Gyung So 31
31
Midi-an Byu Pé Lé Lató Hpuq É Hkyô
1Haû Yhûmsîng Garai gi, Mosheq lé, 2“Haû Isira-elaq byu pê é matú Midi-an byu pé lé lató hpuq aq. Hau htâng má, nàng gi, náng é îchyí îwâ pê chyáng ló bo zîng nyì râ nghut lhê.” ga taî ri.
3Haû mù, Mosheq gi, shiwa byu pé lé, “Haû Midi-an byu pé lé Yhûmsîng Garaî é lató hpuq hkyô wó kut kó sháng gàq, yhángmòq lé majan ê zan râ matú, núngmòq chyáng mâ é shâm lhâm chûng bang lé hkyin yù keq. 4Isira-elaq a-myû up hkangmó mâ é byù rahkyîng hkyîng lé majan ê zan nhâng keq.” ga taî ri. 5Haû mù, Isira-elaq a-myû koq pé mâ é hkyin htoq yû luî, a-myû up ra-up mai byù rahkyîng yùq yùq shuî tsîng yù mù, majan zan râ matú, shâm lhâm chung é byù ramûn í hkyîng yùq lé àp byi bekô nghut ri. 6Mosheq gi, majan zan râ matú, sân-yúng jowò mâ é chûngzè pé eq masàt tô é htê mùt myhíng râ tut pé lé chung é, hkyangjong Ele-aza é yhang zo Hpinehasa eq rahá, a-myû up hkangmó mâ é byù rahkyîng hkyîng lé nhang kat ri.
7Yhángmòq gi, haû Yhûmsîng Garai mai Mosheq lé hkunmó hkyô é eq rajung za, Midi-an byu pé lé majan zan luî, yùqgè yùq hkangmó lé sat pyám bekô nghut ri. 8Sat pyâm huî é bang má, Midi-an hkóhkâm ngo yuq nghut é, Ewi, Rekem, Zura, Hura eq Reba pé le lom ri. Yhángmòq gi, Be-ori é yhang zo Balam lé le sham èq sat pyâm akô nghut ri. 9Isira-elaq byu pé gi, Midi-an myiwe wuì eq zoshâng wuì lé châng hkat chyup yû mù, yhángmòq é no hpúng pé, sau bainám hpúng pé eq wó lú sing yu lo é zê pé lé sing yu pyám bekô nghut ri. 10Yhángmòq gi, Midi-an byu pé nyi é wà pé bànshoq eq yhángmòq é wàp pé bànshoq lé nyhê hkyô pyám bekô nghut ri. 11Haû mù, yhángmòq gi, wó lú sing yu é zê bànshoq eq rahá, byù lé le, shigu gaunyhaú lé le yu chûng shuî chûng mù, 12Yerihko wà tû-tap, Yodan làng yàm mâ é Moba pá má xuq tô é yhángmòq é wàp má, Mosheq, hkyangjong Ele-aza eq Isira-elaq shiwa byù hpúng pê chyáng, haû shúm byu pé eq wó lú sing lo é zè eq shigu gaunyhaû pé lé yu lo akô nghut ri.
13Mosheq, hkyangjong Ele-aza eq shiwa byù hpúng é ushuq pé bànshoq bang gi, yhángmòq lé wàp shinggan má ê te akô nghut ri. 14Nghut kôle, Mosheq gi, majan mai taû lo é gyèzaû pé nghut é, hkyîng up gyèzaû pé eq shô ùp gyèzaû pé lé nhikjum yo luî, 15yhángmòq lé, “Núngmòq gi, haî mù myiwe shí bang bànshoq lé chyungxe lhut tô akô lhú? 16Yhángmòq gi, Balam hpàqchyî byî é hkyô má cháng luî, Pe-ora má dùt é hkyô má, haû Yhûmsîng Garai lé a jujúm kôrâ matú Isira-elaq byu pé lé myìt lâng nghoq yû kô é yánmai, haû Yhûmsîng Garaî é byu pé lé wúm ihkyùp she háng byî é bang nghut akô. 17Haû mù, ahkuî, yùqzo bànshoq lé le, yùqgè eq zùm bê é myiwe yùq hkangmó lé le, sat pyám keq; 18nghut kôlhang, yùqgè eq a zùm shî é myiwe zo wuî lé kúm gi, núngmòq é matú nyhi to keq.
19Haû byù sat sû nghut nghut, sat huî é byù màng lé záng é sû nghut nghut, wàp shinggan má nyhit nyí nyì ra râ nghut lhê. Núngmòq le, núngmòq é shúm byû wuì le, sum nyí nyí eq nyhit nyí nyí má yhûmsing gùng yhûmsîng lhoq sân-yúng yû ra râ nghut lhê. 20Hau htoq agó, mèbu bànshoq lé le, sho-kuq, bainám sho-maú eq sik lé saî é bànshoq lé le, lhoq sân-yúng keq.” ga taî ri.
21Hau htâng, hkyangjong Ele-aza gi, majan e é gyèzô pé lé, “Haû Yhûmsîng Garai mai Mosheq lé byî é târâ gi, shí dông nghut lhê; 22hîng, ngùn, gyi, jòqtoq, shûmhpyû, chuî eq 23myi lé wó hkam é jung haî lé le, myi má nyhé ra râ nghut lhê; haú hkûn, haû gi, sanséng râ nghut lhê. Nghut kôlhang, haû gi, lhoq sansêng é wuì má lhoq sân-yúng yû ra râ nghut lhê. Haû myi lé a wó hkam é jung pé lé gi, wuì haú má jum lhai ra râ nghut lhê. 24Núngmòq gi, nyhit nyí nyí má núngmòq é mèbu pé lé chi jáng, sanséng bekó râ nghut lhê. Haú hkûn, núngmòq gi, xuq tô é wàp hkaû má dum myang wàng kôrâ nghut lhê.” ga taî ri.
Wó Lú Sing Lo É Zè Lé Gam É Hkyô
25Haû Yhûmsîng Garai gi, Mosheq lé, 26“Nàng, hkyangjong Ele-aza eq shiwa byù hpúng mâ é yhûmhtu ushuq pé gi, wó lú sing lo é byù eq shigu gaunyhaú bànshoq lé nghap mù, 27majan ê zân é gyèzô pé eq myìt tô é shiwa byù hpúng pé lé rawuí wuí kut gàm byi keq. 28Haû majan ê zân é gyèzô pé wó é, byù ngo shô mâ é rayùq yùq, no, loze pé eq sau bainám pé mâ é ngo shô mâ é radu du kut yu htoq mù, haû Yhûmsîng Garai lé hkán kat byi ra râ dùt lhê. 29Yhángmòq wó é rawuí mâ é hkán haú lé yu htoq mù, haû Yhûmsîng Garaî é wàq toq hkungga dông hkyangjong Ele-aza lé àp byi keq. 30Isira-elaq byu pé wó é rawuí mâ é, byù ngo xê mâ é rayùq yùq nghut nghut, no, loze pé, sau bainám pé eq gótû shigu gaunyhaú pé ngo xê mâ é radu du nghut nghut lé hkyin htoq yû mù, haû Yhûmsîng Garaî é sàksé zúm lé wú gon râ wò yu é Lewiq byu pé lé byi keq.” ga taî ri. 31Haû mù, Mosheq eq hkyangjong Ele-aza gi, haû Yhûmsîng Garai mai Mosheq lé hkunmó hkyô é eq rajung za kut bekô nghut ri.
32Wó lú lo é zè pé lé gyèzô pé yu pyâm é mai lai luî, myìt gyó tô é pé gi, sau 675000 du, 33no 72000 du, 34loze 61000 du eq, 35yùqgè eq a zùm shî é myiwe zo 32000 yùq nghut ri.
36Haû rawuí gû mâ é, majan ê zan bang wó yu é pé gi, sau 337500 du; 37haú gû mâ é, Yhûmsîng Garai lé hkán kat byî é gi, 675 du nghut ri; 38no 36000 du; haú gû mâ é, Yhûmsîng Garai lé hkán kat byî é gi, 72 du nghut ri; 39loze 30500 du; haú gû mâ é, Yhûmsîng Garai lé hkán kat byî é gi, 61 du nghut ri; 40byù 16000 yùq nghut ri; haú gû mâ é, Yhûmsîng Garai lé hkán kat byî é gi, 32 yùq nghut ri. 41Mosheq gi, haû Yhûmsîng Garai mai yhang lé hkunmó hkyô é eq rajung za, Yhûmsîng Garaî é wàq toq hkungga dông, hkyangjong Ele-aza lé hkán haû byî ri.
42Haû majan ê zan bâng chyáng mai Mosheq yù htoq mù, Isira-elaq byu pé nghut é shiwa byù hpúng lé gàm byî é rawuí gi, 43sau 337500 du, 44no 36000 du, 45loze 30500 du eq 46byù 16000 yùq nghut ri. 47Mosheq gi, haû Yhûmsîng Garai mai yhang lé hkunmó hkyô é eq rajung za, Isira-elaq byu pé wó é rawuí gû mâ é byù eq shigu gaunyhaú pé ngo xê mâ é, rayùq yùq, a nghut jáng, radu du lé hkyin htoq yû mù, haû Yhûmsîng Garaî é sàksé zúm lé wú gon râ wò yu é Lewiq byu pé lé byî ri.
48Haú hkûn, gyè hpúng lé ùp é gyèzaû pé nghut é, hkyîng up gyèzaû pé eq shô ùp gyèzaû pé gi, Mosheq chyáng ê mù, 49yhang lé, “Náng é duìnhâng zoshâng ngá-mòq gi, ngá-mòq ùp é a-ô mâ é gyèzô pé lé nghap wú bê, rayùq lháng a yom byùq nghut ri. 50Haû mù, ngá-mòq gi, haû Yhûmsîng Garaî é hí má ngá-mòq é mara hkô htaí hkungga kut râ matú, yhûmsîng wó é hîng zè pé nghut é, lòqbú hting pé, lòqyìn hting pé, lòqtsung dizìk pé, nogóng pé eq wuizo pé lé hkungga dông Yhûmsîng Garaî chyáng yu lé bê nghut lhê.” ga taî akô nghut ri.
51Mosheq eq hkyangjong Ele-aza gi, yhángmòq chyáng mai hing èq saî ge to é zè bànshoq lé hàp yù bekô nghut ri. 52Haû hkyîng up gyèzaû pé eq shô ùp gyèzaû pê chyáng mâ é, Yhûmsîng Garaî é matú wàq toq hkungga dông Mosheq eq Ele-aza nhông byî é hîng bànshoq gi, 60 joí kô bo ri. 53Gyèzô pé yùq hkangmó gi, yhûmsing é matú wó lú sing lo é zè lé yù bekô nghut ri. 54Mosheq eq hkyangjong Ele-aza gi, hkyîng up gyèzaû pé eq shô ùp gyèzaû pê chyáng mai hîng haú lé hàp yù mù, haû Yhûmsîng Garaî é hí má Isira-elaq byu pê é matú myìtbûn nyì masàt dông, zùphpong zúm má yu wang ló akô nghut ri.
© 2025, Wycliffe Bible Translators, Inc.