nyi ri; a zo sû le, haû Yhûmsîng lé bun luî Garai Gasang lé jeju hkya-ôn nyi ri. 7Hkâsu mù gâ le, ngá-nhúng ó yùq nghut kôle, yhûmsing matú za chyungxe dui é a nghut; ó yùq nghut kôle, yhûmsing matú za shi é a nghut. 8Ngá-nhúng chyungxe dui nyi le gi, haû Yhûmsing é matú dui é ru nghut lhê; ngá-nhúng shi byùq le gi, haû Yhûmsing é matú shi é ru nghut lhê. Haû mù, chyungxe dui nyì kôlhang, shi byùq kôlhang, ngá-nhúng gi, haû Yhûmsîng eq sêng é bang nghut lhê.

9Haû su mù, Hkrisidùq gi, shi byùq bang eq chyungxe duì bâng é Yhûmsîng dùt sháng gàq ga, shî hkám mù dum dui toq é nghut lhê. 10Haû mù, nàng gi, haî mù náng é gu-mang hpó lé jéyáng nyi lhê lhú? Haî mù náng é gu-mang hpó lé wú tiq nyi lhê lhú? Ngá-nhúng lhúnglhâng bang gi, Garai Gasâng é târâ jéyáng tánghkuq hí má yàp râ bang chyat nghut lhê. 11Hkâsu mù gâ le,

“Haû Yhûmsîng gi, ‘Ngò rû dui nyi é eq rajung za, Ngá é hí má hkyîhput hkangmó htuq râ nghut lhê;

Garai Gasang lé, shô hkangmó èq yín yû kôrâ nghut lhê.’ ga taî ri.”#Esai 45:23

ga kâ tô ri. 12Haû mù luî, ngá-nhúng yùq hkangmó gi, yhûmsîng kut laî lo é hkyô lé, Garai Gasâng chyáng shit ra râ nghut lhê.

13Haû nghut mù, ngá-nhúng gi, rayùq eq rayùq târâ jéyáng lhûm é hkyô lé tô pyám sháng. Ó yùq nghut kôlhang, yhûmsing é gu-mâng é hkyôwuì má, myìt lèqbàt jowò eq htûng htê jowò a to byi râ matú, myìt sidìq keq. 14Haû Yhûmsîng Yesuq má nghut nyi é sû ngò gi, haí jung zoshuq nghut kôlhang, yhang baú yhang a sansêng a dùt é hkyô lé, hkyak wó sé luî, jíng nyi lhê. Nghut kôlhang, ó yùq le, rajung jung lé a sanséng ga myìt yu é nghut jáng, yhâng é matú, zè haû gi, a sansêng é nghut lhê. 15Nàng zô é zoshuq yánmai, náng é gu-mang hpó myìt a ngón é nghut le gi, nàng, chyitdàp myìt mai sô nyi é sû a nghut lo. Hkrisidùq shî hkám byi bê sû nghut é, náng é gu-mang hpó lé, nàng zoshuq é dông mai hkâ lhoqhtên pyám. 16Nàng, ge ri nghû myìt yu é hkyô lé, agè ashop é dông hkâtaî pyám nhâng. 17Hkâsu mù gâ le, Garai Gasâng é mîngdán gi, zo zo shuq shuq hkyô a nghut é za, díngmán hkyô, nguì ngón hkyô eq Chyoiyúng Sô má gabú é hkyô ru nghut lhê. 18Haî mù gâ le, shí hkyô dông mai Hkrisidùq lé dójaú é sû gi, Garai Gasang ô nau é sû eq byu pê èq hkya-ôn é hui sû nghut ri.

19Haû mù luî, nguì ngón hkyô má nyì râ eq, rayùq eq rayùq wum byî lhum râ hkyô lé, shi-kùt nyì keq. 20Zoshuq é yánmai, Garai Gasâng é múzó lé hkâ lhoqhtên pyám. Zoshuq lhúnglháng gi, sansêng é chyat nghut lhê; nghut kôlhang, góyùq lé myìt lèqbàt nhang é jung lé zô é sû gi, shut é nghut lhê. 21Tsibyiq wing shuq é eq sho zô é hkyô má nghut kôlhang, gótû haí jung kut é nghut kôlhang, náng é gu-mang hpó lé myìt lèqbàt nhang é nghut le gi, a kut le je ge lhê.

22Haû mù, haú pé eq séng luî, nàng lùmjíng é haî nghut kôle, nàng eq Garai Gasâng gyoro má za jòq nyì sháng gàq. Yhûmsîng ge lhê gâ é èq, yhûmsing gùng yhûmsîng mara byi jang a jòq é sû gi, hkungsô wó nyi ri. 23Nghut kôlhang, uq-ô é myìt èq zô é nghut le gi, mara byî é huî ri, haî mù gâ le, yhang zô é gi, lùmjíng myìt mai a nghut; lùmjíng myìt mai a kut é haî nghut kôlhang, mara nghut ri.

Currently Selected:

Romaq 14: znot

Highlight

Copy