Sânghkyang 16
16
1I‑myìt nhiklhum mai hpàqchyî haq htung é gi,
byù eq sêng lhê;
nghut kôlhang, nhutshô mai tû taî é dang gi,
haû Yhûmsîng Garaî chyáng mâ é nghut lhê.
2Byu é hkyô bànshoq gi,
yhûmsing é hí má sansêng é chyat nghut ri;
nghut kôlhang, haû Yhûmsîng Garai gi,
byu é i‑myìt sâmlai lé chîn wú é Sû nghut ri.
3Nàng kut é hkyô haî nghut kôlhang,
haû Yhûmsîng Garaî chyáng àp to aq;
haû jáng, nàng myìt hen tô é hkyô pé,
wó ûngmyuq râ nghut lhê.
4Haû Yhûmsîng Garai gi,
jung hkangmó lé, yhâng é a-kyû eq yhang hpan tô ri;
haû agè ashop bâng é ihkyùp buìnyì lháng hpan to bê nghut ri.
5Haû Yhûmsîng Garai gi,
nghutbûn é i‑myìt nhiklhum bànshoq lé chaq pyâm ri;
haû sû é bang gi,
dam byî é hkyak yhang hui zo kôrâ nghut lhê.
6Ru gîng nyi é chyitdàp myìt eq jujúm hkyô gi,
yubàk mara lé wó nghop pyám byî lhê;
agè ashop hkyô lé gi,
haû Yhûmsîng Garai lé gyùq hkúnggâ é dông, wó koi pyâm lhê.
7Byù rayùq é hkyô pé lé,
haû Yhûmsîng Garai myìt nguì bê ga jáng,
Yhang gi, haú yùq lé,
yhâng é gye pé eq lháng nguì ngón lhum nhâng râ nghut lhê.
8Díngmán é dông ra-tsuí zo wó é gi,
a târa é dông sùtzè myo myo wó yu é htoq je ge ri.
9Byù gi, yhûmsing é hkyô lé,
i‑myìt hkaû má myìt tû wú ri;
nghut kôlhang, haû Yhûmsîng Garai gi,
yhâng é hkyîbyè pé lé shuî htòt ri.
10Haû hkóhkam é nhutwuî gi,
hpungwup a-tsam bo é hkunmó hkyô ri;
Yhâng é nhut gi, a târa é dang a ge taí.
11Tengmán é jàng eq joí gi,
haû Yhûmsîng Garaî chyáng mai lo é nghut mù,
htûng má bo é jàngshi pé bànshoq gi,
yhâng é lòqmú chyat nghut ri.
12Hkóhkâm tángmyhâng lé gi,
díngmán hkyo èq xuq tô é nghut mù,
hkóhkam pé gi, târâ a chung é hkyô lé chaq pyâm ri.
13Hkóhkâm pé gi, díngmán é nhutwuî lé,
myìt nguì ô nau é nghut mù,
yhángmòq gi, tengmán dang taí sû lé, gù tô akô nghut ri.
14Hkóhkâm nhikmó-yô é gi,
byù sat lagyo su nghut nyi ri;
nghut kôlhang, hpàqchyî bò sû gi,
haú lé wó lhoqzîm pyám râ nghut lhê.
15Hkóhkâm myòqdong yúng jáng gi,
chyungxe lùt hkyô nghut ri;
yhâng é jeju gi, buì lúm nám lé
mau wô byî é mhut su nghut nyi ri.
16Hîng wó é htoq má,
hpàqchyî byéng-yá wó é gi,
je riyhang ge ri!
Ngùn htung lé hkyin yu é htoq má,
sê gyô é u-nuq lé hkyin yu le gi,
je riyhang ge ri!
17I‑myìt díng bâng é hkyô mó gi,
agè ashop hkyô lé koi pyâm ri;
yhûmsing é hkyô lé wú zúng é sû gi,
yhûmsing é chyungxe lé wú zúng é sû nghut ri.
18Nghutbûn é gi,
htên byòq hkyo é hí má nghut mù,
myìt myhang é gi,
gyòp gyó byùq é hí má nghut nyi ri.
19I‑myìt lhoqnyhûm luî,
zìk zo hui bang eq rahá nyi é gi,
wó lú lo é zè lé,
nghutbun bang eq chôm gam chung é htoq má, je riyhang ge ri.
20Sang kyô é dang lé gyô yù é sû gi,
kô myhang lo ri;
haû Yhûmsîng Garai lé lùmhkau é sû gi, hkungsô wó nyi ri.
21I‑myìt hpàqchyî bò sû lé gi,
sê gyô é u-nuq bo sû gâ ri;
dang ngón dang nguî pé gi,
mhoq kyô é dang lé htuqbáng byî ri.
22Sê gyô é u-nuq bo é sû gi,
chyungxe wuìbúm wó ri;
nghut kôlhang, ngha é sû gi,
yhang ngha é hkyo èq
dam byî é hui zô ri.
23Hpàqchyî bò su é i‑myìt nhiklhum gi,
yhâng é nhut lé shuî û é nghut mù,
yhâng é nhutwuî gi,
mhoq kyô é dang lé htuqbáng byî ri.
24Dang ngón dang nguî pé gi,
byo-î su nghut mù,
i‑myìt nhiklhum lé chuî ngham nhâng luî,
showui showang pé lé wángzán nhang ri.
25Hkyô rahkat gi, byu é myòq hí má,
nyang é su dùt kôlhang, ló htáng má gi,
shi é má hpyot ló htoq ròt ri.
26Mú zui sû zo nhut nghâm é hkyô gi,
yhang lé mú zuî shi-kùt nhang ri;
haî mù gâ lé, yhang zò-mut é hkyo èq
yhang lé chyûn nyi é yánmai nghut ri.
27Ashop é byù gi, agè ashop hkyô haq htung é nghut luî,
yhâng é dang gi, gyúng nyi é myi eq du ri.
28I‑myìt goí é sû gi,
mabyòq jishûm lhoqhtoq ri;
lùmù gànsang é sû gi,
luzúm gê pé lé lhoqkâng pyâm ri.
29Ashop é dông htân htân kut é sû gi,
yhâng é yhûmkyochang lé mhoq hpyoq yû mù,
a gè é hkyô shut shuî wang ri.
30Myòq chûm é sû gi,
hpuq lô lhik lo é hkyô haq htung nyi ri;
yhâng é nhut lé myhî tô é sû gi,
agè ashop é hkyô lhoqhtoq nyi ri.
31Uxâm hpyu é gi,
hpungwup bo é jánmaú nghut ri;
haú lé gi, díngmán é chyungxe duì hkyô mai wó yu é nghut lhê.
32Myìt hing é sû gi,
sarhê htoq má je riyhang ge ri;
yhûmsing myìt lé ge hkang é sû gi,
wà mó rawà lé wó yû su htoq je riyhang ge ri.
33Hkyîn shosé lé gi,
tanghkoí má she wú kôlhang,
myìt hpyit byî é hkyô pé gi,
Yhûmsîng Garaî chyáng mai lo é nghut ri.
© 2025, Wycliffe Bible Translators, Inc.