Gyung So 29
29
Tut Mùt Poî
1Lha-mó nyhit hkyap hkyap lhôxân nyí má, chyoiyúng zùphpong hpong râ nghut mù, mú ge zui saí râ a nghut. Haû gi, núngmòq é matú tut mùt é buìnyì nghut ri. 2Haú hkûn, haû Yhûmsîng Garaî é matú namngón hkungga dông, myi nyhé hkunggâ é matú, haî le a râ é, nohtó zo radu, saulo radu eq razàn bò bê saulo zo nyhit du lé nhông ra râ nghut lhê. 3Nohtó zo eq rahá, tsanlun xû nyhô tô é je nú é mún ngo joí mâ é xê gàmbùm sum gâmbùm nghut é gùqzò hkungga lé nhông byi mù, saulo eq rahá, xê gàmbùm mâ é í gâmbùm nhông byi luî, 4sau zo nyhit du mâ é du hkangmó eq rahá, xê gàmbùm mâ é ragàmbùm nhông byi râ dùt lhê. 5Mara hkyut hkungga dông bainám lo radu gi, núngmòq é matú mara hkô htaí hkungga nhông byi ra râ nghut lhê. 6Shí pé gi, laksan dông nghut é, hkyap hkangmó eq nyí hkangmó nhông byî é myi nyhé hkungga eq haú pê é gùqzò hkungga eq shuq jung hkungga mai lai luî, nhông byî é pé nghut lhê. Haú pé gi, Yhûmsîng Garaî é matú namngón shôm nghut é myi nyhé hkungga pé nghut lhê.
Mara Hkô Htaí Hkungga Nhong É Buìnyì
7Haû nyhit hkyap hkyap, raxê nyí nyí má chyoiyúng zùphpong hpong râ nghut lhê. Núngmòq gi, yhûmsing gùng yhûmsîng lhoqnyhum pyám ra râ nghut mù, mú ge zui saí râ a nghut. 8Haû Yhûmsîng Garaî é matú namngón shôm dông, myi nyhé hkungga kut râ matú, haî le a râ é, nohtó zo radu, saulo radu eq, razàn bò bê é saulo zo nyhit du nhông byi râ dùt lhê. 9Nohtó zo eq rahá, xû nyhô tô é je nú é mún ngo joí mâ é xê gàmbùm mâ é sum gâmbùm nghut é gùqzò hkungga lé nhông byi mù, saulo eq rahá, xê gàmbùm mâ é í gâmbùm nhông byi luî, 10sau zo nyhit du mâ é du hkangmó eq rahá, xê gàmbùm mâ é ragàmbùm nhông byi râ dùt lhê. 11Mara hkô htaí hkunggâ é matú mara hkyut hkungga, ayang nhông byî é myi nyhé hkungga eq hau é gùqzò hkungga, haú pê é shuq jung hkungga pé mai lai luî, mara hkyut hkungga dông bainám lo radu le nhông byi râ dùt lhê.
Zúm Poî
12Lha-mó nyhit hkyap hkyap, raxe ngo nyí nyí má, chyoiyúng zùphpong hpong râ nghut mù, mú ge zui saí râ a nghut. Nyhit nyí yhang, haû Yhûmsîng Garaî é matú poî kut ra râ nghut lhê. 13Sânghî nyí má, haû Yhûmsîng Garaî é matú namngón shôm dông, myi nyhé hkunggâ é matú, haî le a râ é, nohtó râm zo raxe sûm du, saulo í du eq razàn bò bê saulo zo raxe myî du lé, myî èq nhông byi râ dùt lhê. 14Nohtó haû raxe sûm du mâ é du hkangmó eq rahá, xû nyhô tô é je nú é mún ngo joí mâ é xê gàmbùm mâ é sum gâmbùm nghut é gùqzò hkungga lé nhông byi mù, saulo í du mâ é du hkangmó eq rahá, xê gàmbùm mâ é í gâmbùm nhông byi luî, 15saulo zo raxe myî du mâ é du hkangmó eq rahá, xê gàmbùm mâ é ragàmbùm nhông byi râ dùt lhê. 16Ayang nhông byî é myi nyhé hkungga, hau é gùqzò hkungga eq shuq jung hkungga mai lai luî, mara hkyut hkungga dông bainám lo radu le nhông byi râ dùt lhê.
17Í nyí nyí má, haî le a râ é, nohtó râm zo raxe í du, saulo í du eq razàn bò bê é saulo zo raxe myî du nhông byi râ dùt lhê. 18Nohtó râm zo pé, saulo pé, saulo zô pé eq rahá, haú pê é nghapcham má cháng luî, haú pê é gùqzò hkungga pé eq shuq jung hkungga pé lé nhông byi râ dùt lhê. 19Ayang nhông byî é myi nyhé hkungga, hau é gùqzò hkungga eq haú pê é shuq jung hkungga pé mai lai luî, mara hkyut hkungga dông bainám lo radu le nhông byi râ dùt lhê.
20Sum nyí nyí má, haî le a râ é, nohtó râm zo raxê radu, saulo í du eq razàn bò bê é saulo zo raxe myî du nhông byi râ dùt lhê. 21Nohtó râm zo pé, saulo pé, sau zô pé eq rahá, haú pê é nghapcham má cháng luî, haú pê é gùqzò hkungga pé eq shuq jung hkungga pé lé nhông byi râ dùt lhê. 22Ayang nhông byî é myi nyhé hkungga, hau é gùqzò hkungga eq shuq jung hkungga mai lai luî, mara hkyut hkungga dông bainám lo radu le nhông byi râ dùt lhê.
23Myi nyí nyí má, haî le a râ é, nohtó râm zo raxê du, saulo í du eq razàn bò bê é saulo zo raxe myî du nhông byi râ dùt lhê. 24Nohtó râm zo pé, saulo pé, sau zo pé eq rahá, haú pê é nghapcham má cháng luî, haú pê é gùqzò hkungga pé eq shuq jung hkungga pé lé nhông byi râ dùt lhê. 25Ayang nhông byî é myi nyhé hkungga, hau é gùqzò hkungga eq shuq jung hkungga mai lai luî, mara hkyut hkungga dông bainám lo radu le nhông byi râ dùt lhê.
26Ngo nyí nyí má, haî le a râ é, nohtó râm zo gaû du, saulo í du eq razàn bò bê é saulo zo raxe myî du nhông byi râ dùt lhê. 27Nohtó râm zo pé, saulo pé, saulo zô pé eq rahá, haú pê é nghapcham má cháng luî, haú pê é gùqzò hkungga pé eq shuq jung hkungga pé lé nhông byi râ dùt lhê. 28Ayang nhông byî é myi nyhé hkungga, hau é gùqzò hkungga eq shuq jung hkungga mai lai luî, mara hkyut hkungga dông bainám lo radu le nhông byi râ dùt lhê.
29Hkyuq nyí nyí má, haî le a râ é, nohtó râm zo shit du, saulo í du eq razàn bò bê é saulo zo raxe myî du nhông byi râ dùt lhê. 30Nohtó râm zo pé, saulo pé, saulo zô pé eq rahá, haú pê é nghapcham má cháng luî, haú pê é gùqzò hkungga pé eq shuq jung hkungga pé lé nhông byi râ dùt lhê. 31Ayang nhông byî é myi nyhé hkungga, hau é gùqzò hkungga eq shuq jung hkungga mai lai luî, mara hkyut hkungga dông bainám lo radu le nhông byi râ dùt lhê.
32Nyhit nyí nyí má, haî le a râ é, nohtó râm zo nyhit du, saulo í du eq razàn bò bê é saulo zo raxe myî du nhông byi râ dùt lhê. 33Nohtó râm zo pé, saulo pé, saulo zô pé eq rahá, haú pê é nghapcham má cháng luî, haú pê é gùqzò hkungga pé eq shuq jung hkungga pé lé nhông byi râ dùt lhê. 34Ayang nhông byî é myi nyhé hkungga, hau é gùqzò hkungga eq shuq jung hkungga mai lai luî, mara hkyut hkungga dông bainám lo radu le nhông byi râ dùt lhê.
35Shit nyí nyí má, poî htâng sat zùphpong hpong râ nghut mù, mú ge zui saí râ a nghut. 36Haú nyí má, haû Yhûmsîng Garaî é matú namngón shôm dông, myi nyhé hkunggâ é matú, haî le a râ é, nohtó râm zo radu, saulo radu eq razàn bò bê é saulo zo nyhit du nhông byi râ dùt lhê. 37Nohtó râm zo, saulo, saulo zô pé eq rahá, haú pê é nghapcham má cháng luî, haú pê é gùqzò hkungga pé eq shuq jung hkungga pé lé nhông byi râ dùt lhê. 38Ayang nhông byî é myi nyhé hkungga, hau é gùqzò hkungga eq shuq jung hkungga mai lai luî, mara hkyut hkungga dông bainám lo radu le nhông byi râ dùt lhê.
39Haû núngmòq dangshikaq to luî, byî é núngmòq é byi naû hkungga pé mai lai luî, núngmòq é masàt tô é poî pé má, haû Yhûmsîng Garaî é matú, shî, núngmòq é myi nyhé hkungga pé, gùqzò hkungga pé, shuq jung hkungga pé eq zùmhkaû hkungga pé lé nhông ra râ nghut lhê.’ nghû taí aq.” ga taî ri.
40Mosheq gi, haû Yhûmsîng Garai mai yhang lé hkunmó hkyô é pé bànshoq, Isira-elaq byu pé lé taî kyô ri.
© 2025, Wycliffe Bible Translators, Inc.