Marikuq 14

Yesuq, Xû But Byi Huî É Hkyô

Mht 26:1-16; Luk 22:1-6; Yhn 11:45-53, 12:1-8

1Ahkuî, haû Lhoqlhai Poî eq múnchi a kat é Mùk Zo Poî jé râ í nyí za ru râ alô hkûn, hkyangjong agyi pé eq târâ sará pé gi, Yesuq lé hkâsu kut wó haq chyup yû mù, sat pyám râ matú, hkyô ho nyi akô nghut ri. 2Nghut kôlhang, yhángmòq gi, “Byu pé gabyông lò kó âbe, poî gyoro má gi, a kut shi sháng.” ga taî akô.

3Yesuq gi, Behtani wà má nyi é yàpjèq nòlì dàp wú sû Simûn é yhûm, zanggyap má nghe zung tô é hkûn, myiwe myhí rayùq gi, naridu a-myìt mai za saî yu é, gyai hpaû é namngón xû bo é alabasita gâ é lùq hpyû bòng yu lé lô mù, bòng haú lé lâng hkyui luî, namngón xû haú lé Yesuq é ulhum má hut gyun byî ri.

4Haú má nyi tô é bang ra-am gi, wú nhik-yô é myìt èq, rayùq eq rayùq taî lhum kô é gi, “Haî mù, namngón xû lé aha agó kut pyâm lhê laq? 5Haû namngón xû lé, denari#14:5 Denari rachap gi, byù rayùq é ra-nyí lhê é zuihpau eq wuí ri. súm sho èq ung luî, myùng bang lé byî le ge lhê mhaî!” gâ akô. Yhángmòq gi, myiwe myhí hau lé le, gyai chôm tân akô.

6Nghut kôlhang, Yesuq gi, yhángmòq lé, “Myiwe zo haú lé, hkâtân nyì kó; haî mù, yhang lé i‑myìt lhoqmyo nhang nyi akô lhú? Yhang gi, Ngá é ahtoq má ge é hkyô kut bê nghut ri. 7Haû myùng bang gi, núngmòq eq rahá hkâ-nhám le nyì râ nghut lhê mù, núngmòq garúm nau é hkûn, yhángmòq lé wó garúm lhê. Nghut kôlhang, ngò gi, shî má núngmòq eq rahá ayang nyi nyì râ sû a nghut. 8Yhang gi, yhang wó dùt é í kut bê nghut ri. Yhang, Ngá gûng má, namngón xû hut gyûn é gi, Ngá gûng lé yhum râ matú, hí hen lajâng tô é ru nghut lhê. 9Ngò, núngmòq lé teng za taí kôlé, haû gabú danglù lé mingkan gón hko kyô é jowò hkangmó má, yhang lé myìtbûn é dông, yhang kut é hkyô shî lé, taî kyo bekô râ nghut lhê.” ga taî kyô ri.

10Hau htâng, haû chángzo raxe í yùq má bo é Yudaq Isikarut gi, Yesuq lé àp pyám râ ga, hkyangjong agyi pê chyáng e ri. 11Haú bang gi, haú hkyô lé lhom wó gyo kôjáng, gyô gabú luî, yhang lé ngùn byi râ ga, danghtum htûm tô akô. Haû mù, yhang gi, Yesuq lé àp pyám râ hkyô ho nyì bê nghut ri.

Yhûmsing É Myínzang

Mht 26:17-30; Luk 22:7-23; Yhn 13:21-30

12Haû htûngli jòq é eq rajung za, Lhoqlhai Poî hkungga sau zo jaú byî é, múnchi a kat é Mùk Zo Poî sânghî nyí má, Yesuq é chángzô pé gi, Yesuq lé, “Nàng zo râ Lhoqlhai Poî lé, ngá-mòq hká má ê món to râ lhú?” ga myî akô.

13Haû mù, Yhang gi, chángzo í yùq lé, “Núngnhik, wà mó hkaû shut wang ló keq, wuì yambú wàq é byù rayùq lhom hui râ nghut lhê; haú hkûn, núngnhik gi, yhâng htâng cháng keq. 14Haú yùq, wang ló é yhûm mâ é yhûmsîng lé, ‘Ngò, Ngá é chángzô pé eq rahá, Lhoqlhai Poî lé zo râ bíng wàp hká má nghut lhê lhú ga, Sará myí nhang kat ri.’ nghû taí keq. 15Haú hkûn, hen to gû nghut é, ahtoq mâ é wàp mó lé lhom tûn shit râ nghut lhê. Wàp haú má, ngá-nhûng é matú ê hen to keq.” ga taí luî, nhang kat ri.

16Chángzo haú nhik gi, htoq e ló mù, wà mó hkaû má wang e ló le, Yesuq taî kat é eq roq za ê myâng kômù luî, Lhoqlhai Poî lé, món to bekô nghut ri.

17Myínhtâng jé lô jáng, Yesuq gi, haû chángzo raxe í yùq eq rahá, haú má lé jé bekô nghut ri. 18Yhángmòq gi, zanggyap má nghê mù, zô nyi bùm kô é u lé, Yesuq gi, “Ngò, núngmòq lé teng za taí kôlé, Ngò eq rahá zô nyi é bang núngmòq mâ é rayùq sû gi, Ngo lé àp pyám râ nghut lhê.” ga taî ri.

19Haú hkûn, yhángmòq gi, gyô yón kômù, rayùq htâng rayùq, “Ngò, a nghut hkaî?” ga Yhang lé myî akô.

20Haú hkûn, Yhang gi, “Haú yùq gi, haû raxe í yùq mâ é rayùq nghut lhê. Ngò eq rahá, hkoq shí má mùk jùm zo sû nghut lhê. 21Haû Byu Yhangzo gi, Yhang eq séng luî kâ tô é eq rajung za, shî râ za nghut lhê. Nghut kôlhang, haû Byu Yhangzo lé àp pyâm é sû gi, dingnyé wó ri; haú yùq gi, a hku lé le lháng, je ge ri.” gâ ri.

22Yhángmòq zô nyì kô é u lé, Yesuq gi, mùk lé yù mù, jeju hkya-on luî, mùk lé myhik hpé mù, “Shî gi, Ngá é gùngsho nghut lhê; yù mù zo keq.” ga taí uchyang, Yhâng é chángzô pé lé gàm byî ri.

23Hau htâng, Yhang gi, góm lé le, yù mù, jeju hkya-on luî, yhángmòq lé byî ri; yhángmòq bànshoq bang gi, haú lé yù shuq akô nghut ri.

24Yesuq gi, yhángmòq lé, “Shî gi, byù myo myô é matú htoq pyâm é, dangshikaq eq sêng é Ngá sui nghut lhê. 25Ngò, núngmòq lé teng za taí kôlé, Ngò, Garai Gasâng é mîngdán má, tsibyiq wing asik lé shuq é buìnyì a jé jé, tsibyiq wing lé dum shuq râ a nghut lo.” ga taî ri.

26Yhángmòq gi, hkya-on mahkôn ralhum ban hkôn jáng, Tsanlun bùm shut htoq e ló bekô nghut ri.

Petiruq He-ngìk Râ Hkyô Lé, Te Taî É Hkyô

Mht 26:31-35; Luk 22:31-34; Yhn 13:36-38

27Yesuq gi, yhángmòq lé, “Núngmòq lhúnglhâng bang gi, myìt lingbàt kôrâ nghut lhê; hkâsu mù gâ le,

‘Haû sau zúng sû lé, Ngò bàt sat pyám mù, sau pé gi, lhoqpyo pyâm é hui kôrâ nghut lhê.’#Zhk 13:7

ga kâ tô ri. 28Nghut kôlhang, Ngò gi, lhoqdui toq é huî htâng má, Galile mau shut, núngmòq é hí má e ló láng râ nghut lhê.” ga taî ri.

29Haú hkûn, Petiruq gi, “Góbang bànshoq myìt lingbàt kôlhang, ngò gi, myìt lingbàt râ a nghut.” ga taî kat ri.

30Haû mù, Yesuq gi, “Ngò, nàng lé teng za taí lé, hkû-nyí, hkû-myîn yhang jáng, wòq í dâm a tûn shi-má, nàng, Ngo lé sum dâm he-ngìk pyám râ nghut lhê.” ga tû taî ri.

31Nghut kôlhang, Petiruq gi, “Ngò, Nàng eq rahá shî râ dùt kôlhang, Nang lé ngò he-ngìk pyám râ a nghut.” ga zùq zùq taî ri. Góbang bànshoq le, haû su ga châng taî bum akô nghut ri.

Get-samane Gâ é Jowò Má Kyûdûng É Hkyô

Mht 26:36-46; Luk 22:39-46

32Yhángmòq gi, Get-samane gâ é jowò má jé ló kômù, Yesuq gi, Yhâng é chángzô pé lé, “Ngò, kyû ê dûng nyi é u lé, shî má zùng láng keq.” ga taî ri. 33Yesuq gi, Yhang eq rahá Petiruq, Yakuq, Yohan pé lé, shuî chung ri. Haú hkûn, Yhang gi, myìt gyai a ngón é eq myìt wuîhkê é hui mù, 34yhángmòq lé, “Ngò gi, shî râ í yhang myìt yón nyi ri; núngmòq gi, machyâ luî, shî má láng nyî keq.” ga taî ri.

35Yesuq gi, haû mai ra-tsuí zo sô ê mù, myigùng má gòp byên to luî, ahkyíng haú lé ge lhoqlhaî pyám byî le gi, Yhâng chyáng mai lhoqlhaî pyám byi râ matú, 36“Aba,#14:36 Aba gâ é gi, Aramik myíng dông, Âwa gâ é lichyúm nghut lhê. Âwa ê, Nàng gi, haî le wó dùt é Sû nghut lhê. Góm#14:36 Góm gâ é gi, Yesuq, jamjau hui râ hkyô eq shî râ hkyô lé taí nau é nghut lhê. shí lé, Ngá chyáng mai yu pyám byi laq. Nghut kôlhang, Ngò ô nau é dông a nghut, Nàng ô nau é dông shèq nghut sháng gàq.” ga kyûdûng ri.

37Hau htâng, Yhang gi, Yhâng é chángzô pê chyáng dum taû lo le, yhángmòq yhup myhî to kô é lé lo myang ri. Haû mù, Yhang gi, Petiruq lé, “Simun, nàng yhup ngón nyi lhê lhú? Razùp za lháng a wó machyâ nyì lhú? 38Gúnglaú é a hui sháng gàq, machyâ luî, kyûdûng nyì keq. Haû sô gi, kâm nyì kôlhang, gùngsho gi, wum nyhôm nyi ri.” ga taî ri.

39Yesuq gi, radàm dum ê mù, hí lé dûng é dang lé za, ê dûng ri. 40Yhang dum taû lo le, yhángmòq gi, myòqkuq lai kô é yánmai, yhup myhî to láng kô é lé, lo dum myang ri. Yhángmòq gi, Yhang lé haî taí râ a sé dùt byùq akô nghut ri.

41Yesuq gi, sum dâm nghû râ lhîng má, yhángmòq chyáng dum taû jé lô mù, yhángmòq lé, “Núngmòq gi, ahkuî jé shoq yhup ngón nyi ashî kó lhú? Gé bê! Haû ahkyíng gi, jé bê nghut luî, haû Byu Yhangzo gi, yubàk dàp bâng é lòq má àp pyâm é hui râ nghut bê. 42Toq keq! Ló losháng hkoi! Ngo lé àp pyám râ sû gi, jé lé lô bê nghut ri.” ga taî ri.

Yesuq, Chyup Yû Huî É Hkyô

Mht 26:47-56; Luk 22:47-53; Yhn 18:3-12

43Yesuq, dáng nyo nyi ashî u lé, haû chángzo raxe í yùq má bo é Yudaq gi, haû hkyangjong agyi pé, târâ sará pé eq sûwún wui chyáng mai nhang kat é bang nghut é, shâm eq dumbáng pé chung tô é byù mòqmó eq rahá jé lé lo ri.

44Yesuq lé àp pyám râ sû gi, yhángmòq lé, “Ngò bo-puq puq é sû gi, haú yùq nghut bê; Yhang lé chyup yû mù, zúng shuî ló keq.” ga alhô agàn byî to bê nghut ri. 45Yudaq gi, Yesuq chyáng hkyê za ê mù, “Rabai ê.” ga taí luî, Yhang lé bo-puq puq byî ri. 46Haú hkûn, yhángmòq gi, Yesuq lé chôm zuî zìng mù, chyup yû bekô nghut ri. 47Haû mù, nàm má yàp tô é byù rayùq gi, yhâng é shâm lé she htoq yû mù, hkyangjong mó é duìnhâng zôshang é nohkyap lé pyoq hkyô kat byi bê nghut ri.

48Yesuq gi, yhángmòq lé, “Núngmòq gi, da-myàq rayùq lé chyup é su, Ngo lé chyup râ matú, shâm eq dumbáng pé chûng mù, lé lo akô lhú? 49Ngò gi, nyí wuî, núngmòq eq rahá nyì luî, noqkuq yhûm má mhoqshit byî nyì kôlhang, núngmòq, Ngo lé a chyup yû kô é nghut lhê. Nghut kôlhang, Chyúmdang pé gi, dìk ra râ nghut lhê.” ga taî ri. 50Haú hkûn, haû chángzô pé gi, Yesuq lé tô pyâm to kôluî, hpang byo byùq bekô nghut ri.

51Buhîng za wùt é zorâm rayùq gi, Yesuq htâng châng wún ri. Yhángmòq gi, haú yùq lé, wó kyaq zui kô é hkûn, 52yhang gi, buhîng lé hkyut hkyô pyâm to mù, gùngchîn hpang ló byùq bê nghut ri.

Yudaq Byìn Tú Wàpdòq Má Jéyáng Huî É Hkyô

Mht 26:57-68; Luk 22:54-55, 63-71; Yhn 18:13-14, 19-24

53Yhángmòq gi, Yesuq lé, hkyangjong mó chyáng shuî e akô; haû hkyangjong agyi pé lhúnglhâng bang, sûwún wuî eq târâ sará pé le, lé zùp zîng bum akô. 54Petiruq gi, hkyangjong mó é yhûmwàng hkaû má châng jé wâng shoq, we we mai Yesuq htâng châng tô ri. Yhang gi, haú má, zúng bang eq rahá, myihkyóm yâm má gyòq gang zung tô ri.

55Haû hkyangjong agyi pé eq Yudaq byìn tú wàpdòq gón gi, Yesuq lé sat râ sàksé hô kôlhang, haî le a myàng kó nghut ri. 56Byù myo myo gi, a têng é sàksé hkám kôlhang, yhángmòq é dang gi, a tsûng lhum kó nghut ri.

57Hau htâng, ra-am gi, toq yàp mù, a têng é sàksé hkám kô é gi, 58“Yhang gi, ‘Byu lòq èq saî é noqkuq yhûm shî lé, Ngò hpyoq hpyi pyám mù, sum nyí gyoro má, byu lòq èq a saî é, gótû ralhum dum saí râ nghut lhê.’ ga taî é lé, ngá-mòq wó gyô ri.” gâ akô. 59Nghut kôlhang, yhángmòq é sàksé gi, a tsûng lhum kó nghut ri.

60Hau htâng má, hkyangjong mó gi, yhángmòq é hí má toq yàp mù, “Nàng, haî le a tû taí lùq? Shí bang, Nang lé mara hun nyi é sàksé gi, hká dông nghut lhê lhú?” ga luî, Yesuq lé myî ri. 61Nghut kôlhang, Yesuq gi, jit le a ga nyi tô ri.

Haû mù, hkyangjong mó gi, Yesuq lé, “Nàng gi, hkungsô wó Su é yhang zo, Hkrisidùq nghut lhê lhú?” ga dum myî ri.

62Haú hkûn, Yesuq gi, “Nghut lhê; haû ngò Byu Yhangzo gi, Wum-o a-tsam mó bò Su é lòqyo hkyam#14:62 Lòqyò hkyam gâ é gi, ahko ahkáng wó é jowò lé gâ é nghut lhê. má zung tô é lé le, mhuthtui ji mù, mauhkûng mai lé lo é#14:62 Mhuthtui ji mù, mauhkûng mai lé lo é gâ é gi, Dani-elaq 7:14 má bo lhê. lé le, núngmòq myàng kôrâ nghut lhê.” ga taî ri.

63Haú hkûn, hkyangjong mó gi, yhâng é bu lé lâng cheq pyám mù, “Ngá-nhúng, hai sàksé râ ashî lhú? 64Yhang, Garai Gasang lé rhoî dang taî é lé núngmòq wó gyo bê nghut lhê. Núngmòq hkâsu wó myìt akô lhú?” ga myî ri; yhángmòq bànshoq bang gi, shî gíng sû nghut ri ga, chôm myìt huî akô. 65Haû mù, ra-am gi, Yhang lé sôkan byé gyûn é eq, myòq má nghop pyám byi luî, lòqtsup èq htui byî lhê kut mù, “Nang lé ó yùq htuî é, myìqhtoi htoî wú aq.” ga taî akô. Haû zúng bang gi, Yhang lé shuî yù mù, nhuq bàt akô nghut ri.

Yesuq Lé, Petiruq He-ngìk Pyâm É Hkyô

Mht 26:69-75; Luk 22:56-62; Yhn 18:1-18, 25-27

66Petiruq gi, wàng hkaû má nyi tô é u lé, haû hkyangjong mó é duìnhâng zoshâng myhí rayùq jé lé lo ri. 67Haú yùq gi, Petiruq gyòq gang nyi é lé myàng jáng, yhang lé rago wú mù, “Nàng le, Nazaret wà byù Yesuq eq rahá nyì sû nghut ri.” ga taî ri.

68Nghut kôlhang, yhang gi, “Nàng taî é hkyô lé, ngò, sé le a sé, gyo le a sê gyo.” ga he pyám luî, wâng hkúmdong shut htoq e ló bê nghut ri.#14:68 Chyúmding ra-am má, Haú hkûn jáng, wòq tûn bê nghut ri gâ é le bo ri.

69Duìnhâng zoshâng myhí haû gi, Petiruq lé, haú má dum myàng jáng, awui ayàm má yàp tô é bang lé, “Shí yùq le, haû hpúng má lom é sû rayùq nghut ri.” ga dum taî ri. 70Petiruq gi, radàm dum he pyâm ri; hau htâng razùp zo má, haû nàm má yàp tô é bang gi, Petiruq lé, “Nàng gi, Galile byù rayùq nghut é yánmai, haú hpúng mâ é byù rayùq hkyak nghut lhê.” ga taî akô.

71Haú hkûn, yhang gi, yhânggùng yhang nhing luî, “Haû núngmòq taî é byù lé, ngò a sé.” ga dâkam ri.

72Haú u yhang, wòq radàm dum tun kat bê nghut ri. Haû mù, Petiruq gi, “Wòq í dâm a tûn shi-má, nàng, Ngo lé sum dâm he-ngìk pyám râ nghut lhê.” ga, Yesuq, yhang lé taî é dang lé, myìtbûn kat mù, wum kat ngau ri.

Currently Selected:

Marikuq 14: znot

Highlight

Copy